ລິ້ງ ສຳຫລັບເຂົ້າຫາ

ຫົວໜ້າ ນັກການທູດ ສຫລ ແລະ ຣັດເຊຍ ຫາລື ເລື້ອງຊີເຣຍ ທີ່ສະວິດເຊີແລນ


ລັດຖະມົນຕີການຕ່າງປະເທດສະຫະລັດ ທ່ານ John Kerry (ກາງ) ແລະລັດຖະມົນຕີການຕ່າງປະເທດຣັດເຊຍ ທ່ານ Sergei Lavrov (ຂວາ) ກຳລັງຫຼຽວເບິ່ງ ທູດພິເສດ ສປຊ ທ່ານ Staffan de Mistura ໃນລະຫວ່າງ ກອງປະຊຸມ ຖະແຫຼງຂ່າວຮ່ວມກັນ.

ລັດຖະມົນຕີການຕ່າງປະເທດສະຫະລັດ ທ່ານ John Kerry (ກາງ) ແລະລັດຖະມົນຕີການຕ່າງປະເທດຣັດເຊຍ ທ່ານ Sergei Lavrov (ຂວາ) ກຳລັງຫຼຽວເບິ່ງ ທູດພິເສດ ສປຊ ທ່ານ Staffan de Mistura ໃນລະຫວ່າງ ກອງປະຊຸມ ຖະແຫຼງຂ່າວຮ່ວມກັນ.

ຫົວໜ້າ​ນັກ​ການ​ທູດ​ສະຫະລັດ​ແລະ​ຄູ່​ຕຳ​ແໜ່​ງຝ່າຍຣັດ​ເຊຍ ກຳລັງ​ພົບ​ປະກັນ​ທີ່​ປະ​ເທດ​ສະ​ວິດ​ເຊີແລນ​ໃນ​ວັນ​ເສົາ​ມື້ນີ້ໃນ​ຄວາມ​ພະຍາຍາມ​ເພື່ອ​ຫາ​ທາງ​ຕົກລົງກັນກ່ຽວ​ກັບ​ການ​ຟື້ນຟູ​ຂັ້ນຕອນ​ສັນຕິພາບ​ໃນ​ຊີ​ເຣຍ.

ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານ John Kerry ​ແລະ​ລັດ​ຖະມົນຕີ​ການ​ຕ່າງ ປະ​ເທດຣັດ​ເຊຍ ທ່ານ Sergei Lavrov ກຳລັງ​ປະຊຸມ​ກັນຢູ່​ທີ່​ເມືອງ Lausanne ບ່ອນ​ທີ່​ພວກ​ທ່ານ​ຈະ​ຊອກ​ຫາ​ຊ່ອງ​ທາງ​ເພື່ອ​ຍຸຕິ​ການ​ໂຈມ​ຕີ ​ທີ່​ດຳ​ເນີນ​ມາ​ເປັນ​ເວລາຫຼາຍ​ອາທິດ​ແລ້ວຕໍ່​ເມືອງ Aleppo ​ໃນ​ພາກ​ເໜືອ​ຂອງ​ປະ​ເທດທີ່​ຖືກ​ຖະຫຼົ່ມດ້ວຍ​ການ​ໂຈມ​ຕີຂອງ​ຝ່າຍ​ລັດຖະບານ ແລະ​ຖິ້ມລະ​ເບີດ​ໃສ່ ໂດຍຣັດ​ເຊ​ຍ. ທ່ານ Lavrov ກ່າວ​ໃນ​ວັນ​ສຸກ​ວານ​ນີ້ວ່າ ​ແນວໃດ​ກໍ​ຕາມ ທ່ານ​ບໍ່​ໄດ້​ມີຄວາມ​ຄາດຫວັງທີ່​ພິ​ເສດ​ໃດໆໃນການ​ເຈລະຈາ​ທາງ​ການ​ທູດ​ຮອບ​ຫລ້າ​ສຸດ​ນີ້.

ບັນດາອົງການໆ​ກຸສົນ​ທີ່​ມີ​ຊື່​ສຽງ​ລະຫວ່າງ​ປະ​ເທດ​ຮຽກຮ້ອງ​ໃນ​ວັນ​ເສົາ​ມື້ນີ້ໃຫ້​ຢຸດ​ຍິງ​ເປັນ​ເວລາ 72 ຊົ່ວ​ໂມງ ຢູ່​ໃນ​ຄຸ້ມ​ຕ່າງໆ ​ທາງ​ພາກ​ຕາ​ເວັນ​ອອກ​ ຂອງ​ເມືອງ Aleppo ຊຶ່ງ​ເປັນ​ເປົ້າໝາຍ ​ໃນ​ການ​ໂຈມ​ຕີ​ທາງ​ອາກາດ ​ເພື່ອ​ອະນຸຍາດ​ ໃຫ້​ຍົກຍ້າຍ​ພວກ​ຄົນ​ປ່ວຍ​ ແລະ​ພວກ​ທີ່​ໄດ້​ຮັບ​ບາດ​ເຈັບ​ອອກ​ໄປ ​ແລະ​ຈັດ​ສົ່ງ​ອາຫານການ​ກິນ​ ແລະ​ຢາ​ປົວ​ພະຍາດ​ເຂົ້າ​ໄປ​ໃນ​ເຂດ​ທີ່​ຖືກ​ປິດ​ລ້ອມ​ດັ່ງກ່າວ.

