ລິ້ງ ສຳຫລັບເຂົ້າຫາ

ອີຢູ ລົງໂທດ ຮອບໃໝ່ ຕໍ່ຊີເຣຍ (ເບິ່ງວີດີໂອ)

  • ໄພສານ ວໍຣະຈັກ

ປະທານາທິບໍດີຊີເຣຍ ທ່ານ Bashar al-Assad ແລະພັນລະຍາ ຍານາງ Asma (13 ກໍລະກົດ 2008)

ສະຫະພາບຢູ​ໂຣບໄດ້​ຕັດສິນ​ໃຈ​ລົງ​ໂທດ​ຮອບ​ໃໝ່​ຕໍ່​ພວກ​ທີ່ຢູ່​ໃນວົງໃນຂອງ​ປະທານາທິບໍດີ​ຊີ
ເຣຍທ່ານ Bashar al-Assad ຂະນະ​ທີ່​ການ​ປະ​ທະ​ກັນຄັ້ງ​ໃໝ່​ລະ​ເບີດ​ຂຶ້ນ​ໃນ​ທົ່ວ​ປະ​ເທດ.

ບັນດາ​ລັດຖະມົນຕີ​ການ​ຕ່າງປະ​ເທດ​ ຂອງ​ສະຫະພາບຢູ​ໂຣບ ທີ່​ພວມ​ປະຊຸມ​ກັນ ຢູ່​ນະຄອນ
Brussels ກ່າ​ວວ່າ ພວກ​ທ່ານຈະ​ທຳ​ການ​ລົງ​ໂທດ​ກ່ຽວ​ກັບ​ການ​ຫ້າມ​ເດີນທາງ ​ແລະ​ຢຶດຊັບ​
ສິນ​ສະມາຊິກ​ຫຼາຍໆ​ຄົນ ​ໃນຄະນະ​ລັດຖະບານ ​ແລະ​ຄອບຄົວ​ຂອງ​ປະທານາທິບໍດີ Assad
ຮວມທັງ​ພັນ​ລະ​ຍາ​ຂອງ​ທ່ານ ຄື​ຍານາງ Asma al-Assad ທີ່​ເປັນຄົນອັງກິດ ​ໂດຍ​ກຳ​ເນີດ
ນັ້ນ.

ພັນ​ລະ​ຍາ​ຂອງ​ທ່ານ Assad ​ໄດ້​ຕົກ​ເປັນ​ຈຸດ​ສົນ​ໃຈ​ເມື່ອ​ໄວໆ​ມານີ້ຫຼັງຈາກ​ອີແມ​ລທີ່​ໜັງສືພິມ
Guardian ຂອງ​ອັງກິດ​ໄດ້​ຮັບ​ມານັ້ນ​ເປີດ​ເຜີຍ​ໃຫ້​ເຫັນ​ວ່າ ຍານາງ​ຍັງສັ່ງ​ຊື້​ເຄື່ອງ​ຊື້ຂອງ​ເປັນ
ຈຳນວນ​ຫຼວງຫຼາຍຂະນະ​ທີ່​ຊີ​ເຣຍພວມ​ເກີດຄວາມ​ຮຸນ​ແຮງ​ຢ່າງ​ໜັກ. ຍັງ​ບໍ່​ທັນ​ເປັນ​ທີ່​ຈະ​ແຈ້ງ
ເທື່ອ​ວ່າການ​ລົງ​ໂທດ​ດັ່ງກ່າວນີ້ ຈະ​ຫ້າມ​ບໍ່​ໃຫ້​ຍານາງ​ເດີນທາງ​ໄປ​ອັງກິດ​ຫຼືບໍ່ບ່ອນ​ທີ່​ເຊື່ອ​ກັນ​
ວ່າ​ຍານາງ​ຍັງ ຖື​ສັນຊາດ​ຢູ່ນັ້ນ.

ກ່ອນ​ການ​ປະຊຸມ​ກັນ ລັດຖະມົນຕີ​ການ​ຕ່າງປະ​ເທດ​ອັງກິດ ທ່ານ William Hague ກ່າວ
ວ່າ ການ​ລົງ​ໂທດ​ດັ່ງກ່າວ​ຈະ​ຊ່ອຍ​ເພີ່ມ​ຄວາມ​ກົດ​ດັນ​ຕໍ່​ລັດຖະບານຊີ​ເຣຍທີ່​ທ່ານ​ເວົ້າວ່າ ຍັງ​
ສືບ​ຕໍ່​ການ​ສັງຫານ​ປະຊາຊົນ​.

