ລິ້ງ ສຳຫລັບເຂົ້າຫາ

ກໍາປັ່ນທ່ອງທ່ຽວອີຕາລີ ທີ່ເກີດໄຟໄໝ້ ຖືກແກ່ໄປຍັງເກາະນຶ່ງ ໃກ້ໆກັບເກາະ Seychelles

  • ສິງ ບູຣົມມະວົງ

ແຜນທີ່ໝູ່ເກາະ Seychelles.
















ກຳ​ປັ່ນ​ທ່ອງ​ທ່ຽວ​ທາງ​ທະ​ເລ​ຂອງ​ອີ​ຕາ​ລີ​ລໍາ​ນຶ່ງທີ່​ຕາຍ​ແລະ​ລ່ອງ​ລອຍຢູ່​ນອກ​ຝັ່ງ​ທະ​ເລ​ຂອງ​ເກາະ Seychelles ບັດ​ນີ້​ໄດ້​ຖືກເຮືອ​ປະມົງຝຣັ່ງລໍາ​ນຶ່ງ​ແກ່ເຂົ້າໄປ​ຫາ​ເກາະ​ນຶ່ງ​ທີ່ຢູ່​ໃກ້ໆ​ກັນນັ້ນ​ແລ້ວ.

ບັນດາ​ເຈົ້າ​ໜ້າ​ທີ່​ກ່າວ​ວ່າ ມັນ​ຈະ​ໃຊ້​ເວລາ​ຈົນ​ຮອດ​ວັນ​ພຸດ​ມື້​ອື່ນ ກ່ອນທີ່ກໍາ​ປັ່ນ​ທ່ອງ​ທ່ຽວ Costa Allegra ​ເຂົ້າ​ໄປ​ຮອດ​ແຄມ​ຝັ່ງຂອງ​ເກາະ​ດັ່ງກ່າວ. ກໍາ​ປັ່ນ​ທ່ອງ​ທ່ຽວ​ອີ​ຕາ​ລີ​ລໍາ​ນີ້ ບໍ່​ສາມາດ​ແລ່ນ​ໄປມາ​ໄດ້ ແລະ​ລ່ອງ​ລອຍ​ຢູ່​ໃນ​ມະຫາ​ສະມຸດ​ອິນ​ເດຍ​ໃນ​ວັນ​ຈັນ​ວານ​ນີ້ ​ຫລັງ​ຈາກໄດ້ເກີດໄຟ​ໄໝ້​ໃນ​ຫ້ອງ​ເຄື່ອງ​ຈັກ.

ໄຟທີ່​ລຸກ​ໄໝ້​ຂຶ້ນ​ນັ້ນ ​ໄດ້​ຖືກ​ມອດຢ່າງ​ໄວ ​ແລະ​ບໍ່​ມີ​ລາຍ​ງານແຈ້ງ​ໃຫ້​ຊາບ​ກ່ຽວ​ກັບ​ຜູ້​ບາດ​ເຈັບ​ໃນ​ພວກ​ຄົນ​ໂດຍສານ​ແລະ​ລູກ​ເຮືອ​ຈໍານວນ​ຫລາຍ​ກວ່າ 1 ພັນຄົນ​ຢູ່​ໃນ​ກຳ​ປັ່ນ ​ແຕ່​ບັນດາ​ເຈົ້າ​ໜ້າ​ທີ່​ກ່າວ​ວ່າກໍາ​ປັ່ນ​ໂດຍສານ​ລໍາ​ນີ້​ ບໍ່​ມີ​ເຄື່ອງ​ປັບ​ອາກາດ ຫລືໃຊ້​ຫ້ອງ​ຄົວກິນ​ໄດ້​ໃນ​ວັນ​ອັງຄານ​ມື້​ນີ້. ​ໄດ້​ມີ​ການ​ແຈກ​ຢາຍ​ເຂົ້າ​ຈີ່ ພ້ອມ​ທັງ​ນໍ້າ​ດື່ມ​ແລະ​ໝາກ​ໄມ້​ໃຫ້​ພວກ​ຄົນໂດຍສານ ຈົນ​ຮອດ​ເວລາ​ເຮືອບິນ​ເຮ​ລີ​ຄອບ​ເຕີ​ຂົນ​ສະບຽງ​ອາຫານ​ມາ​ໃຫ້​ຕື່ມ​ອີກ.

ມີ​ພວກ​ທະຫານເຮືອຂອງ​ອີ​ຕາ​ລີ 9 ຄົນ ​ຂຶ້ນໄປ​ປະ​ຈໍາ​ຢູ່​ໃນ​ກຳ​ປັ່ນ​ເພື່ອປ້ອງ​ກັນ​ບໍ່​ໃຫ້​ພວກ​ໂຈນ​ທະ​ເລ​ທຳ​ການ​ໂຈມ​ຕີ. ​ເຂດທີ່ກໍາ​ປັ່ນລໍາ​ນີ້​ຕາຍ ​ແລະໄຫຼລ່ອງ​ລອຍຢູ່​ນັ້ນ ແມ່ນ​ເປັນ​ບ່ອນ​ທີ່​ພວກ​ໂຈນທະ​ເລ​ໂຊ​ມາ​ເລຍ​ທໍາ​ການ​ໂຈມ​ຕີ​ຕິດ​ຕໍ່​ກັນ​ມາ​ຫລາຍ​ບັ້ນໃນ​ຫວ່າງ​ບໍ່​ເທົ່າ​ໃດ​ປີຜ່ານມານີ້.

XS
SM
MD
LG