ລິ້ງ ສຳຫລັບເຂົ້າຫາ

ທະຫານຊີເຣຍ ຍັງບຸກໂຈມຕີ ຝ່າຍຄ້ານ ໃນວັນຄົບຮອບ 1 ປີ ຂອງການລຸກຮືຂຶ້ນ (ເບິ່ງສະໄລດ໌)

  • ທອງປານ ເທບວົງສາ

ຊາວຊີເຣຍ ທີ່ສະໜັບສະໜຸນທ່ານອາຊັດ ໄດ້ເຕົ້າໂຮມກັນ ທີ່ນະຄອນຫຼວງດາມັສກັສ (15 ມີນາ 2012)

ວັນ​ພະຫັດ​ມື້​ນີ້ ​ເປັນ​ວັນ​ຂີດໝາຍ​ ຄົບຮອບ​ນຶ່ງ​ປີ​ ຂອງ​ການ​ລຸກ​ຮື​ຂຶ້ນ ຕໍ່ຕ້ານລັດຖະບານ
ປະທາ​ນາ​ທິບໍດີ Bashar al-Assad ຊຶ່ງກຳລັງ​ຂອງ​ທ່ານ​ບໍ່​ໄດ້​ສະ​ແດງ​ໃຫ້​ເຫັນ​ຮ່ອງຮອຍ
ໃດ​ໆທີ່​ລັດຖະບານຈະ​ຜ່ອນ​ຜັນການ​ບຸກ​ໂຈມ​ຕີ​ຂອງ​ຕົນຢູ່​ຕາມຫົວ​ເມືອງ​ຕ່າງໆ​ທີ່​ເປັນ​ສູນ
ກາງ​ສໍາຄັນ​ຂອງ​ພວກ​ຝ່າຍ​ຄ້ານ​ນັ້ນ.

ປະຊາຊົນ​ຫລາຍ​ພັນ​ຄົນ ທີ່ພາກັນ​ຖື​ທຸງ​ຊາດ​ແລະ​ຮູບ​ພາບ​ປະທານາທິບໍດີ ​ໄດ້​ເຕົ້າ​ໂຮມ​ກັນ
ຢູ່​ໃນ​ນະຄອນຫລວງ​ດາ​ມັສກັສ​ໃນ​ການ​ໂຮມ​ຊຸມນຸມສະໜັບ ສະໜຸນ​ທ່ານ​ອາ​ຊັດ.

ການສະ​ແດງ​ຄວາມ​ສະໜັບສະໜຸນ​ນີ້​ ມີຂຶ້ນຫລັງ​ຈາກ​ກໍາລັງ​ຂອງ​ຝ່າຍ​ລັດ ຖະບານ​ບຸກລຸກ
ເຂົ້າ​ໄປ​ໃນສ່ວນ​ໃຫຍ່ ຂອງ​ເມືອງ Idlib ທີ່​ຕັ້ງ​ຢູ່​ທາງ​ພາກ​ ​ເໜືອ​ຂອງ​ປະ​ເທດ ​ແລະ​ທໍາ​ການ
ບຸກກວດຄົ້ນ​ຄັ້ງ​ໃຫຍ່​ທີ່​ສຸດ​ໃນ​ຮອບ​ຫຼາຍໆ​ເດືອນ​ໃນ​ເມືອງ Daraa ທາງ​ພາກ​ໃຕ້​ຂອງ​ປະ
ເທດ ຊຶ່ງເປັນ​ເມືອງ​ທີ່​ພວກ​ກະບົດ​ເອີ້ນ​ວ່າ “ບ່ອນ​ເກີດ​ຂອງ​ການ​ປະຕິວັດ​ນັ້ນ”

ເທີ​ກີ ກ່າວ​ເມື່ອ​ວັນ​ພະຫັດ​ມື້​ນີ້​ວ່າ ພວກ​ອົບ​ພະຍົບຊີ​ເຣຍ 1,000 ຄົນ​ໄດ້ ​ຂ້າມຊາຍ​ແດນ
ເຂົ້າ​ໄປ​ໃນ​ປະ​ເທດ ພາຍໃນ​ໄລຍະ 24 ຊົ່ວ​ໂມງຜ່ນ​ມາທີ່​ເຮັດ​ໃຫ້​ຈໍານວນ​ພວກອົບ​ພະຍົບ
ຊີ​ເຣຍ​ທັງ​ໝົດ​ເພີ່ມ​ຂຶ້ນ​ເປັນ 14,000 ຄົນ​ຢູ່​ທີ່​ນັ້ນ.

ໃນ​ຂະນະ​ດຽວ​ກັນ ປະຊາ​ຄົມນາ​ນາ​ຊາດ​ ຍັງສືບ​ຕໍ່​ຜັກ​ດັນ​ໃຫ້​ຍຸຕິ​ການ​ກໍ່​ຄວາມ​ຮຸນ​ແຮງ​ຢູ່​
ໃນ​ຊີ​ເຣຍ ​ແຕ່​ເທົ່າ​ເຖິງ​ປັດຈຸບັນ​ນີ້​ກໍ​ຍັງບໍ່​ສາມາດ​ຊອກຫາ​ທາງ​ແກ້​ໄຂວິ​ກິດ​ການ​ນີ້​ໄດ້.

ທ່ານ Amin Saikal ຜູ້​ອໍານວຍ​ການ​ສູນ​ກາງ​ການ​ສຶກສາ​ອາຫຣັບ​ແລະ ອິສລາມ ທີ່​ມະຫາ
ວິທະຍາ​ໄລ​ແຫ່ງ​ຊາດ​ອອສ​ເຕຣ​ເລຍ ຫລື Australian National University ບອກ​ວີ​ໂອ​
ເອວ່າ ທ່ານ​ບໍ່​ຄາດ​ຫວັງ​ວ່າ​ຈະ​ມີ​ການແກ້ໄຂ​ບັນຫາ​ໄດ້​ ໃນ​ໄວໆ​ນີ້​ແຕ່​ຢ່າງ​ໃດ.

ກຸ່ມ 200 ອົງການຈັດຕັ້ງ​ທີ່​ບໍ່​ຂຶ້ນກັບ​ລັດຖະບານ​ ກໍາລັງ​ຮ່ວມ​ແຮງ​ກັນ​ກັບ ພວກ​ດາ​ຣາ ​ແລະ​ພວກ​ນັກ​ເຄຶ່ອນ​ໄຫວ​ໃນ​ການ​ປຸກລະດົມໃນ​ວັນ​ພະຫັດ​ມື້​ນີ້ ​ເພື່ອ​ຊຸກຍູ້​ໃຫ້​ມີ​ການເອົາ​ມາດ​ຕະການ​ທີ່ໃຫຍ່​ກວ່າ​ເກົ່າ. ການ​ລິ​ເລີ່​ມທີ່​ເອີ້ນ​ວ່າ Unite For Syria ຫລື​ທ້ອນ​ໂຮມ​ຊີ​ເຣຍ​ເປັນ​ນຶ່ງ​ດຽວ ​ໄດ້​ໃຊ້​ສື່​ສັງຄົມ Facebood, Twitter ​ແລະຢູທູບ​ເພື່ອ​ເນັ້ນ​ຍໍ້າ​ຄໍາ​ຮຽກຮ້ອງ​ໃຫ້​ມີ​ການ​ອອກ ມະຕິ​ສະພາ​ຄວາມ​ໝັ້ນຄົງ ສະໜັບສະໜຸນ​ທ່ານ​ໂຄ​ຟີ ອັນ​ນັນ ທູດ​ພິ​ເສດ​ຂອງອົງການ​ສະຫະ​ປະຊາ​ຊາດ​ແລະ​ສັນນິບາດອາຣັບ ​ແລະ​ການ​ເປີດ​ໃຫ້​ການ​ຊ່ວຍ​ເຫຼືອທາງ​ດ້ານ​ມະນຸດສະທຳ​ສາມາດເຂົ້າຫາ​ເຂົ້າ​ເຖິງທຸກທກ​ເຂດ ຢູ່​ໃນ​ຊີ​ເຣຍ​ໄດ້.

XS
SM
MD
LG