ອົງການສະຫະປະຊາຊາດ ແມ່ນກຳລັງເຕືອນລັດຖະບານ ຊີເຣຍ ແລະ ພວກກະບົດວ່າ ພວກເຂົາເຈົ້າອາດມີຄວາມຜິດ ໃນຖານກໍ່ອາຊະຍາກຳສົງຄາມໃນເມືອງ Aleppo ທີ່ຖືກ ແບ່ງແຍກໃນພາກເໜືອຂອງ ຊີເຣຍ.
ພວກກອງກຳລັງລັດຖະບານ ໄດ້ພະຍາຍາມທີ່ຈະເຂົ້າຍຶດເອົາໝູ່ບ້ານຕ່າງໆທີ່ຖືກຄວບ ຄຸມໂດຍພວກກະບົດ ໃນພາກຕາເວັນອອກຂອງເມືອງ, ດ້ວຍການປິດລ້ອມທີ່ໄດ້ຕັດຂາດ ຂົງເຂດດັ່ງກ່າວ ບໍ່ໃຫ້ມີການສົ່ງອາຫານແລະການຊ່ວຍເຫຼືອມະນຸດສະທຳເຂົ້າໄປ ໃນຂະ ນະທີ່ການໂຈມຕີທາງອາກາດຫຼາຍຄັ້ງ ໄດ້ຕົກໃສ່ເຂດທີ່ໝັ້ນ ຂອງພວກກະບົດ.
ເພື່ອເປັນການຕອບໂຕ້, ພວກກະບົດໄດ້ພະຍາຍາມທີ່ຈະທັບມ້າງການປິດລ້ອມນັ້ນ ໂດຍ ເພີ່ມການໂຈມຕີໃສ່ເຂດພາກຕາເວັນຕົກຂອງເມືອງ Aleppo, ເຊິ່ງຢູ່ພາຍໃຕ້ການຄວບ ຄຸມຂອງລັດຖະບານ ຊີເຣຍ. ດ້ວຍເຫດນີ້, ຈຳນວນຜູ້ບາດເຈັບ ແລະ ເສຍຊີວິດຂອງພົນ ລະເຮືອນແມ່ນກຳລັງເພີ່ມຂຶ້ນ.
ອົງການສະຫະປະຊາຊາດກ່າວວ່າ ໃນໄລຍະສອງສາມມື້ທີ່ຜ່ານມານີ້, ປະຊາຊົນຫຼາຍ ກວ່າ 40 ຄົນໄດ້ຖືກຂ້າຕາຍ ແລະອີກຫຼາຍຄົນໄດ້ຮັບບາດເຈັບ.
ໂຄສົກອົງການປະສານງານດ້ານມະນຸດສະທຳ ຂອງສະຫະປະຊາຊາດ ທ່ານ Jens Laerke ກ່າວວ່າ ການບາດເຈັບລົ້ມຕາຍເຫຼົ່ານີ້ແມ່ນເປັນຍ້ອນການຍິງຈະຫຼວດໂຈມຕີ ຢ່າງບໍ່ຈຳແນກໂດຍກຸ່ມຕໍ່ຕ້ານປະກອບອາວຸດ ໃສ່ຂົງເຂດຕ່າງໆທີ່ມີພົນລະເຮືອນອາໄສ ຢູ່ໃນພາກຕາເວັນຕົກຂອງເມືອງ Aleppo.
ທ່ານ Laerke ໄດ້ກ່າວວ່າ “ພວກເຂົາເຈົ້າຍັງໃຫ້ຂໍ້ສັງເກດວ່າ, ໃນເວລາດຽວກັນກໍມັນມີ ປະຊາຊົນ 275,000 ຄົນ ຍັງຕິດຄ້າງຢູ່ໃນພາກຕາ ເວັນອອກຂອງເມືອງ Aleppo ທີ່ຖືກປິດລ້ອມຢູ່ນັ້ນ ບໍ່ມີການຊ່ວຍເຫຼືອເຂົ້າໄປໄດ້, ບໍ່ມີຜູ້ຄົນອອກມາໄດ້, ໂຊກບໍ່ດີ.”
ທ່ານໂຄສົກຍັງໄດ້ກ່າວປະນາມການໂຈມຕີດ້ວຍລົດຖັງໃນວັນອາທິດທີ່ຜ່ານມາໃສ່ຕຶກ ຫຼັງໜຶ່ງໃນພາກຕາເວັນຕົກຂອງເມືອງ Aleppo, ເຊິ່ງເປັນທີ່ຕັ້ງຂອງອົງການສະຫະປະຊາຊາດໃນພາກພື້ນ. ອົງການສະຫະປະຊາຊາດ ໄດ້ກ່າວວ່າ ການໂຈມຕີນັ້ນໄດ້ແນເປົ້າໂດຍ ກົງໃສ່ອາຄານດັ່ງກ່າວ, ເຊິ່ງຮູ້ຈັກມາດົນນານແລ້ວວ່າເປັນຫ້ອງການຂອງອົງການສະຫະປະຊາຊາດ.
ໂຄສົກອົງການສິດທິມະນຸດຂອງສະຫະປະຊາຊາດ ທ່ານນາງ Ravina Shamdasani ກ່າວວ່າ ພວກພົນລະເຮືອນຜູ້ໄດ້ຮັບບາດເຈັບ ແລະ ເສຍຊີວິດຈຳນວນຫຼາຍໄດ້ຊີ້ໃຫ້ເຫັນ ວ່າ ກຸ່ມຕໍ່ຕ້ານທີ່ຕິດອາວຸດແມ່ນໄດ້ລະເມີດກົດໝາຍມະນຸດສະທຳສາກົນ ໂດຍຍິງໂຈມຕີ ຢ່າງບໍ່ເລືອກໜ້າ ໃສ່ບໍລິເວນຕ່າງໆ ທີ່ມີພົນລະເຮືອນອາໄສຢູ່.
