ລິ້ງ ສຳຫລັບເຂົ້າຫາ

ຣັດເຊຍວ່າ ການແກ້ໄຂ ວິກິດການ ໃນຊີ​ເຣຍ ຄວນມາຈາກ ປະຊາຊົນ ພາຍໃນ (ສະໄລດ໌)

  • ວັນນະສອນ​ ແກ້ວດາຣາ
  • ທອງປານ ເທບວົງສາ

ຊິເຣຍ ຍັງສືບຕໍ່ທໍາລາຍບ້ານເຮືອນປະຊາຊົນຢູ່ຕໍ່ມາ

ທ່ານ Sergei Lavrov ລັດຖະມົນຕີ​ຕ່າງປະ​ເທດຣັດ​ເຊຍກ່າວ​ວ່າ ການ​ແກ້​ໄຂ​ບັນ​ວິ​ກິດ​ການ​ໃນ​ຊີ​ເຣຍນັ້ນ ຄວນຈະ​ມາ​ຈາກປະຊາຊົນ​ຊີ​ເຣຍ​ເອງ ​ແລະ​ວ່າຣັດ​ເຊຍ ຈະ​ບໍ່​ຂໍ​ສະໜັບສະໜຸນຕໍ່​ການເຂົ້າຫຍຸ້ງ​ກ່ຽວຫຼື​ແຊກ​ແຊງ​ຈາກ​ພາຍ​ນອກ ​ໃດໆ​ກໍ​ຕາມ.

ທ່ານ Lavrov ​ກ່າວໃນ​ວັນ​ພະຫັດ​ມື້​ນີ້ ກ່ອນກອງ​ປະຊຸມ​ບັ້ນ​ນຶ່ງ​ທີ່​ວາງ ​ແຜນ​ໄວ້​ໃນ​ວັນ​ເສົາ​ທີ່​ນະຄອນເຈ​ນີວາປະ​ເທດ​ສະ​ວີ​ດ​ເຊີແລນ​ດ໌ ບ່ອນ​ທີ່​ບັນດາປະ​ເທດ​ມະຫາອໍານາດ​ໂລກ​ຈະ​ປຶກສາ​ຫາລື​ກັນ​ເຖິງ​ແຜນການ​ສັນ ຕິພາບ​ຂອງ​ທູດ​ພິ​ເສດ​ນາໆ​ຊາດ ທ່ານ ​ໂກ​ຟີ ອັນນັນ ນັ້ນ.

ທ່ານ Lavrov ​ຍັງ​ມີ​ໝາຍ​ກໍານົດ​ທີ່​ຈະ​ເປັນ​ເຈົ້າພາບ​ໃນ​ການ​ເຈລະຈາຫາ ລືກັບ​ທ່ານນາງ​ຮີ​ລ​ແລຣີ ຄລິນ​ຕັນ ລັດຖະມົນຕີ​ຕ່າງປະ​ເທດ​ສະຫະລັດ​ໃນ​ວັນ​ສຸກ​ມື້ອື່ນ​ນີ້ ທີ່​ເມືອງ St. Petersburg.

