ບັນດານັກເຄຶ່ອນໄຫວຝ່າຍຄ້ານຂອງຊີເຣຍກ່າວວ່າ ກໍາລັງທະຫານຂອງ ຝ່າຍລັດຖະບານສືບຕໍ່ຈູ່ໂຈມທາງພື້ນດິນແລະທາງອາກາດຢູ່ໃນເມືອງ Aleppo ຊຶ່ງເປັນເມືອງໃຫຍ່ທີ່ສຸດຂອງຊີເຣຍ ໃນສິ່ງທີ່ສະຫະລັດເວົ້າວ່າ ຢ້ານກາຍເປັນເຫດການສັງຫານໝູ່ນັ້ນ.
ກຸ່ມສິ້ງຊອມສິດທິມະນຸດຊີເຣຍ ທີ່ມີສໍານັກງານຢູ່ອັງກິດ ເວົ້າວ່າ ກໍາລັງທະຫານຂອງປະທານາ ທິບໍດີ Bashar al-Assad ໄດ້ໃຊ້ທັງເຮືອບິນເຮລິຄອບເຕີຕິດອາວຸດນໍາ ຢູ່ໃນຫຼາຍໆຄຸ້ມຂອງເມືອງ Aleppo ເມື່ອວັນສຸກມື້ນີ້. ກຸ່ມສິ້ງຊອມຊີເຣຍຍັງລາຍງານວ່າ ມີການປະທະກັນ ແລະລະເບີດ ຫຼາຍບັ້ນໃນເຂດອື່ນໆຂອງເມືອງ Aleppon ແລະມີຄົນເສຍຊີວິດຫຼາຍຄົນ.
ນອກນີ້ແລ້ວ ກຸ່ມສິ້ງຊອມດັ່ງກ່າວຍັງໄດ້ລາຍງານການໂຈມຕີຢ່າງນອງ ເລືອດບັ້ນຕ່າງໆຂອງລັດຖະບານໃນແຂວງ Dera ແລະເວົ້າວ່າ ການປະ ທະກັນແມ່ນເກີດຂຶ້ນລະຫວ່າງກໍາລັງຂອງຝ່າຍລັດຖະບານ ແລະກໍາລັງຝ່າຍກະບົດໃນແຂວງ Idlib ແລະເມືອງ Deir Ezzor.
ເມືອງ Aleppo ຂ້ອນຂ້າງຢູ່ໃນຄວາມສະຫງົບມາຕະຫຼອດ ຈົນເຖິງວັນທີ່ 20 ເດືອນກໍລະກົດນີ້ ເວລາຝ່າຍກະບົດໄດ້ທໍາການບຸກເພື່ອຍຶດເອົາເມືອງດັ່ງກ່າວ.
ທ່ານນາງ Victoria Noland ໂຄສົກຍິງກະຊວງຕ່າງເທດ ສຫລ ກ່າວເມື່ອວັນພະຫັດວານນີ້ວ່າ ມີຂະບວນ ລົດຖັງຫຼາຍຂະບວນຢາຍກັນຢູ່ເຂດນອກເມືອງ Aleppo ທີ່ເຂົ້າໃຈວ່າຈະເລີ່ມທໍາການໂຈມຕີ ຊຶ່ງທ່ານນາງໂນລັນກ່າວອີກວ່າ ປາກົດວ່າລັດຖະບານ ຊີເຣຍກໍາລັງຕຽມການເພື່ອສັງຫານໝູ່.
ເບິ່ງສະໄລດ໌ຂອງຮູບກ່ຽວກັບເລື້ອງນີ້