ລິ້ງ ສຳຫລັບເຂົ້າຫາ

9 ຄົນ ຖືກສັງຫານ ໃນການໂຈມຕີ ຢູ່ນະຄອນ Munich ປະເທດເຢຍຣະມັນ


ຊາຍໜຸ່ມ​ເຢຍຣະມັນ​ ເຊື້ອສາຍ​ອີຣ່ານອາຍຸ 18 ​ປີ​ ​ທີ່ຍິງ​ປືນ​ເຂົ້າ​ໃສ່​ຜູ້​ຄົນ​ຢູ່​ຮ້ານ​ສັບພະ​ສິນ ຄ້າທີ່​ແອ​ອັດ​ໄປ​ດ້ວຍ​ຜູ້​ຄົນ ​ໃນ​ນະຄອນ Munich ​ທີ່ເຮັດ​ໃຫ້ 9 ຄົນ​ເສຍ​ຊີວິດ​ໃນຕອນ​ແລ​ງ ວັນ​ສຸກ​ວານ​ນີ້ບໍ່​ໄດ້​ມີ​ສ່ວນ​ພົວພັນກັບ​ກຸ່ມ​ລັດ​ອິສລາມອີງຕາມ​ຄຳ​ຖະ​ແຫຼງຂອງ​ຕຳຫຼວດລັດ ບາ​ວາ​ເຣຍ ​ໃນ​ຕອນ​ເຊົ້າວັນ​ເສົາ​ມື້ນີ້.

​ພວກເຈົ້າໜ້າ​ທີ່​ກ່າວ​ໃນ​ການ​ຖະ​ແຫຼງຂ່າວ​ວ່າ ຕົນ​ໄດ້​ຄົ້ນຫ້ອງ​ແຖວ​ຂອງ​ຜູ້ກ່ຽວ ​ແລະ​ບໍ່​ໄດ້​ພົບ​ເຫັນ​ຫຍັງ​ພົວພັນ ​ກັບ​ພວກ​ກໍ່​ການ​ຮ້າຍ ​ແຕ່​ກໍ​ເຊື່ອ​ວ່າ ການ​ໂຈມ​ຕີນີ້ ເປັນ​ການ​ຍິງ​ສັງ ຫານ​ແບບ​ບໍ່​ເລືອກ​ໜ້າ​ໂດຍ​ກ່າວອ້າງເຖິງ​ປື້​ມທີ່​ຖືກ​ພົບ​ເຫັນ​ຢູ່​ໃນຫ້ອງ​ຂອງ​ຜູ້ກ່ຽວ​ທີ່​ມີ​ຊື່ວ່າ ”ການ​ຍິງ​ສັງຫານ​ຢູ່​ໃນ​ໃຈ​ຂອງ​ຂ້ອຍ ​ເປັນ​ຫຍັງ​ພວກນັກ​ສຶກສາ​ຈຶ່ງ​ຂ້າ.”

ເບິ່ງຄຳປາໄສ ຂອງ ປ. ໂອບາມາ ກ່ຽວກັບການຍິງສັງຫານ ຢູ່ເຢຍຣະມັນ

ມື​ປືນ​ຄົນ​ນີ້ ​ໄດ້​ເກີດ​ ແລະ​ເຕີບ​ໂຕມາ​ ທີ່​ເມືອງ Munich ​ແລະກໍ​ຖືກ​ກວດ​ພົບ​ ແລະກໍ​ໄດ້​ຮັບ​ການ​ປິ່ນປົວ​ກ່ຽວ​ກັບ​ໂຣກຈິດ. ພວກ​ເຈົ້າໜ້າ​ທີ່​ສືບສວນ​ກ່າວ​ວ່າ ​ເຂົາ​ເຈົ້າ​ເຊື່ອ​ວ່າ​ລາວ​ເປັນ​ຄົນ​ສະຕິ​ບໍ່​ດີ.

ຊາຍ​ໜຸ່ມ​ຄົນ​ນີ້​ໄດ້​ຂ້າ​ໂຕຕາຍ ​ໂດຍຍິງ​ປືນໃສ່​ຫົວ​ຂອງ​ລາວ​ເອງທ່າມກາງ​ທີ່ໄດ້​ສ້າງ​ຄວາມ​ຕື່ນ​ຕົກ​ໃຈ​ໃຫ້​ແກ່​ຜູ້​ຄົນນັ້ນຄື​ຄຳ​ເວົ້າຂອງ​ຜູ້​ບັນຊາ​ການ​ຕຳຫຼວດທີ່​ນະຄອນ Munich ທ່ານ Hubertus Andrea ​ໃນ​ຕອນ​ເຊົ້າ ຂອງ​ວັນ​ເສົາ​ມື້ນີ້. ຍັງ​ບໍ່​ມີ​ຂ່າວ​ຄາວ​ໃດໆ​ເທື່ອ​ວ່າ ​ແມ່ນ​ຫຍັງ​ເຮັດ​ໃຫ້​ຊາຍ​ໜຸ່ມ​ຄົນ​ນີ້ ຍິງ​ປືນ​ເຂົ້າ​ໃສ່​ຜູ້ ຄົນ.

