ລິ້ງ ສຳຫລັບເຂົ້າຫາ

ຢ່າງໜ້ອຍ ມີ 10 ຄົນ ເສຍຊີວິດຫຼັງຈາກເຮືອປະມົງ ເກົາຫຼີໃຕ້ ຫຼົ້ມ


ປະຊາຊົນຢູ່ສະຖານີລົດໄຟນະຄອນຫຼວງ ໂຊລ ເບິ່ງຂ່າວ ທາງໂທລະພາບ ສະແດງໃຫ້ເຫັນ ເຈົ້າໜ້າທີ່ຍາມຊາຍຝັ່ງ ເກົາຫຼີໃຕ້ ຄົ້ນຫາຜູ້ໂດຍສານທີ່ລອດຊີວິດ ຫຼັງຈາກເຮືອ ປະມົງ ໄດ້ຫຼົ້ມຈົມໃນນ້ຳທະເລຢູ່ນອກພາກເໜືອ ຂອງເກາະຕາກອາກາດ ເຈຈູ, 6 ກັນຍາ, 2015

ຕອນ​ນີ້​ມີ​ລາຍ​ງານ​ວ່າ 10 ຄົນ​ໄດ້​ເສຍ​ຊີວິດ ​ແລະ ຈຳນວນ​ຄົນ​ອື່ນໆທີ່​ຫາຍ​ສາບ​ສູນ ຫຼັງ​ຈາກ​ເຮືອ​ຫາ​ປາຫຼົ້ມຢູ່​ນອກ​ຊາຍ​ຝັ່ງ​ທາງ​ພາກ​ຕາ​ເວັນ​ອອກສຽງ​ໃຕ້​ຂອງ​ ​ເກົາຫຼີ​ໃຕ້​ ​ໃນຕອນ ເດິກ​ຂອງ​ວັນ​ເສົາ​ວານ​ນີ້.

​ຕຳຫຼວດ​ຍາມ​ຊາຍ​ຝັ່ງ ​ເກົາຫຼີ​ໃຕ້​ກ່າວ​ວ່າ ​ເຮືອ​ທີ່​ມີ​ນ້ຳໜັກ 9 ​ໂຕນ​ຊື່​ວ່າ Dolphin ​ໄດ້​ຖືກ​ພົບ​ເຫັນ​ໃນ​ຕອນ​ເຊົ້າ​ຂອງ​ວັນ​ອາທິດ​ມື້​ນີ້​ຢູ່​ໃກ້​ກັບ​ເກາະຕາກ​ອາກາດ ​ເຈ​ຈູ, ຫຼາຍ​ຊົ່ວໂມງຫຼັງ​ຈາກ​ທີ່​ເຮືອ​ລຳ​ດັ່ງ​ກ່າວ​ໄດ້ເດີນທາງ​ອອກ​ຈາກ​ເກາະ Chuja ​ແລະ ​ໄດ້ຂາດ​ການ​ຕິດ​ຕໍ່​ສັນຍານ​ວິ​ທະ​ຍຸ. ຕຳຫຼວດ​ຍາມ​ຊາຍ​ຝັ່ງ​ກ່າວ​ວ່າ 3 ຄົນ​ໄດ້​ຖືກ​ຊ່ວຍ​ເຫຼືອ ​ແລະ ຖືກ​ນຳໄປ​ປິ່ນປົວ​ຢູ່​ໂຮງໝໍ​ໃກ້​ຄຽງ.

ຜູ້​ລອດ​ຊີວິດ​ຄົນ​ໜຶ່ງ​ໄດ້​ກ່າວ​ຕໍ່​ອົງການ​ຂ່າວ Yonhup ວ່າ ເຮືອ​ໄດ້​ຫຼົ້ມ​ລົງ​ “​ໃນ​ທັນທີ​ທັນ​ໃດ” ຍ້ອມ​ມີ​ຄື້ນທະ​ເລພັດແຮງ. ລາວກ່າວ​ວ່າ ລາວ ​ແລະ ຜູ້​ລອດ​ຊີວິດ​ຄົນ​ໜຶ່ງ​ໄດ້​ປີນ​ຂຶ້ນ​ໄປ​ຢູ່​ເທິງເຮືອ​ທີ່​ຫຼົ້ມ​ນັ້ນ ​ແລະ ​ໄດ້​ເກາະ​ຢູ່ກັບ​ເຮືອ​ລຳ​ນັ້ນດົນ​ກວ່າ 10 ຊົ່ວ​ໂມງກ່ອນໄດ້​ຮັບ​ການ​ຊ່ວຍ​ເຫຼືອ.

ບັນຊີ​ລາຍ​ຊື່​ໄດ້​ສະ​ແດງ​ໃຫ້​ເຫັນ​ວ່າ​ມີຜູ້​ໂດຍ​ສານ 22 ຄົນ​ເດີນທາງ​ກັບ​ເຮືອ Dolphin, ​ແຕ່​ວ່າມີ​ຢ່າງ​ໜ້ອຍ 4 ຄົນ​ບໍ​ໄດ້​ເດີນທາງ​ໄປ​ນຳ​ເຮືອ​ລຳ​ນີ້​ໃນ​ເວລາ​ທີ່ເກີດ​ອຸບັດ​ເຫດ, ​ແລະ ໜຶ່ງ​ໃນ​ຜູ້​ລອດ​ຊີວິດ​ແມ່ນ​ບໍ່​ໄດ້​ຢູ່​ໃນ​ລາຍ​ຊື່​ດັ່ງກ່າວ.​ ​ເຮືອ​ທະຫານ​ ​ແລະ ​ເຮືອ​ປະຊາ​ຊົນ​ຫຼາຍ​ສິບ​ລຳ ​ແມ່ນ​ກຳລັງ​ຊອກຄົ້ນໃນ​ບໍລິ​ເວນ​ທີ່ຢູ່​ອ້ອມ​ຂ້າງ​ເພື່ອ​ຫາ​ຜູ້​ລອດຊີວິດ​ເພີ່​ມ​ເຕີມ.

ອົງການ​ຂ່າວ Yonhup ກ່າວ​ວ່າ ປະທານາ​ທິບໍດີ ​ເກົາຫຼີ​ໃຕ້ ທ່ານ​ນາງ​ ​ປັກ ​ເກິ​ນ​ເຮ ໄດ້​ສັ່ງໃຫ້​ບັນດາ​ເຈົ້າ​ໜ້າ​ທີ່ “​ເຮັດ​ທຸກ​ສິ່ງ​ທຸກ​ຢ່າງ​ທີ່​ເປັນ​ໄປ​ໄດ້​ ເພື່ອຄົ້ນ​ຫາ ​ແລະ ຊ່ວຍ​ເຫຼືອ​ຜູ້​ທີ່​ສູນຫາຍ​ຢູ່.”

XS
SM
MD
LG