ລິ້ງ ສຳຫລັບເຂົ້າຫາ

ມີ 426 ຄົນ ແລ້ວ ທີ່ຖືກສົງໄສວ່າ ເປັນຊາວ ວີເກີ້ ທີ່ທາງການໄທ ໄດ້ຈັບໂຕໄວ້ (ວີດີໂອ ພາສາລາວ)


ຊາວ ວີເກີ້ ລວມທັງລູກເຕົ້າ ໄດ້ຖືກທາງການໄທ ກັກຂັງໄວ້ ໃນຖານະ ເຂົ້າເມືອງ ຢ່າງຜິດກົດໝາຍ.

ໃນ​ໄລຍະ​ຫລາຍໆສັບປະດາທີ່​ຜ່າ​ນມາ​ນີ້ ​ທາງ​ການ​ໄທ​ໄດ້​
ຈັບ​ ກຸ່ມຄົນ ທີ່​ສົງໄສ​ວ່າ​ ເປັນ​ຊາວ ວີ​ເກີ້ ຈາກປະ​ເທດຈີນ
ຈຳນວນຫຼາຍກວ່າ 400 ຄົນ ລວມທັງເດັກນ້ອຍ ຊຶ່ງ​ເວລາ​ນີ້
ກຳລັງ​ລໍຖ້າ​ການ​ພິຈາ​ລະນາ​ ຊະຕາກຳຂອງ​ພວກ​ເຂົາ​ເຈົ້າ. ​
ເຈົ້າໜ້າ​ທີ່​ຂອງ​ຈີນ​ ໄດ້​ເລັ່ງລັດ​ ​ໃຫ້​ລັດຖະ ບານໄທສົ່ງ​ຕົວ​
ຄົນພວກນີ້ ກັບ​ຄືນໄປ​ຈີນ​ ແຕ່ເຂົາ​ເຈົ້າປະຕິ​ເສດ​ວ່າ​ ເຂົາເຈົ້າ
​ບໍ່ແມ່ນ​ຊົນ​ເຜົ່າ ວີເກີ້ ຈາກ​ປະ​ເທດ​ຈີນ ​ແລະ​ເວົ້າ​ວ່າ ​ພວກ
​ເຂົາເຈົ້າຕ້ອງການ​ທີ່​ຈະ​ເດີນທາງ​ໄປ ປະ​ເທດ​ເທີ​ກີ. ຜູ້ສື່​ຂ່າວ
ວີ​ໂອ​ເອ Steve Herman ລາຍ​ງານ​ມາຈາກບາງກອກ
ຊຶ່ງ​ໄຊ​ຈະ​ເຣີນສຸກ ຈະ​ນຳ​ມາສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.

ຫຼາຍປະ​ເທດ ທີ່ລວມທັງ ​ຈີນ​ແລະ​ສະຫະລັດ​ ​ໄດ້ທຳ​ການປຶກສາ​ຫາລື​ທາງ​ການ​ທູດ​
ກັບເຈົ້າໜ້າທີ່ໄທ ກ່ຽວ​ກັບກຸ່ມ​ຄົນດັ່ງກ່າວ ​ທີ່​ມີ​ຈຳນວນ ທັງ​ໝົດ 426 ຄົນ ຊຶ່ງ​ກຸ່ມ​ນຶ່ງ​
ຖືກ​ກັກ​ໂຕ​ໄວ້ ຢູ່​ໃນ​ບາງກອກ ​ແລະ​ອີກ​ກຸ່ມ​ນຶ່ງ ຢູ່​ຈັງຫວັດ​ສົງ​ຂາ ທາງ​ພາກ​ໃຕ້​ຂອງ​ໄທ.

ກຸ່ມ​ທີ່​ມີ​ຈຳນວນຫຼາຍທີ່​ສຸດ ໄດ້ຖືກພົບ​ເຫັນ​ ​ໃນ​ລະຫວ່າງ​ການ​ເຂົ້າກວດ​ຄົ້ນທີ່​ພັກ​ ​
ຂອງ​ພວກ​ຄ້າ​ມະນຸດ ຢູ່​ໃນ​ສວນ​ຢາງພາລາ​ແຫ່ງ​ນຶ່ງ ​ເມື່ອ ວັນ​ທີ 12 ເດືອນ ມີນາ
ຜ່ານ​ມາ.

