ລັດຖະມົນຕີກະຊວງການຕ່າງປະເທດ ສະຫະລັດ ທ່ານ ເຣັກຊ ທິລເລີຊັນ ໄດ້ຕ້ອນຮັບ ລັດຖະມົນຕີການຕ່າງປະເທດ ຣັດເຊຍ ທ່ານ ເຊີິເກ ລາຟຣອຟ ທີ່ກະຊວງການຕ່າງປະ ເທດໃນວັນພຸດມື້ນີ້ ເພື່ອການເຈລະຈາທີ່ຄາດວ່າ ຈະຖືກຄອບງຳ ໂດຍຄວາມເຫັນ ທີ່
ແຕກຕ່າງ ກ່ຽວກັບ ຊີເຣຍ ແລະ ຢູເຄຣນ ຂອງທັງສອງປະເທດ.
ໃນຕອນເຊົ້າຂອງມື້ນີ້ ທ່ານ ລາຟຣອຟ ຈະພົບປະກັບປະທານາທິບໍດີ ດໍໂນລ ທຣຳ ທີ່ທຳ
ນຽບຂາວ. ເທື່ອນີ້ຈະເປັນຄັ້ງທຳອິດທີ່ທ່ານ ລາຟຣອຟ ໄດ້ມາຢຽມຢາມ ວໍຊິງຕັນ ນັບຕັ້ງ
ແຕ່ 2013 ເປັນຕົ້ນມາ.
ທ່ານ ທິລເລີຊັນ ແລະ ທ່ານ ລາຟຣອຟ ໄດ້ພົບປະກັນທີ່ນະຄອນຫຼວງ ມົສກູ ເມື່ອເດືອນ
ແລ້ວນີ້, ຖ່າມກາງຄວາມເຄັ່ງຕຶງ ກ່ຽວກັບ ການຖິ້ມລະເບີດໃສ່ຖານທັບອາກາດຊີເຣຍ
ໂດຍ ສະຫະລັດ ຫຼັງຈາກກອງກຳ ລັງ ຊີເຣຍ ຖືກກ່າວຫາວ່າໂຈມຕີພົນລະເຮືອນລວມ
ທັງເດັກນ້ອຍດ້ວຍອາວຸດເຄມີ.
ອະດີດເອກອັກຄະລັດຖະທູດ ສະຫະລັດ ທ່ານ ອາເລັກແຊນເດີ ເວີຊໂບ, ເຊິ່ງໃນຂະ
ນະນີ້ປະຕິບັດໜ້າທີ່ຢູ່ສະຖາບັນການຄົ້ນຄວ້າຂອງສະພາ ແອັດແລນຕິກ, ໄດ້ກ່າວຕໍ່ວີ
ໂອເອວ່າ ທັງສອງທ່ານຈະມີວຽກງານອັນຫຍຸ້ງຍາກທີ່ຈະຕ້ອງໄດ້ເຮັດ.
ທ່ານ ເວີຊໂບ ໄດ້ກ່າວວ່າ “ພວກເຮົາທັງສອງໄດ້ພະຍາຍາມເຮັດສິ່ງດຽວກັນໃນ
ປະເທດ ຊີເຣຍ, ເຊິ່ງແມ່ນການສິ້ນສຸດສົງຄາມກາງເມືອງ ແລະ ປ່ຽນລັດຖະບານ
ໃໝ່ທີ່ປະຊາຊົນທຸກຄົນໃນປະເທດ ຊີເຣຍ ສາມາດຮັບໄດ້. ແຕ່ແນ່ນອນ, ເມື່ອທ່ານ
ເວົ້າເຖິງລາຍລະອຽດແລ້ວ, ພວກເຮົາເບິ່ງຄືວ່າ ຈະບໍ່ສາມາດຕົກລົງຫຍັງນຳກັນ
ໄດ້.”
ທ່ານກ່າວວ່າ ບັນຫາສຳຄັນສຸດ ທີ່ຍັງແກ້ໄຂບໍ່ໄດ້ກໍມີຢູ່ວ່າ ອະນາຄົດຂອງ ຊີເຣຍ ຈະ
ລວມມີ ປະທານາທິບໍດີ ບາຊາ ອາລ-ອາຊາດ ຫຼື ບໍ່, ຜູ້ທີ່ສະຫະລັດ ແລະ ປະເທດອື່ນໆ
ອີກຫຼາຍປະເທດກ່າວວ່າ ຕ້ອງໄດ້ລາອອກຈາກຕຳແໜ່ງ, ແຕ່ ຣັດເຊຍ ໃຫ້ການສະໜັບ
ສະໜູນທ່ານ. ໃນຂະນະດຽວກັນນັ້ນ, ຣັດເຊຍ, ອີຣ່ານ ແລະ ເທີກີ ໄດ້ເຊັນຂໍ້ຕົກລົງ
ກ່ຽວກັບ “ເຂດຫຼຸດຜ່ອນຄວາມຮຸນແຮງ” ຫຼື “ເຂດປອດໄພ” ສຳລັບພົນລະເຮືອນ ຊີ
ເຣຍ ໃນການເຈລະຈາທີ່ນະຄອນຫຼວງ ແອັສຕານາ ປະເທດ ກາຊັກສຖານ ໃນສັບປະ
ດາທີ່ຜ່ານມາ. ສະຫະລັດ ພຽງແຕ່ສົ່ງທູດພິເສດໄປຮ່ວມການເຈລະຈາດັ່ງກ່າວ ໃນຖາ
ນະຜູ້ສັງເກດການເທົ່ານັ້ນ.
ທ່ານ ທິລເລີຊັນ ເບິ່ງຄືວ່າຢາກຮູ້ເພີ່ມເຕີມ ກ່ຽວກັບ ເຂດທີ່ວ່ານັ້ນຈະຖືກບັງຄັບໃຊ້
ແນວໃດ. ທ່ານ ເວີຊໂບ ໄດ້ກ່າວວ່າ ການໂອ້ລົມສົນທະນາກັນຢ່າງເປັນປະຈຳຂອງ
ທ່ານ ທິລເລີຊັນ ແລະ ທ່ານ ລາຟຣອຟ ກ່ຽວກັບ ບັນຫາທີ່ຊັບຊ້ອນນີ້ແມ່ນມີຄວາມ
ສຳຄັນຫຼາຍ.
