ພວກນັກເຄື່ອນໄຫວໃນຊີເຣຍກ່າວວ່າ ກຳລັງທະຫານລັດຖະບານໄດ້ທຳການລະດົມຍິງຮອບ
ໃໝ່ໃສ່ເມືອງ Aleppo ໃນວັນສຸກມື້ນີ້ ໃນການສືບຕໍ່ບຸກໂຈມຕີເຂດຄວບຄຸມຂອງພວກກະບົດ
ຢູ່ໃນຫົວເມືອງທີ່ໃຫຍ່ທີ່ສຸດຂອງປະເທດ.
ກຸ່ມສິ້ງຊອມສິດທິມະນຸດທີ່ມີສຳນັກງານຢູ່ອັງກິດ ລາຍງານໃຫ້ຊາບກ່ຽວກັບການຍິງປືນໃຫຍ່
ໂຈມຕີຮອບໃໝ່ ໃສ່ເມືອງ Aleppo ຊຶ່ງເປັນເມືອງຫຼວງທາງການຄ້າ ຂອງຊີເຣຍ ຕະຫຼອດທັງ
ການປະທະກັນລະຫວ່າງທະຫານລັດຖະບານແລະພວກ ກະບົດ.
ພວກນັກຂ່າວຢູ່ໃນເມືອງ Aleppo ແຈ້ງວ່າ ທະຫານລັດຖະບານສາມາດບຸກເຂົ້າຢຶດເອົາບາງ
ເຂດໃນວັນພະຫັດວານນີ້ ຂະນະທີ່ພວກກະບົດ ພາກັນຖອນກຳລັງອອກໄປ ທາງທິດເໜືອ.
ພວກກະບົດປະກາດວ່າ ຕົນຈະສືບຕໍ່ທຳການສູ້ລົບ ທັງໆທີ່ມີການຈົ່ມວ່າ ພວກເຂົາເຈົ້າບໍ່ໄດ້
ຮັບການສະໜັບສະໜຸນຢ່າງພຽງພໍໃນດ້ານອາວຸດແລະລູກປືນ.
ທ່ານ Malek al-Kurdi ຜູ້ບັນຊາການສະໜາມຂອງພວກກະບົດກ່າວຕໍ່ວີໂອເອພາສາເປີເຊຍ
ໃນບໍລິເວນຊາຍແດນເທີກີຕິດກັບຊີເຣຍວ່າ ພວກກະບົດຕ້ອງການຄວາມຊ່ອຍເຫຼືອຈາກນາໆ
ຊາດຢ່າງເຕັມທີ່.
ໃນວັນສຸກມື້ນີ້ ອັງກິດກ່າວວ່າ ຕົນຈະໃຫ້ການຊ່ອຍເຫຼືອອຸບປະກອນດ້ານສື່ສານ ແລະຢຸກຢາ
ຕ່າງໆໃນມູນຄ່າເກືອບ 8 ລ້ານໂດລາແກ່ພວກກະບົດ. ລັດຖະມົນຕີກະຊວງການຕ່າງປະເທດ
ອັງກິດ ທ່ານ William Hague ກ່າວຢູ່ໃນບົດຄວາມບົດນຶ່ງຂອງໜັງສືພິມ Times ວ່າ ເວລາ
ນີ້ຕ້ອງໄດ້ມີການສ້າງຕັ້ງຄວາມສຳພັນກັບພວກທີ່ອາດຈະປົກຄອງປະເທດຊີເຣຍໃນອະນາຄົດ.
ເງິນຈຳນວນນີ້ຈະບໍ່ຖືກ ນຳໃຊ້ໃນການຊື້ອາວຸດ.