​ເຈົ້າໜ້າ​ທີ່ກ່າວ​ວ່າ ບໍ່​ເຄີຍ​ມີ​ມາ​ກ່ອນ ທີ່​ກຸ່ມຄົນ ​ທີ່​ສົງ​ໄສວ່າເປັນຊົນເຜົ່າວີ​ເກີ້ ຈຳນວນ
ຫຼວງຫຼາຍ​ເຊັ່ນ​ນີ້ ທີ່​ປະກົດ​ວ່າ​ເປັນ​ຄົນ​ມີ​ເງິນ​ແດ່ ​ແລະ​ມີລວມທັງເດັກນ້ອຍໆ ​ຫຼາຍ
ສິບ​ຄົນ ພ້ອມ​ກັບ​ແມ່​ທີ່​ແຕ່ງ​ກາຍ​ດ້ວຍ​ຊຸດ​ທີ່​ຄຸມ​ໂຕ​ໝົດ​ແລະ​ອັດ​ໜ້າ ຫຼື ​ເບີກ​ກ້າ ຂອງ​
ຊາວມຸສລິ​ມນັ້ນ ​ໄດ້​ຖືກ​ຈັບ​ແລະຄວບ​ຄຸມ​ຕົວໄວ້ ​ໃນ​ປະ​ເທດ​ໄທ.

​ເຈົ້າໜ້າ​ທີ່​ສືບສວນແນ່​ໃຈ​ວ່າ ພວກ​ຄົນ​ເຫລົ່າ​ນັ້ນ ສ່ວນ​ໃຫຍ່ເປັນ​ຊາວວີ​ເກີ້ ຊຶ່ງ​ເປັນ​ຊົນ​
ກຸ່ມ​ນ້ອຍ​ຢູ່​ໃນແຂວງ ຊິນ​ຈຽງ ຂອງ​ຈີນ ບ່ອນທີ່ພວກ​ເຂົາເຈົ້າ​ປະ​ເຊີນ​ກັບ ການຖືກຈຳ​
ແນ​ກ​ກີດ​ກັນ ແລະ​ການກົດ​ຂີ່​ທາງ​ສາສະໜາ.

ທາງ​ການ​ຈີນໄດ້​ປະກາດ ການ​ປາບ​ປາມ​ ຜູ້​ທີ່ຕ້ອງການ​ແບ່ງ​ແຍກ​ດິນ​ແດນ ໃນ​ເຂດ
ຊິນ​ຈຽງ ບ່ອນ​ທີ່​ໄດ້​ມີ​ການປະ​ທະ​ກັນ​ຢ່າງ​ຮຸນ​ແຮງເຖິງ​ຕາຍ​ມາ​ແລ້ວ ລະຫວ່າງ ຊາວ
ຈີນ ​ເຜົ່າວີ​ເກີ້​ ​ກັບ​ເຜົ່າ​ຮັ້ນ.

ທ່ານ Phil Robertson ຮອງ​ຜູ້ອຳນວຍການ​ປະຈຳ​ເອ​ເຊຍ​ ຂອງ​ອົງການ ສິ້ງ​ຊອມສິດ
ທິ​ມະນຸດ​ ຫຼື Human Rights Watch ​ໄດ້​ຮຽກຮ້ອງ​ໄປ​ຍັງທາງ​ການ​ໄທ ບໍ່​ໃຫ້​ສົ່ງພວກ
ຄົນ​ກຸ່ມ​ນີ້ ​ກັບ​ຄືນ​ໄປ​ຈີນຍ້ອນວ່າ ​ເຂົາ​ເຈົ້າຈະ​ສ່ຽງ​ຕໍ່​ການຖື​ກປະຫັດ​ປະຫານ. ທ່ານກ່າວ
​ວ່າ ​ມີ​ຮ່ອງ​ຮອຍ​ທີ່​ສະ​ແດງ​ວ່າ ເຈົ້າໜ້າ​ທີ່​ຈີນໄດ້​ພະຍາ​ຍາມ​ບອກລັກສະນະ​ຂອງພວກ
ຄົນ​ກຸ່ມ​ນີ້ ​ໃນ​ທາງ​ທີ່​ບໍ່​ຖືກຕ້ອງ​ກັບ​ລັກສະນະ​ຂອງ​ຊາວ​ອົບ​ພະຍົບ ​ເພື່ອ​ໃຫ້​ທາງ​ການ​ໄທ
ສົ່ງ​ພວກ​ເຂົາ​ເຈົ້າ ກັບຄືນ​ໄປຈີນ.
ພວກຜູ້ຍິງ ຊາວວີເກີ້ ລໍຖ້າ ການພິຈາລະນາ ຈາກທາງການໄທ.

ພວກຜູ້ຍິງ ຊາວວີເກີ້ ລໍຖ້າ ການພິຈາລະນາ ຈາກທາງການໄທ.


ທ່ານ Phil Robertson ເວົ້າວ່າ:
“ພວກ​ເຮົາ​ ​ໄດ້​ເຫັນ​ລາຍ​ງານ​ຂ່າວຕ່າງໆ ທີ່​ອອກ​ມາ​ຈາກ​
ເຈົ້າໜ້າ​ທີ່​ໄທ​ ທີ່​ບໍ່​ເປີດ​ເຜີຍ​ຊື່ ຊຶ່ງ​ທີ່​ຈິງ​ແລ້ວ ​ເປັນຄວາມ​
ເຫັນ​ຂອ​ງ​ທາງ​ການ​ຈີນ​ ທີ່​ວ່າ ຄົນ​ພວກ​ນີ້​ເປັນ​ຜູ້​ກໍ່​ການ​ຮ້າຍ
​ແລະ​ມີ​ເຈດ​ຕະນາ​ຮ້າຍ​ຕໍ່​ປະ​ເທດ​ໄທ ທັງໆ ທີ່​ສ່ວນ​ໃຫຍ່​ຂອງ​
ຄົນ​ກຸ່ມ​ນີ້​ ແມ່ນມີ​ແຕ່​ຜູ້​ຍິງ ແລະ​ເດັກນ້ອຍ. ຄວາມ​ເປັນ​ຫ່ວງ​
ກໍແມ່ນວ່າ ຈີນ​ກຳລັງ​ພະຍາຍາມ​ຈະ​ເຮັດ​ໃຫ້ ຄົນພວກ​ນັ້ນ​
ເປັນ​ກຸ່ມຄົນ​ບໍ່​ດີ​ ເພື່ອ​ກົດ​ດັນ​ໃຫ້​ທາງ​ການ​ໄທ​ ສົ່ງ​ພວກ​ເຂົາ​ກັບ​ຄືນໄປຈີນ.”


​ໃນ​ຂະນະ​ດຽວ​ກັນ ​ເຈົ້າໜ້າ​ທີ່​ ຈາກສະຖານທູດເທີ​ກີ ​ໃນ​ບາງກອກ ກໍ​ໄດ້​ໄປ​ໂອ້​ລົມກັບ
ຜູ້​ແທນ​ຂອງ​ຄົນພວກ​ນີ້ ​ແລະ​ລາຍ​ງານ​ຂ່າວ​ກ່າ​ວວ່າ ພວກນັກ​ການ​ທູດ​ເທີ​ກີ ສົງໄສ​ວ່າ
ພວກ​ເຂົາ​ເຈົ້າບໍ່​ໄດ້​ມາ​ຈາກ​ເທີ​ກີ ຍ້ອນວ່າ ພວກເຂົາເວົ້າພາສາເທີກີ ບໍ່ໄດ້ ດີພໍ.

ເຖິງຢ່າງໃດກໍຕາມ ກຳລັງມີການເຈລະຈາກັນ ເພື່ອໃຫ້ຄົນກຸ່ມນີ້ ບາງສ່ວນ ຫຼືທັງໝົດ
ເດີນທາງຕໍ່ໄປ ປະເທດເທີກີ ຊຶ່ງປະຊາຊົນສ່ວນຫຼາຍ ເປັນ​ຊາວມຸສລິມ ແລະກໍມີຊາວ
ວີເກີ້ ອາ​ໄສຢູ່ຢ່າງ ຫຼວງຫຼາຍ.

