ລິ້ງ ສຳຫລັບເຂົ້າຫາ

ໃຕ້ຫວັນຮັບຜ່ານຂໍ້ຕົກລົງການຄ້າ ກັບຈີນ

  • ໄພສານ ວໍຣະຈັກ

ສະພາແຫ່ງຊາດຂອງໃຕ້ຫວັນ ໄດ້ຮັບ​ຜ່ານຂໍ້ຕົກລົງການຄ້າ ທີ່ມີຄວາມສຳຄັນຄັ້ງປະວັດສາດກັບຈີນແຜ່ນດິນໃຫຍ່ ບາງທີອາດຈະເປັນຂໍ້ຕົກລົງທີ່ມີຄວາມສຳຄັນສຸດ ລະຫວ່າງສອງພັກຝ່າຍ ທີ່ເປັນຄູ່ປໍລະປັກທາງການເມືອງ ກັນ ໃນໄລຍະ 60 ກວ່າປີຜ່ານມາ.

ຂໍ້ຕົກລົງທີ່ ໄດ້ຮັບການອະນຸມັດ ໂດຍສະພາແຫ່ງຊາດ ຂອງໃຕ້ຫວັນ ໃນຕອນແລງ ຂອງວັນອັງຄານວານນີ້ ໄດ້ຕັດພາສີຜະລິດຕະພັນຕ່າງໆ ປະມານ 800 ຊະນິດ ດ້ວຍກັນ ​ແລະໃຫ້ອັດຕາ​ພາສີ​ຜ່ອນຜັນພິເສດ ແກ່ຜະລິດ ຕະພັນຂອງໃຕ້ຫວັນ ຫຼາຍກວ່າ 500 ຊະນິດ ຂະນະທີ່ຜະລິດຕະພັນຂອງຈີນໄດ້ຮັບ ສິດພິເສດໃນທໍານອງດຽວກັນ ຈາກໃຕ້ຫວັນ ປະມານ 300 ຊະນິດ. ຂໍ້ຕົກລົງສະບັບນີ້ ຈະມີຜົນບັງຄັບໃຊ້ ໃນວັນທີ 1 ມັງກອນປີໜ້າ.

ຄະນະເຈລະຈາ ຂອງທັງສອງຝ່າຍ ໄດ້ລົງນາມຂັ້ນຕົ້ນ ໃນຂໍ້ຕົກລົງດັ່ງກ່າວ ເມື່ອເດືອນ ມິຖຸນາຜ່ານມາ. ບໍ່ມີເຄີຍມີຄວາມສົງໄສໃດໆເລີຍ ກ່ຽວກັບການໃຫ້ການອະນຸມັດ ຕໍ່ຂໍ້ຕົກ ລົງສະບັບນີ້ ຢູ່ໃນໃຕ້ຫວັນ ຍ້ອນພັກລັດຖະບານ ທີ່ນິຍົມຈີນຂອງປະທານາທິບໍດີ Ma Ying Jeou ກຳສຽງສ່ວນຫຼາຍ ຢ່າງເດັດຂາດ ຢູ່ໃນສະພາແຫ່ງຊາດຂອງໃຕ້ຫວັນ.

ພວກຄັດຄ້ານຕໍ່ຂໍ້ຕົກລົງ ຊຶ່ງສ່ວນໃຫຍ່ແລ້ວ ເປັນກຸ່ມນິຍົມເອກກະລາດນັ້ນ ເວົ້າວ່າ ຂໍ້ຕົກລົງນີ້ ໃນທີ່ສຸດ ກໍຈະນຳໄປສູ່ ການທ້ອນໂຮມ ເຂົ້າເປັນປະເທດນຶ່ງດຽວກັບຈີນ ຊຶ່ງເປັນຄູ່ການຄ້າ ທີ່ໃຫຍ່ທີ່ສຸດ ຂອງໃຕ້ຫວັນນັ້ນ. ພວກເຂົາເຈົ້າ ໄດ້ທຳການປະທ້ວງ ຢູ່ນອກສະພາແຫ່ງຊາດ ມາແຕ່ມື້ວັນຈັນ ທວງໃຫ້ມີການລົງປະຊາມະຕິ ກ່ຽວກັບຂໍ້ຕົກລົງ ສະບັບນີ້.

XS
SM
MD
LG