ລັດຖະມົນຕີ​ຕ່າງປະ​ເທດຣັດ​ເຊຍ​ກ່າວ​ວ່າ ມັນ​ເປັນ​ການ​ຜິດພາດ ທີ່​ບໍ່​ໄດ້ ​ເຊີນ​ອິຣ່ານຊຶ່ງ​ເປັນ​ພັນທະ​ມິດ​ຂອງ​ຊີ​ເຣຍ​ເຂົ້າຮ່ວມ​ໃນ​ກອງ​ປະຊຸມ​ດັ່ງກ່າວ ທີ່​ນະຄອນ​ເຈ​ນີວາ​ນັ້ນ​ນໍາ ​ໂດຍເອີ້ນອິຣ່ານວ່າ ​ເປັນ​ຜູ້​ມີ​ອິດ​ທິພົນ​ຫຼາຍກ່ຽວ ກັບ​ສະຖານະ​ການ​ໃນ​ຊີ​ເຣຍ. ສ່ວນປະ​ເທດຊາ​ອູ​ດິ ອາ​ເຣ​ເບຍ ຜູ້​ໃຫ້ການ ສະໜັບສະໜຸນ​ທີ່​ສຳຄັນປະ​ເທດ​ນຶ່ງ ​ສຳ​ຫຼັບ​ພວກ​ຕໍ່ຕ້ານ​ປະທານາທິບໍດີ​ຊີ​ເຣຍ ທ່ານ Bashar al-Assad ນັ້ນ ກໍ​ບໍ່​ໄດ້​ຖືກ​ເຊີນ​ເຂົ້າຮ່ວມ​ກອງ​ປະຊຸມ​ດັ່ງກ່າວ​ນີ້ນຳ​ເຊັ່ນ​ກັນ.

ທ່ານ ອັນ​ນັນ ​ໄດ້​ເຊື້ອ​ເຊີນ​ສະມາຊິກຖາວອນ​ 5 ປະ​ເທດ ຂອງ​ສະພາ​ຄວາມ​ໝັ້ນຄົງ​ອົງການ​ສະ​ຫະປະຊາ​ຊາດ ພ້ອມ​ດ້ວຍ​ເທີ​ກີແລະ​ຜູ້​ຕ່າ​ງໜ້າ​ສັນນິບາດ​ອາຣັບ. ທ່ານອັນ​ນັນ ກ່າວເມື່ອ​ວັນ​ພຸດ​ວານ​ນີ້​ວ່າ ກຸ່ມ​ປະຕິບັດ​ການ​ຊີ​ເຣຍ ຈະ​ພາຍາ​ຍາມ​ເຫັນ​ພ້ອມ​ກ່ຽວ​ກັບຫຼັກການສໍາລັບ​ການ​ໂອນ​ອໍາ ນາດ​ທາງ​ການ​ເມືອງ​ທີ່​ນໍາ​ໂດຍ​ຊີ​ເຣຍນັ້ນ.

ສະພາ​ປົກຄອງແຫ່ງ​ຊາດຊີ​ເຣຍຊຶ່ງ​ເປັນ​ພັກ​ຝ່າຍ​ຄ້ານ​ນັ້ນ ​ກ່າວ​ເມື່ອ​ວັນ​ພະຫັດ​ມື້​ນີ້​ວ່າ ຕົນຈະ​ບໍ່​ຂໍຮັບ​ເອົາຂໍ້​ສະ​ເໜີ​ກ່ຽວ​ກັບ​ການ​ໂອ​ນອໍານາດ​ທາງ​ການ​ເມືອງໃດໆກໍ​ຕາມ ທີ່​ບໍ່ຮວມ​ເອົາ​ການ​ລາອອກ​ຈາກ​ຕໍາ​ແໜ່​ງຂອງ​ທ່ານ​ Assad ​ເຂົ້ານຳ.

ນອກ​ນີ້​ແລ້ວ ​ເມື່ອ​ວັນ​ພະຫັດ​ມື້​ນີ້ ລະ​ເບີດ​ໄດ້​ສົ່ງ​ຄວັນ​ດໍາ​ກຸ້ມ​ຂຶ້ນ​ໄປ​ເທິງຟ້າ ​ໃນ​ນະຄອນຫຼວງດາ​ມັສກັສ ​ໃນ​ອັນ​ທີ່​ໂທລະພາບ​ທາງ​ການ​ຂອງ​ຊີ​ເຣຍ​ເອີ້ນ​ວ່າ ​ເປັນການ​ໂຈມ​ຕີ​ຂອງພວກ​ກໍ່​ການ​ຮ້າຍ​ ຢູ່​ນອກ​ຕຶກ​ກະຊວງ​ຍຸຕິ​ທໍາ​ນັ້ນ​.

XS
SM
MD
LG