ພົນລະ​ເຮືອນ​ຫລາຍ​ຮ້ອຍ​ພັນ​ຄົນ​ຍັງ​ຕົກ​ຄ້າງ​ຢູ່​ໃນ​ເມືອງ Aleppo ຊຶ່ງ​ໄດ້​ກາຍ​ເປັນຈຸດ​ໃຈ ກາງ​ຂອງ​ສົງຄາມ​ກາງ​ເມືອງ​ທີ່​ດຳ​ເນີນ​ມາ​ເປັນ​ເວລາ​ຫ້າ​ປີ​ຢູ່​ໃນ​ຊີ​ເຣຍ. ພວກ​ຕໍ່ຕ້ານ​ລັດຖະ ບານເປັນ​ຜູ້​ຄວບ​ຄຸມ​ກ້ຳ​ຕາ​ເວັນ​ອອກ​ຂອງ​ເມືອງ​ດັ່ງກ່າວໃນ​ຂະນະ​ທີ່​ທະຫານ​ລັດຖະບານ​ຊີ​ເຣຍ​ເປັນ​ຜູ້​ຄວບ​ຄຸມ​ສ່ວນ​ທີ່​ເຫລືອ.

ສະຫະລັດ​ແລະ​ບັນດາ​ປະ​ເທດ​ພັນທະ​ມິດ​ຕາ​ເວັນ​ຕົກ ​ໄດ້​ກ່າວ​ຫາຣັດ​ເຊຍ ແລະ​ຊີ​ເຣຍທີ່​ເປັນ​ພັນທະ​ມິດ​ວ່າໄດ້​ກໍ່​ອາ​ຊະ​ຍາ​ກຳ​ສົງຄາມໂດຍ​ຖິ້ມລະ​ເບີດ​ລົງ​ໃສ່​ໂຮງໝໍ​ແລະຂະ​ບວນ ລົດ​ລຳລຽງ​ເຄື່ອງ​ບັນ​ເທົ​າທຸກ​ສະຫະ​ປະຊາ​ຊາດ ທັງ​ຢູ່​ໃນ​ແລະອ້ອມ​ແອ້ມ​ເມືອງ Aleppo ​ໃນ​ຂະນະ​ທີ່​ພວກ​ເຂົາ​ໄດ້​ໂຈມ​ຕີ​ເປົ້າໝາຍ​ຕ່າ​ງໆ​ຂອງພວກຕໍ່ຕ້ານທີ່​ພວມ​ຫາ​ທາງ​ໂຄ່ນ​ລົ້ມ​ປະທານາທິບໍດີ​ຊີ​ເຣຍ ທ່ານ Bashar al-Assad.

ຊີ​ເຣຍ​ແລະຣັດ​ເຊຍ​ກ່າວ​ວ່າ ຕົນ​ໂຈມ​ຕີ​ແຕ່​ພວກ​ຫົວ​ຮຸນ​ແຮງ. ​ໃນ​ຂະນະ​ທີ່​ຖິ້ມລະ​ເບີດ​ລົງ​ໃສ່​ພວກ​ຕໍ່ຕ້ານ​ນັ້ນ ກຳລັງ​ຊີ​ເຣຍ​ແລະຣັດ​ເຊຍ ກໍ​ໄດ້​ໂຈມ​ຕີ​ພົນລະ​ເຮືອນ​ ​ຮວມທັງ​ພວກ​ເດັກນ້ອຍ​ນຳ​ດ້ວຍ.

ຣັດ​ເຊຍ​ໄດ້​ປະຕິ​ເສດ​ວ່າ ຕົນ​ບໍ່​ໄດ້​ໂຈມ​ຕີ​ພົນລະ​ເຮືອນໂດຍ​ກ່າວ​ວ່າ ຕົນ​ມີ​ແຕ່​ໂຈມ​ຕີ​ພວກ​ກໍ່​ການ​ຮ້າຍ​ເທົ່າ​ນັ້ນ​ ຊຶ່ງ​ເປັນ​ຄຳ​ເວົ້າທີ່ຣັດ​ເຊຍ​ແລະ​ຊີ​ເຣຍ​ໃຊ້ ​ເວລາເວົ້າ​ເຖິງ​ພວກ​ຕໍ່ຕ້ານ.

ປະທານາທິບໍດີບາຣັກ ​ໂອ​ບາ​ມາ ໄດ້​ພົບ​ປະ​ກັບ​ຄະນະ​ທີ່​ປຶກສາ ດ້ານ​ຄວາມໝັ້ນຄົງ​ແຫ່ງ​ຊາດ​ໃນ​ວັນ​ສຸກ​ວານ​ນີ້ ເພື່ອ​ຫາລື​ກ່ຽວ​ກັບ​ເລື້ອງຊີ​ເຣຍ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG