ທ່ານ Macky Sall ປະທານາທິບໍດີຄົນໃໝ່ຂອງເຊເນການໄດ້ສາບານ ໂຕເຂົ້າຮັບຕໍາແໜ່ງແລ້ວແລະເສັດສິ້ນການໂອນອໍານາດຢ່າງງຽບສະຫງົບໃນປະເທດທີ່ຕັ້ງຢູ່ໃນທະວີບອາຟຣິກາຕາເວັນຕົກແຫ່ງນີ້.
ທ່ານ Sall ໄດ້ສາບານເຂົ້າຮັບຕໍາແໜ່ງໃນວັນຈັນວານນີ້ ຊ້ອງໜ້າ ແຂກຜູ້ມີກຽດຫຼາຍພັນຄົນ ຢູ່ໃນຜາມຜ້າຕັ້ງແຫ່ງນຶ່ງທີ່ປະດັບປະດາດ້ວຍທຸງຊາດສີແດງ ເຫຼືອງແລະຂຽວຂອງເຊເນການນັ້ນ.
ໃນຖ້ອຍຖະແຫຼງທີ່ສັ້ນໆ ທ່ານ Sall ໄດ້ໃຫ້ຄໍາໝັ້ນສັນຍາທີ່ຈະຍົກສູງລັດຖະທໍາມະນູນແລະຕົວບົດກົດໝາຍແລະປົກປ້ອງເຂດນໍ້າແດນດິນອັນຄົບຖ້ວນແລະເອກະລາດຂອງເຊເນການ.
ຜູ້ນໍາຄົນໃໝ່ ໄດ້ຊະນະອະດີດປະທານາທິບໍດີ Abdoulaye Wade ໃນການເລືອກຕັ້ງຮອບຊີ້ຂາດໃນວັນທີ 25 ມີນາຜ່ານມາ ໂດຍໄດ້ຮັບຄະແນນສຽງປະມານ 65 ເປີເຊັນຂອງຈໍານວນບັດຄະແນນສຽງທັງໝົດ.
ທ່ານ Wade ໄວ 85 ປີເຮັດໃຫ້ປະຊາຊົນເຊເນການຫຼາຍຄົນເກີດໂມໂຫໂທໂສນໍາການຕັດສິນໃຈຂອງທ່ານທີ່ພະຍາຍາມຊອກຫາຊ່ອງທາງ ເພື່ອໃຫ້ໄດ້ເປັນປະທານາທິບໍດີສະໄໝທີ 3 ເຖິງແມ່ນກົດໝາຍລັດຖະທໍາມະນູນບົ່ງໄວ້ ໃຫ້ດໍາລົງຕໍາແໜ່ງໄດ້ພຽງແຕ່ 2 ສະໄໝເທົ່ານັ້ນກໍຕາມ. ຄວາມວຸ້ນວາຍທີ່ເກີດຂຶ້ນໃນລະຫວ່າງການໂຄສະນາຫາສຽງເລືອກຕັ້ງ ໄດ້ເຮັດໃຫ້ປະຊາຊົນເສຍຊີວິດໄປ 6 ຄົນ.
ການຍິນຍອມຂອງທ່ານ Wade ຊຶ່ງມີຂຶ້ນຫຼັງຈາກໄດ້ຮັບການປາໄຊໃນການເລືອກຕັ້ງຮອບຊີ້ຂາດນັ້ນໄດ້ເຮັດໃຫ້ຊື່ສຽງຂອງປະເທດແຂງແຮງຂຶ້ນໃນຖານະທີ່ເຄີຍເປັນປະເທດປະຊາທິປະໄຕທີ່ທຸ່ນທ່ຽງມານັ້ນ. ການຂາດສະຖຽນລະພາບ ຍັງຄົງເປັນບັນຫາຢູ່ໃນທະວີບອາຟຣິກາຕາເວັນຕົກບ່ອນທີ່ 4 ປະເທດເພື່ອນບ້ານຂອງເຊເນການໄດ້ປະສົບການກໍ່ລັດຖະປະຫານ ຫຼືພາຍະຍາມກໍ່ລັດຖະປະຫານຂຶ້ນມາຫຼາຍຄັ້ງໃນຮອບ 5 ປີຜ່ານມານີ້.
ປະທານາທິບໍດີ Sall ມີອາຍຸ 50 ປີ ແລະແຕ່ກ່ອນເຄີຍຮັບໃຊ້ເປັນນາຍົກລັດຖະມົນຕີມາ 3 ປີພາຍໃຕ້ທ່ານ Wade ນັ້ນ.