ພວກ​ນັກ​ການ​ທູດ​ເວົ້າວ່າ ລາຍ​ຊື່​ໂດຍ​ເຕັມ​ ກ່ຽວ​ກັບ​ເປົ້າໝາຍ​ຂອງ​ການ​ລົງ​ໂທດ ຈະ​ມີ​ການ
ເປີດ​ເຜີຍ​ໃຫ້​ຊາບ​ເວລາ​ການ​ລົງ​ໂທດ​ດັ່ງກ່າວເລີ່​ມມີ​ຜົນ​ບັງຄັບ​ໃຊ້​ໃນວັນ​ເສົາ​ນີ້. ສະຫະພາບ
ຢູ​ໂຣບ​ໄດ້ທຳ​ການ​ຕອບ​ໂຕ້​ຕໍ່​ການ​ປາບ​ປາມພວກ​ຝ່າຍ​ຄ້ານ​ຢ່າງ​ນອງ​ເລືອດ​ທີ່​ດຳ​ເນີນ​ມາ​ເປັນ
ເວລາ​ນຶ່ງ​ປີຂອງ​ທ່ານ Assad ດ້ວຍ​ການ​ລົງ​ໂທດ​ໃນ​ຂອບ​ເຂດ​ທີ່​ກວ້າງຂວາງ ຮວມທັງ​ການ​
ຫ້າມ​ບໍ່​ໃຫ້​ນໍາ​ເຂົ້ານໍ້າມັນ​ຈາກ​ປະ​ເທດຊີ​ເຣຍ ​ແລະ​ມາດ​ຕະການ​ອື່ນໆ​ຕໍ່​ທະນາຄານ​ກາງຂອງ
ປະ​ເທດ​ດັ່ງກ່າວ.

ຂະນະ​ດຽວ​ກັນ ພວກ​ນັກ​ເຄື່ອນ​ໄຫວ​ຝ່າຍ​ຄ້ານ ​ລາຍ​ງານ​ວ່າ ຄວາມ​ຮຸນ​ແຮງ​ຍັງດຳ​ເນີນ​ຢູ່​ຕໍ່​
ມາ​ໃນ​ວັນ​ສຸກ​ມື້ນີ້. ກຸ່ມ​ສັງ​ເກດ​ການ ​ສິດທິ​ມະນຸດ​ໃນ​ຊີ​ເຣຍ ທີ່​ມີ​ສຳນັກງານ​ຢູ່​ປະ​ເທດ​ອັງກິດ
ແຈ້ງ​ໃຫ້​ວີ​ໂອ​ເອຊາບ​ວ່າ ທະຫານ​ຊີ​ເຣຍ 3 ຄົນ​ທີ່​ໂຕນ​ທັບ ​ໄດ້​ຖືກ​ຂ້າ​ຕາຍ​ໃນ​ການ​ສູ້​ລົບ​ກັນ
ຢ່າງ​ດຸ​ເດືອດ​ທີ່​ເມືອງ Azaz ​ໃກ້ໆຊາຍ​ແດນ​ເທີ ກີ. ນອກ​ນັ້ນກຸ່ມ​ດັ່ງ​ກ່າວ​ຍັງ​ແຈ້ງ​ໃຫ້​ຊາບ​ວ່າ
ກຳລັງ​ຂອງ​ຊີ​ເຣຍ ພວມສືບ​ຕໍ່​ການ​ໂຈມຕີ​ຕໍ່​ເມືອງ Homs ​ໃນ​ພາກ​ກາງຂອງ​ປະ​ເທດຊຶ່ງ​ເປັນ
ເຂ​ດທີ່​ທະຫານ​ຊີ​ເຣຍໄດ້​ທຳການ​ປິດ​ລ້ອມ​ແລະ​ກາຍ​ເປັນ​ຂ່າວ​ໃຫຍ່​ເມື່ອ​ບໍ່​ດົນ​ຜ່ານ​ມານີ້.

XS
SM
MD
LG