ລິ້ງ ສຳຫລັບເຂົ້າຫາ

ຊີເຣຍ ສືບຕໍ່ປາບປາມ ພວກຄັດຄ້ານລັດຖະບານ

  • ສິງ ບູຣົມມະວົງ

ຮູບສົບຄົນຕາຍແລະຜູ້ບາດເຈັບໃນຖະໜົນສາຍນຶ່ງໃນເມືອງ Homs ຊີເຣຍ ວັນທີ 11 ສິງຫາ 2011

ພວກ​ນັກ​ເຄື່ອນ​ໄຫວ​ດ້ານ​ສິດທິ​ມະນຸດ​ກ່າວ​ວ່າ ພວກ​ກໍາລັງ​ຮັກສາ​ຄວາມ​ປອດ​ໄພ​ຂອງ​ຊີ​ເຣຍ​ໄດ້ບຸກເຂົ້າໂຈມ​ຕີເມືອງ​ນຶ່ງ​ ທາງພາກ​ຕາ ເວັນຕົກ​ສຽງ​ເໜືອ​ໃກ້ໆ​ກັບ​ຊາຍ​ແດນຂອງ​ເທີກີ.

ກຸ່ມ​ສັງ​ເກດ​ການ​ສິດທິ​ມະນຸດ​ຊີ​ເຣຍ ຫລື ​the Syrian Observatory for Human Rights ທີ່​ມີ​ຫ້ອງການ​ຕັ້ງ​ຢູ່ໃນ​ກຸງ​ລອນ​ດອນ​ກ່າວ​ວ່າ ພວກ​ທະຫານ​ໃນ​ລົດ​ຖັງ​ແລະໃນ​ລົດ​ບັສຫລາຍ​ຄັນ​ເດີນທາງ​ໄປ​ຮອດ​ໃນ​ວັນ​ພະຫັດ​ມື້​ນີ້ ​ໃນ​ເມືອງ Saraqeb ​ແລະ​ວ່າ ມີ​ສຽງ​ປືນ​ດັງ​ຂຶ້ນ​ໃນ​ເຂດ​ນັ້ນ.

ເວລາ​ນີ້​ຍັງ​ບໍ່​ທັນ​ມີລາຍ​ງານ​ແຈ້ງ​ໃຫ້​ຊາບ​ກ່ຽວ​ກັບ​ຄວາມ​ເສຍ​ຫາຍ​ ຫລື ຜູ້​ບາດ​ເຈັບ​ ລົ້ມ​ຕາຍ.

ລາຍ​ລະອຽດ​ຂອງ​ເຫດການ​ຕ່າງໆ​ທີ່​ເກີດ​ຂຶ້ນ​ໃນ​ຊີ​ເຣຍ ​ແມ່ນ​ຍາກ​ທີ່ຈະ ຢືນຢັນໄດ້ໂດຍ​ແຫ​ລ່ງ​ຂ່າວອິດ​ສະລະ ​ເພາະວ່າລັດຖະບານ​ຊີ​ເຣຍອະນຸຍາດ ​ໃຫ້​ພວກ​ນັກ​ຂ່າວ​ຕ່າງປະ​ເທດ​ພຽງ​ບໍ່​ເທົ່າ​ໃດ​ຄົນ​ເຂົ້າ​ໄປ​ໃນ​ປະ​ເທດ ແລະ​ຈໍາກັດ​ຮັດ​ແຄບ​ການ​ເຄື່ອນ​ໄຫວ​ຂອງ​ພວກ​ນັກ​ຂ່າວ​ເຫລົ່າ​ນີ້.

ຢ່າງ​ໜ້ອຍ​ປະຊາຊົນ 12 ຄົນ​ເສຍ​ຊີວິດ​ໃນ​ວັນ​ພຸດ​ວານ​ນີ້ ​ໃນ​ຂະນະ​ທີ່ລັດຖະບານ​ຊີ​ເຣຍ ຂະຫຍາຍ​ການ​ທັບ​ມ້າງ​ປາບ​ປາມ​ຂອງ​ຕົນ​ອອກອີກ ​ຕໍ່​ພວກ​ຄັດຄ້ານ​ລັດຖະບານ ຮວມທັງ
11 ຄົນ​ ຫລັງ​ຈາກ​ພວກ​ກໍາລັງ​ຮັກສາ​ຄວາມ​ປອດ​ໄພ​ເຄື່ອນ​ເຂົ້າ​ໄປ​ໃນ​ເມືອງ Homs ​ໃນ​ພາກ​ກາງຂອງ​ປະ​ເທດ​.

ສະຫະລັດ​ໄດ້ປະກາດ​ການ​ລົງ​ໂທດ​ຄັ້ງ​ໃໝ່​ຕໍ່​ຊີ​ເຣຍ ​ໂດຍ​ກ່າວ​ວ່າ ຕົນ​ຈະ​ກັກ​ຊັບ​ສິນ
ຢູ່ໃນສະຫະລັດຂອງ​ທະນາຄານ​ແລະ​ບໍລິສັດບໍລິການໂທລະສັບ​ມື​ຖື​ບໍລິສັດ​ນຶ່ງ. ທໍ​າ
ນຽບຂາວໄດ້ກ່າວ​ຢໍ້າວ່າ ຊີ​ເຣຍຈະ​ດີ​ຂຶ້ນ​ຖ້າ​ບໍ່​ມີ​ທ່ານ Assad.

ໃນ​ວັນ​ພຸດ​ວານ​ນີ້​ເຊ່ນ​ກັນ ຮອງ​ເອກ​ອັກຄະ​ລັດຖະທູດອັງກິດ​ປະ​ຈໍາ​ສະຫະ​ປະຊາ​ຊາດ​
ກ່າວ​ວ່າ ຊີ​ເຣຍກໍາລັງ​ດໍາ​ເນີນ​ການ​ໂຈມ​ຕີຕໍ່ປະຊາຊົນ​ຂອງ​ຕົນ ຢ່າງ​ໂຫດ​ຫ້ຽມ​ແລະ
ຢ່າງ​ບໍ່​ມີ​ເຫດຜົນ ​ແຕ່​ຊີ​ເຣຍປະຕິ​ເສດຕໍ່ຄໍາ​ກ່າວທີ່​ວ່າ​ນັ້ນ.

XS
SM
MD
LG