ລິ້ງ ສຳຫລັບເຂົ້າຫາ

ພວກສະໜັບສະໜຸນ ປະທານາທິບໍດີຊີເຣຍ ໂຮມຊຸມກັນ ທີ່ກຸງດາມັສກັສ

  • ສິງ ບູຣົມມະວົງ

ພວກສະໜັບສະໜຸນ ປ. Bashar al-Assad ໂຮມຊຸມນຸມກັນ ໃນກຸງ Damascus, ຊີເຣຍ, ວັນທີ 26 ຕຸລາ 2011.

ພວກ​ສະໜັບ​ສະ​ໜຸນ​ປະທານາທິບໍດີ Bashar al-Assad ​ແຫ່ງ​ຊີ​ເຣຍ ຫລາຍ​ພັນ​ຄົນ​ໄດ້​
ໂຮມ​ຊຸມນຸນກັນ​ໃນ​ກຸງ Damascus ​ໃນ​ວັນ​ພຸດມື້​ນີ້ ກ່ອນ​ກອງ​ປະຊຸມ​ສັນນິບາດ​ຊາດ​ອາ
ຫຣັບ​ໄຂ​ຂຶ້ນ​ໃນ​ນະຄອນຫລວງນັ້ນ.

ລາຍ​ງານ​ຂອງສື່​ມວນ​ຊົນ​ແຫ່ງ​ລັດ​ໄດ້​ສະ​ແດງ​ຮູບ​ພາບ​ຂອງ​ພວກທີ່​ຈົງ​ຮັກ​ພັກດີ​ຕໍ່​ປະທານາ
ທິບໍດີພາກັນ​ໂບກ​ທຸງຊາດ​ຂະ​ໝາດ​ໃຫຍ່​ຂອງຊີ​ເຣຍ ​ແລະ​ຮູບ​ພາບ​ຂອງ​ທ່ານ Assad ນັ້ນ. ​
ເຖິງ​ຢ່າງ​ໃດ​ກໍ​ດີ ພວກ​ນັກ​ເຄື່ອນ​ໄຫວ​ຝ່າຍ​ຄ້ານ​ກ່າວ​ວ່າ ພວກ​ກໍາລັງ​ຮັກສາ​ຄວາມ​ປອດ​ໄພ​
ໄດ້​ສັງຫານ​ພວກ​ພົນ​ລະ​ເຮືອນ 2 ຄົນ ​ໃນ​ເຫດຮ້າຍ​ອື່ນໆ ທີ່​ເກີດ​ຂຶ້ນ​ໃນປະ​ເທດ​ຊີເຣຍໃນ
ວັນ​ພຸດ​ມື້​ນີ້.

ການ​ເຄື່ອນ​ໄຫວ​ຕ່າງໆ​ໄດ້​ເກີດ​ຂຶ້ນ​ກ່ອນ​ການພົບ​ປະ​ຂອງ​ຄະນະ​ກໍາມາ​ທິການ​ສັນນິບາດ​ຊາດ​ອາຫຣັບກັບ​ທ່ານ Assad. ພວກ​ຄະນະ​ຜູ້​ຕາງ​ໝ້າເຫລົ່າ​ນີ້ວາງ​ແຜນ​ຈະ​ຫາລືກັນ​ເລື້ອງ​ຄວາມ​ເປັນ​ໄປ​ໄດ້​ໃນ​ການ​ລິ​ເລີ້ມ​ການ​ພົບ​ປະ​ສົນທະ​ນາ​ກັນ​ລະຫວ່າງລັດຖະບານ​ຊີ​ເຣຍ​ແລະ​ພວກ​ຜູ້​ນໍາ​ຝ່າຍ​ຄ້ານ​ນັ້ນ.

ນອກ​ນັ້ນ ກຸ່ມ​ປົກປ້ອງ​ສິດທິ​ມະນຸດ Human Rights Watch ຢາກໃຫ້​ສັນນິບາດ​ຊາດ​ອາຫຣັບຮຽກຮ້ອງ​ໃຫ້​ຊີ​ເຣຍອະນຸມັດ​ໃຫ້​ພວກ​ຕິດຕາມ ສິ້ງຊອມພົນລະ​ເຮືອນທີ່ເປັນ​ອິດ​ສະລະ​ເຂົ້າ​ໄປ​ໃນ​ປະ​ເທດ​ ເພື່ອສັງ​ເກດ​ການ​ເບິ່ງ​ການເຄື່ອນ​ໄຫວ​ຕ່າງໆ​ຂອງ​ພວກ​ກໍາລັງ​ຮັກສາ​ຄວາມ​ປອດ​ໄພ​ຂອງ​ຊີ​ເຣຍນັ້ນ. ການ​ພົບ​ປະ​ດັ່ງກ່າວ​ມີ​ຂຶ້ນ ​ໃນ​ເວລາ​ປະມານ​ນຶ່ງ​ສັບປະດາ​ເຄິ່ງ ຫລັງ​ຈາກ 22 ປະ​ເທດ​ສະມາຊິກສັນນິບາດ​ຊາດ​ອາຫຣັບ​ໄຂ​ການ​ພົບ​ປະ​ໃນພາວະ​ສຸກ​ເສິນຂຶ້ນ​ທີ່​ກຸງ​ໄຄ​ໂຣ ປະ​ເທດ​ອີ​ຈິບ​ເພື່ອ​ທໍາ​ການໂອ້​ລົມ​ສົນທະນາ​ກັນ​ເລື້ອງ​ຄວາມ​ວຸ້ນວາຍ​ທີ່​ເກີດ​ຂຶ້ນ​ໃນ​ຊີ​ເຣຍນັ້ນ. ພວກ​ລັດຖະມົນຕີ​ການ​ຕ່າງປະ​ເທດ​ເຫລົ່າ​ນີ້​ໄດ້​ຕົກລົງ​ກັນ​ເພື່ອ​ພະຍາຍາມ​ເປີດການ​ພົບ​ປະ​ຫາລື​ກັນ​ລະຫວ່າງ​ທ່ານ Assad ​ແລະ​ສະພາ​ປົກຄອງ​ແຫ່ງ​ຊາດ​ຊີ​ເຣຍຂອງ​ຝ່າຍ​ຄ້ານ ທີ່​ຫາ​ກໍ​ຈັດ​ຕັ້ງ​ຂຶ້ນ​ມາ​ໃໝ່ໆນັ້ນ.

ຂະນະ​ດຽວ​ກັນ​ພວກ​ຜູ້​ນໍາ​ຝ່າຍ​ຄ້ານ​ຊີ​ເຣຍ ​ໄດ້​ຮຽກຮ້ອງ​ໃຫ້​ມີ​ການ​ນັດ​ຢຸດ​ງານ​ທົ່ວ​ປະ​ເທດ​ໃນ​ວັນ​ພຸດ​ມື້​ນີ້. ອົງການ​ຂ່າວ Reuters ກ່າວ​ວ່າ​ພວກ​ຮ້ານ​ຄ້າ​ຮ້ານ​ຂາຍ​ສ່ວນ​ຫລາຍ​ປິດ ​ໃນ​ເມືອງ Homs ​ແລະອີກຫຼາຍໆຫົວ​ເມືອງ​ປາກົດ​ວ່າ​ ປະຕິບັດ​ຕາມ​ຄໍາ​ຮຽກຮ້ອງ​ໃຫ້​ນັດ​ຢຸດ​ງານ​ນັ້ນ.

XS
SM
MD
LG