ຄະນະລັດຖະບານເທີກີ ກໍາລັງປະຊຸມກັນ ກ່ຽວກັບເລື້ອງທີ່ຊີເຣຍໄດ້ຍິງເຮືອບິນລົບຂອງ
ຕົນຕົກໃນອາທິດທີ່ແລ້ວນີ້ ໃນຂະນະທີ່ບັນດານັກການທູດຕາເວັນຕົກ ສືບຕໍ່ປະນາມ
ການໂຈມຕີດັ່ງກ່າວ. ການປະຊຸມກັນຂອງລັດຖະບານເທີກີ ໃນວັນຈັນມື້ນີ້ ແມ່ນມີຂຶ້ນນຶ່ງ
ມື້ ກ່ອນຄະນະນັກການທູດຂອງເນໂຕ້ ມີກໍານົດຈະປຶກສາຫາລືກັນ ຕາມຄໍາຮ້ອງຂໍຂອງ
ເທີກີ ພາຍໃຕ້ສົນທິສັນຍາກໍ່ຕັ້ງຂອງກຸ່ມພັນທະມິດັ່ງກ່າວ ທີ່ບົ່ງວ່າທຸກປະເທດສມາຊິກ
ຈະຕ້ອງຊ່ວຍປົກປ້ອງຄວາມໝັ້ນຄົງປອດໄພແລະເຂດນໍ້າແດນດິນຂອງກັນແລະກັນ.
ໃນຂະນະດຽວກັນນັ້ນ ບັນດາລັດຖະມົນຕີຕ່າງປະເທດຂອງສະຫະພາບຢູໂຣບ ກໍໄດ້ພົບ
ປະກັນ ທີ່ Luxembourg ບ່ອນທີ່ຫົວໜ້າຝ່າຍນະໂຍບາຍຂອງອີຢູ ທ່ານນາງ Catherine
Ashton ກ່າວວ່າ ທ່ານນາງຄາດວ່າ ຈະມີການປຶກສາຫາລືຢ່າງໃຫຍ່ ກ່ຽວກັບການໂຈມຕີ
ຄັ້ງນີ້ ຊຶ່ງທ່ານນາງກ່າວວ່າ:
“ພວກເຮົາແມ່ນມີຄວາມເປັນຫ່ວງກັນວົນຫລາຍ ກ່ຽວກັບເຫດການທີ່ເກີດຂຶ້ນ ແລະເປັນ
ຫ່ວງຫລາຍ ນໍາຄອບຄົວຂອງພວກນັກບິນ 2 ຄົນ ທີ່ຫາຍສາບສູນນັ້ນ ແຕ່ກໍແນ່ນອນວ່າ
ພວກເຮົາຈະພະຍາຍາມຊຸກຍູ້ໃຫ້ທາງເທີກີ ໃຊ້ຄວາມຍັບຍັ້ງຊັ່ງໃຈໃນການຕອບໂຕ້ຄືນນັ້ນ.”
ທາງກະຊວງການຕ່າງປະເທດຂອງຈີນ ກໍໄດ້ຮຽກຮ້ອງໃຫ້ມີການຍັບຍັ້ງຊັ່ງໃຈຄ້າຍໆກັນນີ້.
ລັດຖະມົນຕີການຕ່າງປະເທດອັງກິດ ທ່ານ William Hague ກ່າວວ່າ ທ່ານປະນາມຢ່າງເດັດ
ດ່ຽວ ຕໍ່ເຫດການທີ່ໄດ້ເກີດຂຶ້ນໃນວັນສຸກຜ່ານມານັ້ນ ແລະວ່າ ນັ້ນບໍ່ແມ່ນການຫັນປ່ຽນໂດຍ
ພື້ນຖານ ສະຖານະການໃນຊີເຣຍແຕ່ຢ່າງໃດ. ທ່ານກ່າວຕື່ມວ່າ ມັນເປັນການສໍາຄັນທີ່ສະຫະ
ພາບຢູໂຣບ ຈະຕ້ອງ ເພິ່ມທະວີຄວາມກົດດັນໃສ່ລັດຖະບານຂອງທ່ານ Assad.
