ກຳລັງຊີເຣຍ ເຂົ້າຍຶດເອົາເມືອງ Rabia ຄືນມາໄດ້ ໃນວັນອາທິດ
ມື້ນີ້ ຊຶ່ງເປັນການສືບຕໍ່ໄດ້ຮັບໄຊຊະນະທີ່ມີມາເປັນລຳດັບຕໍ່ພວກ
ຕໍ່ຕ້ານລັດຖະບານ ໃນແຂວງ Latakia ໃນພາກຕາເວັນຕົກສຽງ
ເໜືອຂອງປະເທດ.
ເມືອງ Rabia ຕັ້ງຢູ່ປະມານ 10 ຫຼັກກິໂລແມັດ ຢູ່ທາງໃຕ້ ຂອງ
ຊາຍແດນເທີກີແລະເປັນນຶ່ງໃນສິບກວ່າເຂດ ທີ່ລັດຖະບານເວົ້າ
ວ່າ ກຳລັງຂອງຕົນໄດ້ເຂົ້າ ຄວບຄຸມໃນໄລຍະສອງສາມມື້ຜ່ານ
ມານີ້.
ກຸ່ມສິ້ງຊອມສິດທິມະນຸດໃນຊີເຣຍ ທີ່ມີສຳນັກງານຢູ່ອັງກິດ ຊຶ່ງ
ໄດ້ຕິດຕາມເບິ່ງຄວາມຮຸນແຮງໃນຊີເຣຍນັ້ນກ່າວວ່າ ກຳລັງນິຍົມລັດຖະບານ ແມ່ນໄດ້ຮັບ
ການສະໜັບສະໜຸນຈາກການໂຈມຕີທາງອາກາດຂອງຣັດເຊຍ ແລະການຊ່ອຍເຫຼືອທາງ
ດ້ານຍຸດທະສາດຈາກພວກນາຍທະຫານຣັດເຊຍ.
ສ່ວນຢູ່ໃນພາກຕາເວັນອອກ ຂອງຊີເຣຍ ກຸ່ມສິ້ງຊອມສິດທິມະນຸດດັ່ງກ່າວ ແຈ້ງວ່າ ການ
ໂຈມຕີທາງອາກາດຂອງເຮືອບິນລົບຣັດເຊຍແລະຊີເຣຍ ໄດ້ສັງຫານຢ່າງໜ້ອຍ 164 ຄົນ
ໃນໄລຍະສາມມື້ຜ່ານມານີ້ ທີ່ແຂວງ Deir Ezzor.
ພວກທີ່ເສຍຊີວິດແມ່ນຮວມທັງເດັກນ້ອຍ 43 ຄົນ ຢູ່ໃນສີ່ເມືອງ.
ກຸ່ມສິ້ງຊອມສິດທິມະນຸດໃນຊີເຣຍ ຍັງແຈ້ງໃຫ້ຊາບຕື່ມວ່າ ມີ 44 ຄົນ ເສຍຊີວິດ ໃນການ
ໂຈມຕີທາງອາກາດຂອງຣັດເຊຍແລະຊີເຣຍ ທີ່ເມືອງ Raqqa ຫົວເມືອງໃນພາກເໜືອຊີ
ເຣຍທີ່ຖືກໃຊ້ເປັນນະຄອນຫຼວງຂອງກຸ່ມລັດອິສລາມນັ້ນ.
ເບິ່ງວີດີໂອກ່ຽວຂ້ອງ:
