ຜູ້ຕາງໜ້າຈາກເກືອບຮອດ 200 ປະເທດ ໄດ້ໄປເຕົ້າໄຮມກັນ ທີ່ນະຄອນ ເດີເບິນ, ປະເທດ ອາຟຣິກາໃຕ້ ເພື່ອເຂົ້າຮ່ວມກອງປະຊຸມສະຫະປະຊາຊາດ ກ່ຽວກັບການປ່ຽນແປງຂອງດິນຟ້າອາກາດ.
ກອງປະຊຸມທີ່ຈະດໍາເນີນໄປເປັນເວລາ 12 ມື້ ໄດ້ເລີ້ມຕົ້ນຂຶ້ນໃນວັນຈັນມື້ນີ້ ແລະຈະເພັ່ງເລັງ
ໃສ່ການດໍາເນີນຄວາມພະຍາຍາມ ໃນການຕໍ່ເວລາຂອງສົນທິສັນຍາກຽວໂຕ ຫລື Kyoto
Protocol ທີ່ຈະໝົດອາຍຸໃນປີໜ້ານັ້ນ ອອກໄປຕື່ມອີກ.
ສົນທິສັນຍາກຽວໂຕ ແມ່ນບັງຄັບໃຫ້ບັນດາປະເທດອຸດສະຫະກໍາ ຫລຸດຜ່ອນການປ່ອຍອາຍພິດເຮືອນແກ້ວອອກ ໃນປະລິມານທີ່ຕັ້ງເອົາໄວ້ ໃຫ້ໄດ້ພາຍໃນປີ 2012. ຫາກແຕ່ວ່າ ຄວາມພະຍາຍາມໃນການເຈລະຈາ ເຮັດສັນຍາສະບັບໃໝ່ໄດ້ຢຸດສະງັກລົງ ຍ້ອນການຫລົ້ມແຫລວຂອງກອງປະຊຸມວ່າດ້ວຍດິນຟ້າອາກາດ ຢູ່ນະຄອນໂກເປັນເຮເກນ (Copenhagen) ເມື່ອສອງປີກ່ອນ. ມີສອງສາມປະເທດເທົ່ານັ້ນ ທີ່ເຊື່ອວ່າກອງປະຊຸດຊຸດນີ້ ຈະພາໃຫ້ມີການເຊັນສັນຍາສະບັບໃໝ່ ຂຶ້ນ. ແຕ່ຢ່າງໃດກໍຕາມ ພວກຜູ້ແທນປະເທດ
ຕ່າງໆ ພາກັນເວົ້າໃນວັນຈັນມື້ນີ້ວ່າ ພວກເຂົາເຈົ້າມີຄວາມຫວັງຫລາຍຢູ່.