ລິ້ງ ສຳຫລັບເຂົ້າຫາ

ສະພາສູງ ລັດ South Carolina ເຫັນພ້ອມ ໃຫ້ຍົກຍ້າຍທຸງ​ ສະຫະ​ພັນ​ ລັດ​ພາກ​ໃຕ້


ນາງ Bree Newsome ຈາກ North Carolina ປີນເສົາທຸງ ເພື່ອເອົາທຸງ​ສະຫະ​ພັນ​ລັດ​ພາກ​ໃຕ້ ອອກຈາກເສົາ ຢູ່ອານຸສາວະລີ ສະຫະພັນລັດ ຕໍ່ໜ້າຫໍລັດຖະສະພາ ໃນເມືອງຫຼວງ Columbia ລັດ South Carolina. 27 ມິຖຸນາ 2015.

ນາງ Bree Newsome ຈາກ North Carolina ປີນເສົາທຸງ ເພື່ອເອົາທຸງ​ສະຫະ​ພັນ​ລັດ​ພາກ​ໃຕ້ ອອກຈາກເສົາ ຢູ່ອານຸສາວະລີ ສະຫະພັນລັດ ຕໍ່ໜ້າຫໍລັດຖະສະພາ ໃນເມືອງຫຼວງ Columbia ລັດ South Carolina. 27 ມິຖຸນາ 2015.

ສະພາສູງລັດ South Carolina ​ໄດ້ລົງຄະແນນສຽງ​ໃນ​ວັນ​ຈັນ​ວານ​ນີ້​ເພື່ອ​ຍົກຍ້າຍທຸງ​ສະຫະ​ພັນ​ລັດ​ພາກ​ໃຕ້​ເຊິ່ງ​ເປັນ​ທຸງ​ສະ​ໄໝ​ສົງຄາມ​ກາງ ​ເມືອງ ທີ່​ໄດ້​ປິວ​ສະ​ບັດ​ໃນ​ຫຼາຍ​ເຂດຂອງລັດ​ຖະສະ​ພາ ມາ​ຫຼາຍ​ກວ່າ 50 ​ປີ​ແລ້ວນັ້ນ ໄປໄວ້ຢູ່ບ່ອນອື່ນ.

ຂໍ້​ສະ​ເໜີ​ຂອງ​ທັງສອງພັກ, ​ເຊິ່ງ​ໄດ້ມີຂຶ້ນ​ຫຼັງ​ຈາກ​ການ​ຄາ​ດຕະກຳ​ໝູ່​ໃນເດືອນແລ້ວ ຢູ່ໂບດຊາວ​ອາ​ເມຣິກັນຜິວ​ດຳ ​ທີ່​ເມືອງ Charleston, ​ໄດ້​ຖືກ​ຮັບຮອງ​ເອົາໂດ​ຍຄະ​ແນນ​ສຽງ 37 ຕໍ່ 3 ​ໃນ​ສະພາ​ສູງ​ທີ່​ຄວບ​ຄຸມ​ໂດຍ​ພັກ Republican.

ຕອນ​ນີ້ມັນ​ກຳລັງ​ປະ​ເຊີນ​ໜ້າກັບ​ກາ​ນພິຈາລະ​ນາ​ຂັ້ນ​ສຸດ​ທ້າຍ​ໃນ​ວັນ​ອັງ​ຄານ​ມື້​ນີ້ ກ່ອນ​ໜ້າ​ທີ່​ມັນຈະ​ຖືກສົ່ງ​ໃຫ້​ສະພາ​ຕ່ຳ​ ເພື່ອ​ພິຈາລະນາ​ຕໍ່​ໄປ.

ການ​ປຶກສາ​ຫາລື​ດ້ານ​ການ​ເມືອງ​ເກີດ​ຂຶ້ນ​ຫຼັງ​ຈາກ​ເຈົ້າ​ໜ້າ​ທີ່​ຫຼາຍຄົນ, ລວ​ມທັງ​ຜູ້​ປົກ​ຄອງ​ລັດສັງ​ກັດ​ພັກ Republican ທ່ານ ນາງ Nikki Haley, ​ທີ່​ໄດ້​ຮຽກຮ້ອງໃຫ້ມີ​ການ​ຍົກຍ້າຍ​ທຸງ​ອອກ ຫຼັງ​ຈາກ ການ​ຄາດ​ຕະກຳ​ໝູ່​ຊາວ ອ​າ​ເມຣິກັນ ເຊື້ອສາຍອາ​ຟຣິກາ ທີ່​ໂບດ​ Emanuel African Methodist Episcopal ​ໃນ​ເມືອງ Charleston.

ປະຊາ​ຊົນ​ຫຼາ​ຍຮ້ອຍຄົນ​ໄດ້​ພາກັນ​ເດີນ​ຂະ​ບວນຮຽກຮ້ອງ​ໃຫ້​ບັນ​ດາ​ຜູ້​ອອກ​ກົດໝາຍ​ຍົກ​ເລີກ​ການຕິດ​ທຸງດັ່ງ​ກ່າວ​ໃນ​ສະຖານ​ທີ່​ທາງ​ການ ໃນ​ອັນທີ່​ພວກ​ປະ​ທ້ວງ​ເອີ້ນ​ວ່າ​ ເປັນ​ສັນຍາ​ຂອງ​ການ​ແ​ບ່ງ​ແຍ​ກເຊື້ອຊາດ ຜິວພັນ ​ແລະ ຂ້າ​ທາດ. ຫຼາຍ​ຄົນ​ໃນ​ລັດ South Carolina ເຄີຍ​ໄດ້ ຮຽກຮ້ອງ​ໃຫ້​ປົດ​ທຸງ​ດັ່ງ​ກ່າວ​ອອກ​ຫຼາຍ​ປີ​ແລ້ວ. ​ແຕ່​ວ່າ ​ການ​ເດີນ​ຂະ​ບວນປະ​ທ້ວງ​ຕອບ​ໂຕ້​ຈຳນວນ​ຫຼາຍກໍ​ໄດ້​ຈັດ​ຂຶ້ນ​ເຊັ່ນ​ກັນ, ​ເຊິ່ງຮຽກຮ້ອງ​ໃຫ້ມີ​ການ​ຕິດ​ທຸງ​ໄວ້​ຢູ່​ຄື​ເກົ່າ.

ມີ​ຫຼາຍ​ຄົນຢູ່ໃນລັດແມ່ນຕື່ນຕົກໃຈ ​ທີ່​ຍັງ​ເຫັນ​ທຸງ​ສະຫະ​ພັນ​ລັດ​ພາກ​ໃຕ້ ຍັງປິວສະບັດຢູ່​ເທິງ​ເສົາ​ ຢູ່ບໍລິເວນ​ຫໍສະພາລັດ ​ໃນ​ຂະ​ນະ​ທີ່​ ທຸງຊາດ ສະຫະລັດ ​ແລະ ທຸງຂອງລັດ ທີ່​ຖືກ​ຊັກລົງ​ມາ​ເຄິ່ງ​ເສົາ​ ໄດ້ປິວສະບັດ ຢູ່ຖັດໄປ ເພື່ອ​ເປັນ​ການ​ໄວ້ອາ​ໄລ​ໃຫ້​ແກ່​ບັນດາ​ຜູ້​ຖືກ​ເຄາະ​ຮ້າຍ​ໃນ​ເຫດການ​ຍິງ​ສັງ​ຫານ​ໝູ່.

XS
SM
MD
LG