ຄວາມຮຸນແຮງລະເບີດຂຶ້ນທີ່ຊີເຣຍໃນວັນອາທິດມື້ນີ້ ຂະນະທີ່ບັນດາໜ່ວຍປ່ອນບັດໄຂຂຶ້ນ
ສໍາລັບການລົງປະຊາມະຕິເພື່ອຮັບຮອງເອົາຮ່າງກົດໝາຍລັດຖະທໍາມະນູນສະບັບໃໝ່ ທີ່
ເບິ່ງຄືວ່າ ຈະອໍານວຍໃຫ້ປະທານາທິບໍດີ Bashar al-Assad ທີ່ກໍາລັງປະເຊີນກັບບັນ
ຫາຕ່າງໆໃນປັດຈຸບັນມີອໍານາດຂຶ້ນຢ່າງຫລວງຫລາຍນັ້ນ.
ໂທລະພາບແຫ່ງລັດຂອງຊີເຣຍໄດ້ອອກຮູບພາບຈາກໜ່ວຍປ່ອນບັດແຫ່ງຕ່າງໆໃນທົ່ວ
ປະເທດໃຫ້ປະຊາຊົນເຫັນ ແລະໄດ້ກ່າວຍ້ອງຍໍການຕັດສິນໃຈຂອງລັດຖະບານທີ່ຈັດການ
ລົງປະຊາມະຕິດັ່ງກ່າວຂຶ້ນນີ້. ພວກຕໍາໜິຕິຕຽນໄດ້ປະນາມການລົງປະຊາມະຕິນີ້ວ່າ ເປັນ
ເລື້ອງຕະຫລົກ ໂດຍກ່າວວ່າ ທ່ານອັສສັດ ຈະຕ້ອງສະລະອໍານາດຂອງຕົນ ຫລັງຈາກ
ການລຸກຮືຂຶ້ນຕໍ່ຕ້ານການປົກຄອງປະເທດແບບຜະເດັດການຂອງທ່ານມາໄດ້ 11 ເດືອນ
ແລ້ວນັ້ນ.
ປະທານາທິບໍດີ ອັສສັດ ໃຫ້ຄໍາໜັ້ນສັນຍາກ່ຽວກັບການລົງປະຊາມະຕິນີ້ໃນເດືອນມັງກອນ
ຜ່ານມາ ໂດຍກ່າວວ່າ ລັດຖະທໍາມະນູນສະບັບໃໝ່ຈະເພ່ງເລັງໃສ່ການຈັດຕັ້ງລະບົບການ
ເມືອງທີ່ມີຫລາຍພັກການເມືອງເຂົ້າຮ່ວມນໍາ.
ໃນວັນອາທິດມື້ນີ້ ພວກນັກເຄື່ອນໄຫວແຈ້ງໃຫ້ຊາບວ່າ ມີລະເບີດແຕກຂຶ້ນໃນຄຸ້ມ Baba
Amr ໃນໃຈການເມືອງ Homs ຊຶ່ງພວກກໍາລັງຂອງທ່ານອັສສັດ ໄດ້ທໍາການຖິ້ມລະເບີດ
ໂຈມຕີມາໃນຫວ່າງບໍ່ເທົ່າໃດສັບປະດາຜ່ານມາ.
ມີລາຍງານແຈ້ງໃຫ້ຊາບເຊ່ນກັນວ່າ ມີລະເບີດແຕກຂຶ້ນໃນເມືອງບໍ່ນໍ້າມັນ Deir Ezzor
ໃນພາກຕາເວັນອອກສຽງເໜືອແລະໃນເມືອງ ຮາມາ ໃນພາກກາງຂອງປະເທດ.
ການເຄື່ອນໄຫວຕ່າງໆເຫລົ່ານີ້ມີຂຶ້ນຫລັງຈາກກຸ່ມປົກປ້ອງສິດທິມະນຸດ Observatory
ຂອງຊີເຣຍ ກ່າວວ່າ ຄວາມວຸ້ນວາຍດັ່ງກ່າວໄດ້ເອົາຊີວິດປະຊາຊົນໄປປະມານ 100 ຄົນ
ໃນວັນເສົາວານນີ້ ໃນການໂຈມຕີຫລາຍບັ້ນຂອງຝ່າຍລັດຖະບານຕໍ່ພວກກຸ່ມຄັດຄ້ານລັດ
ຖະບານນັ້ນ.