ລິ້ງ ສຳຫລັບເຂົ້າຫາ

ທະຫານຊີເຣຍ ສັງຫານ 15 ຄົນ ໃນການໂຈມຕີ ບ້ານຊຸນນີ່ (ສະໄລດ໌/ວີດີໂອ)


ລົດຕູ້ຄະນະກວດກາ ຂອງອົງການສະຫະປະຊາຊາດ ໄປເຖິງສຳນັກງານໃຫຍ່ ຂອງອົງການຫ້າມໃຊ້ອາວຸດເຄມີ (OPCW) ທີ່ນະຄອນ Hague (31 ສິງຫາ 2013)

ພວກນັກເຄື່ອນໄຫວຊີເຣຍກ່າວວ່າ ທະຫານລັດຖະບານ ທີ່ໄດ້ຮັບ
ການໜຸນຫຼັງໂດຍພວກນັກລົບທະຫານບ້ານໄດ້ສັງຫານປະຊາຊົນ
ຢ່າງໜ້ອຍ 15 ຄົນໃນລະຫວ່າງການບຸກໂຈມຕີບ້ານຊຸນນີ່ແຫ່ງນຶ່ງ ໃນເຂດໃຈກາງຂອງປະເທດ.

ກຸ່ມສິ້ງຊອມສິດທິມະນຸດຊີເຣຍ ທີ່ມີສຳນັກງານ ຢູ່ປະເທດອັງກິດ
ກ່າວໃນວັນເສົາມື້ນີ້ວ່າ ແມ່ຍິງ 2 ຄົນແລະເດັກນ້ອຍຄົນນຶ່ງແມ່ນ
ຮວມຢູ່ໃນຈຳນວນພວກທີ່ເສຍຊີວິດໃນການໂຈມຕີບ້ານ Sheik
Hadid.

ກຸ່ມດັ່ງກ່າວນີ້ເວົ້າວ່າ ພວກນັກລົບໄດ້ໃຊ້ປືນແລະມີດສັງຫານປະ
ຊາຊົນແລະເອີ້ນການບຸກໂຈມຕີໃນຄັ້ງນີ້ວ່າ ເປັນການສັງຫານໝູ່. ກຸ່ມສິ້ງຊອມສິດທິມະນຸດ ໃນຊີເຣຍກ່າວຕື່ມວ່າ ຍັງບໍ່ທັນເປັນທີ່ຈະແຈ້ງເທື່ອວ່າ ສ່ວນທີ່ເຫຼືອຂອງພວກຜູ້ຊາຍ ທີ່ຖືກ ຂ້າຕາຍນັ້ນ ເປັນນັກລົບຂອງພວກຕໍ່ຕ້ານຫລືເປັນພົນລະເຮືອນກັນແທ້.


ລັດຖະບານຊີເຣຍ ພວມທຳການຕໍ່ສູ້ກັບກຳລັງຂອງພວກຕໍ່ຕ້ານທີ່ຄອບງຳໂດຍພວກທີ່ນັບ ຖືສາສະໜາອິສລາມນິກາຍຊຸນນີ່. ມີຫລາຍກວ່າ 100,000 ຄົນແລ້ວ ໄດ້ເສຍຊີວິດໃນບັນ ຫາຂັດແຍ້ງທີ່ດຳເນີນມາເປັນເວລາສອງປີເຄິ່ງ ຢູ່ໃນປະເທດດັ່ງກ່າວ.

ການດຳເນີນຄວາມພະຍາຍາມທາງດ້ານການທູດ ເມື່ອໄວໆມານີ້ໄດ້ເພັ່ງເລັງໃສ່ຂໍ້ຕົກລົງ ລະຫວ່າງສະຫະລັດກັບຣັດເຊຍ ທີ່ຈະບັງຄັບໃຫ້ປະທານາທິບໍດີຊີເຣຍ ທ່ານ Bashar al- Assad ມອບຄັງອາວຸດເຄມີຂອງຕົນໃຫ້ແກ່ນາໆຊາດ.

ອົງການຫ້າມນຳໃຊ້ອາວຸດເຄມີຫຼື OPCW ກ່າວວ່າ ລັດຖະບານຊີເຣຍໄດ້ເລີ້ມມອບຂໍ້ມູນ ກ່ຽວກັບອາວຸດເຄມີຂອງຕົນໃຫ້ແລ້ວ ຊຶ່ງເປັນການປະຕິບັດຕາມຂໍ້ຕົກລົງກັນນັ້ນ.

ໃນການໃຫ້ສຳພາດແກ່ວີໂອເອໃນມື້ວັນສຸກວານນີ້ ທ່ານ Michael Luhan ໂຄສົກຂອງ ອົງການດັ່ງກ່າວເວົ້າວ່າ ຕົນໄດ້ຮັບລາຍການອາວຸດເຄມີເປັນບາງສ່ວນແລ້ວແລະຫວັງວ່າ ຈະໄດ້ຮັບຂໍ້ມູນເພີ່ມຕື່ມ ພາຍໃນວັນສຸດສັບປະດານີ້.

XS
SM
MD
LG