ລິ້ງ ສຳຫລັບເຂົ້າຫາ

ເກົາຫຼີໃຕ້ ສະເໜີ ເຈລະຈາ ເພື່ອເປີດ ເຂດອຸດສາຫະກຳ Kaesong ຄືນໃໝ່ (ສະໄລດ໌/ວີດີໂອ)


ພາບໃນໄລຍະໄກ ເຂດອຸດສາຫະກໍາຮ່ວມ Kaesong ທີ່ຢູ່ໃນເຂດ ຂອງເກົາຫຼີເໜືອ

ເກົາຫຼີ​ໃຕ້​ໄດ້​ສະ​ເໜີ​ໃຫ້​ມີ​ການ​ເຈລະຈາ​ກັບ​ເກົາຫຼີ​ເໜືອ ກ່ຽວ​ກັບ​ເຂດ​ອຸດສາຫະກໍາ
ຮ່ວມ ​ທີ່​ໄດ້​ຢຸດ​ຊະ​ງັກລົງ​ນັ້ນ ​ແລະ​ເຕືອນ​ວ່າ​ ຈະ​ເອົາ​ມາດ​ຕະການ​ຕອບ​ໂຕ້​ຢ່າງ​ຮຸນແຮງ​ຖ້າ​ຫາກພຽງ​ຢາງບໍ່​ເຫັນ​ພ້ອມ​ກັບ​ຄໍາ​ສະ​ເໜີ​ດັ່ງກ່າວ.

ຂໍ້​ສະ​ເໜີດັ່ງກ່າວ​ໄດ້​ມີ​ການ​ປະກາດ​ໃຫ້​ຊາບ​ໃນວັນ​ພະຫັດ​ມື້​ນີ້ ​ໂດຍໂຄສົກກະຊວງ​ທ້ອນ​ໂຮມ​ຊາດ​ຂອງ​ເກົາຫຼີ​ໃຕ້ ທ່ານ Kim Hyung-suk.

ຊຶ່ງ​ທ່ານ​ກິມ ​ເວົ້າ​ວ່າ: ​ໃນ​ວັນ​ທີ 25 ​ເມສາ​ນີ້ ລັດຖະບານ​ໄດ້​ສະ​ເໜີ​ຢ່າງ ​ເປັນ​ທາງ​ການ​ເພື່ອ​ທໍາ​ການ​ເຈລະຈາ​ກັນ​ໃນ​ລະດັບ​ທໍາ​ງານ ລະ​ຫວ່າງ​ບັນ ດາ​ເຈົ້າໜ້າ​ທີ່​ຂອງ​ເ​ກົາຫຼີ​ໃ​ຕ້ ​ແລະເກົາຫຼີເໜືອ ​ເພື່ອ​ຫາ​ທາງ​ແກ້​ໄຂ​ບັນຫາ​ດ້ານມະນຸດສະ​ທໍາ ທີ່​ກະທົບ​ຕໍ່ພວກ​ຄົນ​ງານ​ໃນເຂດ​ອຸດສາຫະກໍາຮ່ວມ Kaesong ​ແລະ​ເຮັດ​ໃຫ້​ເຂດ​ອຸດສາຫະກໍາ Kaesong ກັບ​ຄືນ​ປະກອບ​ກິດຈະ​ກໍາເປັນ​ປົກກະຕິ.



​ໂຄສົກ ກິມ ບໍ່​ໄດ້​ເວົ້າ​ວ່າ​ກຸງ​ໂຊ​ລຈະ​ປະຕິບັດ​ການ​ຢ່າງ​ໃດ ຖ້າ​ຫາກ​ວ່າ ພຽງ​ຢາງ​ບໍ່​ຕອບ​ສະໜອງ​ຕໍ່​ຄໍາ​ສະ​ເໜີ​ດັ່ງກ່າວ​ພາຍ​ໃນ​ວັນ​ເສັ້ນ​ຕາຍ​ຄື​ວັນ​ສຸກ​ຕອນ​ທ່ຽງ ຕາມ​ເວລາ​ທ້ອງ​ຖິ່ນ ​ແຕ່​ກະຊວງທ້ອນ​ໂຮມ​ຊາດ​ເກົາຫຼີ​ໃຕ້ໄດ້​ຂູ່​ວ່າ​ ຈະ​ເອົາ​ມາດຕະການ​ທີ່​ສໍາຄັນ ຖ້າ​ຫາກ​ຄໍາ​ສະ​ເໜີ​ຖືກ​ປະຕິ​ເສດ.

ການ​ປະກອບ​ກິດຈະ​ກໍາ​ຢູ່​ທີ່​ເຂດ​ອຸດສາຫະກໍາ​ Kaesong ທີ່ຢູ່​ບໍ່​ໄກ​ຈາກເຂດ​ຊາຍ​ແດນ​ໄປ​ທາງ​ກໍ້າ​ເໜືອ ​ໄດ້​ຖືກ​ໂຈະ​ໄວ້​ນັບ​ຕັ້ງ​ແຕ່​ເກົາຫຼີ​ເໜືອ​ໂກດ ​ແຄ້ນແລະ​ໄດ້ຖອນ​ພວກ​ຄົນ​ງານ​ຂອງ​ຕົນອອກ​ຈາກ​ທີ່​ນັ້ນ ພ້ອມ​ກັບ​ກີດ​ກັ້ນ ບໍ່​ໃຫ້​ຊາວ​ເກົາຫຼີ​ໃຕ້​ເຂົ້າ​ໄປ​ໃນ​ເຂດ​ອຸດສາຫະກໍາຮ່ວມ​ດັ່ງກ່າວ​ໃນຕົ້ນ​ເດືອນ ນີ້.

ຊາວ​ເກົາຫຼີ​ໃຕ້​ປະມານ 180 ຄົນ ຍັງ​ຢູ່​ທີ່​ນັ້ນ ​ໂດຍ​ຫວັງ​ວ່າການ​ຜະລິດ ຈະສາມາດ​ເລີ່​ມ ຄືນ​ອີກ ​ແຕ່ເປັນ​ທີ່​ຄາດ​ຄິດ​ກັນ​ວ່າ ພວກ​ເຂົາ​ເຈົ້າຈະ​ໝົດ ​ອາຫານ​ແລະເຄື່ອງ​ໃຊ້ອື່ນໆໃນ​ໄວໆ​ນີ້. ບາງ​ຄົນ​ເວົ້າ​ວ່າ ອາດ​ຕ້ອງ​ໄດ້​ຖອນ​ພວກ​ຄົນງານ​ອອກ​ຈາກ​ທີ່​ນັ້ນ ຖ້າ​ຫາກ​ສະພາບບໍ່​ໄປ​ບໍ່​ມາ​ດັ່ງກ່າວ​ນີ້​ບໍ່ໄດ້​ຮັບ​ການ​ແກ້​ໄຂ​ໃນ​ບໍ່​ຊ້າ​ນີ້.

(ເບິ່ງວີດີໂອ)
XS
SM
MD
LG