ທ່ານ Robertson ກ່າວວ່າ ຖ້າຫາກວ່າ ການເຈລະຈາປະສົບຄວາມລົ້ມເເຫຼວ ອົງກອນ
ທີ່ກ່ຽວຂ້ອງ ຂອງສະຫະປະຊາຊາດ ກໍຄວນເຂົ້າແຊກແຊງ.

ທ່ານ Phil Robertson ເວົ້າວ່າ:
“​ໃນ​ອີກ​ດ້ານ​ນຶ່ງ ຖ້າຫາກປະເທດເທີກີ ຕັດສິນໃຈວ່າ ກຸ່ມຄົນພວກນັ້ນ ບໍ່ແມ່ນ
ຄົນສັນຊາດເທີກີ​ແລ້ວ ມັນກໍ​ຈະກາຍ​ມາເປັນເລື້ອງທີ່ ທາງປະເທດໄທຈະຕ້ອງ
ອະນຸຍາດໃຫ້ຂ້າຫຼວງໃຫຍ່ຝ່າຍອົບພະຍົບ ຂອງ ສະຫະປະຊາຊາດ ຫຼື UNHCR
ໄດ້ພົບກັບຄົນກຸ່ມນີ້ ເພື່ອກຳນົດ ສະຖານະພາບ ​ເປັນອົບ​ພະຍົບ ຖ້າຫາກວ່າ
ພວກເຂົາເປັນຊາວວີເກີ້ ຢ່າງແທ້ຈິງ.”


ນັກເຄື່ອນໄຫວຈຳນວນນຶ່ງເຊື່ອວ່າ ໄດ້ມີຜູ້ນຳ​ທາງ ລັກລອບ​ເອົາຄົນ ກຸ່ມນີ້ເຂົ້າມາໃນ
ປະເທດໄທພ້ອມ​ກັນ ໂດຍທາງບົກ ຈາກແຂວງຢຸນໜານ ທາງພາກຕາເວັນຕົກສຽງໃຕ້
ຂອງຈີນ ຜ່ານຫວຽດນາມ ແລະ ກຳປູເຈຍ ​ໂດຍມີມາເລເຊຍ ເປັນຈຸດໝາຍປາຍທາງ
ບ່ອນຕໍ່ໄປ.

ລາຍງານຂ່າວໜັງສືພິມຫຼາຍໆ​ສະບັບ ໄດ້ລະບຸວ່າ ນະຄອນຫຼວງ ກົວລາລຳເປີ ຂອງ
ມາເລເຊຍ ເປັນຈຸດ​ເລີ້ມ​ຕົ້ນ ອອກ​ເດີນທາງ​ໄປ​ຍັງຢູໂຣບ ທີ່ນິຍົມກັນ ສຳຫຼັບພວກທີ່
ຖືໜັງສືເດີນທາງປອມ ຫຼືລັກຂະ​ໂມ​ຍມາ. ຊາວ​ອິຣ່ານສອງ​ຄົນ ທີ່​ເດີນທາງ​ໄປ​ກັບ​
ຖ້ຽວ​ບິນ 370 ຂອງ​ສາຍ​ການ ບິນ​ມາ​ເລ​ເຊຍ ທີ່​ຫາຍ​ສາບ​ສູນ​ນັ້ນ ກໍ​ພະຍາຍາມ​ຈະ
ເດີນທາງ​ໄປ​ຢູ​ໂຣບ ​ໂດຍ​ໃຊ້​ໜັງສືເດີນທາງ ຫຼືພາສປອດ ທີ່​ລັກຂະ​ໂມ​ຍມາ.

ວີດີໂອ ພາສາລາວ ກ່ຽວກັບຊາວວີເກີ້ ທີ່ຖືກທາງການໄທ ຄວບຄຸມໂຕໄວ້
ຢູ່ພາກໃຕ້ຂອງໄທ:

XS
SM
MD
LG