ແຜນທີ່ບອກທີ່ຕັ້ງ ຮ້ານສັບພະສິນຄ້າ Olympia ທີ່ນະຄອນ Munich

ແຜນທີ່ບອກທີ່ຕັ້ງ ຮ້ານສັບພະສິນຄ້າ Olympia ທີ່ນະຄອນ Munich

ການ​ຍິງ​ໂຈມ​ຕີ​ຢູ່​ນະຄອນ Munich ​ໄດ້​ສັງຫານ 9 ຄົນ ບວກ​ກັບ​ມື​ປືນ​ແລະ​ມີ​ຜູ້ບາດ​ເຈັບ​ອີກ 27 ຄົນ​ 10 ຄົນ​ໃນ​ຈຳນວນ​ນັ້ນແມ່ນ​ມີ​ອາການ​ສາຫັດ ອີງ​ຕາມ​ຄຳ​ເວົ້າຂອງ​ຕຳຫຼວດ ລັດບາ​ວາ​ເຣຍ. ​ເດັກນ້ອຍ​ ແມ່ນ​ຮວມຢູ່​ໃນ​ຈຳນວນ​ພວກ​ເຄາະ​ຮ້າຍ. ນີ້​ແມ່ນ​ການ​ໂຈມ​ຕີ ​ທີ່ສຳຄັນ​ຄັ້ງທີ 3 ຕໍ່​ພົນລະ​ເຮືອນ​ຢູ່​ໃນ​ຢູ​ໂຣບຕາ​ເວັນ​ຕົກ ​ໃນ​ໄລຍະ 8 ມື້ຜ່ານ​ມາ.

​ໂຄສົກ​ກະຊວງ​ກາ​ນຕ່າງປະ​ເທດ​ອີຣ່ານທ່ານ Bahram Ghasemi ​ໄດ້​ປະນາມການ​ໂຈມ​ຕີ​ດັ່ງກ່າວຢູ່​ໃນ​ຖະ​ແຫລງ​ການໂດຍ​ເວົ້າວ່າ ທຸກ​ມື້ນີ້ ການ​ຕໍ່ສູ້​ກັບ​ພວກ​ກໍ່​ການ​ຮ້າຍ ​ໃນ​ທຸກ​ຮູບ​ແບບ​ແລະ​ທຸກ​ຫົນ​ແຫ່ງ ​ແມ່ນ​ຄວາມ​ຮຽກຮ້ອງ​ອັນ​ຮີບ​ດ່ວນ ຂອງ​ປະຊາ​ຄົມ​ໂລກ. ທ່ານ​ກ່າວ​ຕື່ມ​ວ່າ ການ​ສັງຫານ​ປະຊາຊົນ ​ທີ່ບໍ່​ມີ​ຄວາມ​ຜິດ ​ແລະ​ບໍ່​ມີ​ທາງ​ປ້ອງ​ກັນ ​ໄດ້​ກາຍ​ເປັນ​ການ​ກະທຳ​ທີ່​ໜ້າ​ອັບອາຍ ຢູ່​ໃນ​ປະຫວັດສາດ ​ຂອງ​ມະນຸດ​ຊາດ.

ນາຍົກລັດຖະມົນຕີ​ເຢຍຣະມັນ ທ່ານ​ນາງ Angela Merkel ​ໄດ້​ເປີດ​ກອງ​ປະຊຸມ​ສຸ​ກ​ເສີນ ຄະນະ​ທີ່​ປຶກສາ​ດ້ານ​ຄວາມ​ໝັ້ນຄົງ​ແຫ່ງ​ຊາດ ​ໃນ​ວັນ​ເສົາ​ມື້ນີ້ ທີ່​ນະຄອນ​ເບີ​ລິນ.

ຜູ້​ບັນຊາ​ການ​ຕຳຫຼວດ ກ່າວ​ວ່າ ຂໍ້​ຈຳກັດ​ຕ່າງໆ​ກ່ຽວ​ກັບ​ການ​ຮັກສາ​ຄວາມ​ປອດ​ໄພ​ ທີ່​ປະ​ກາດ​ໃຊ້​ ໃນຕອນ​ແລງ​ວັນ​ສຸກ​ວານ​ນີ້ ປັດຈຸບັນ​ນີ້ ໄດ້​ຖືກ​ຍົກ​ເລີກໝົດ​ແລ້ວ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG