ພວກສະໜັບສະໜຸນຝ່າຍຄ້ານຣັດເຊຍປະມານ 10 ພັນຄົນພາກັນເດີນຂະບວນ ໃນທີ່ພວກຜູ້ຈັດແຈງເອີ້ນວ່າ ເປັນການທົດສອບຍ່າງຫຼິ້ນຜ່ານກຸງມອສກູ ໃນວັນອາທິດວານນີ້.
ພວກທີ່ພາກັນໄປຍ່າງເດີນຂະບວນກ່າວວ່າ ພວກເຂົາເຈົ້າຢາກທົດສອບການອະນຸໂລມຜ່ອນຜັນຂອງຕໍາຫຼວດ ຕໍ່ການໂຮມຊຸມນຸມຄັ້ງໃຫຍ່ໃນນະຄອນຫຼວງຂອງຣັດເຊຍ ນຶ່ງສັບປະດາຫຼັງຈາກປະທານາທິບໍດີ Vladimir Putin ສາບານໂຕເຂົ້າຮັບຕໍາແໜ່ງສະໄໝທີສາມຂອງທ່ານ.
ຜູ້ຈັດແຈງການຍ່າງຫຼິ້ນຄົນນຶ່ງ ຄື ທ່ານ Boris Akunin ນັກຂຽນນະວະນິຍາຍ ກ່າວວ່າທ່ານຢາກເຫັນວ່າ ມັນເປັນໄປໄດ້ບໍ ສໍາລັບພົນລະເມືອງໃນກຸງມອສກູ ທີ່ຍ່າງໄດ້ຢ່າງເສລີໃນເມືອງຂອງເຂົາເຈົ້າ ຫຼືວ່າພວກເຂົາເຈົ້າຈະຕ້ອງການໄດ້ຮັບໃບອະນຸຍາດພິເສດເສຍກ່ອນ?
ໃນການສະແດງຄວາມຍັບຍັ້ງທີ່ບໍ່ສູ້ມີມາກ່ອນນັ້ນ ພວກຕໍາຫຼວດບໍ່ໄດ້ໄປມີໜ້າຫຼາຍ ໃນທີ່ໂຮມຊຸມນຸມໃນວັນອາທິດວານນີ້ ແລະກໍບໍ່ມີລາຍງານແຈ້ງໃຫ້ຊາບກ່ຽວກັບວ່າ ໄດ້ເກີດບັນຫາຫຼືມີການຈັບກຸມໃດໆ.
ຕໍາຫຼວດປາບການຈະລາຈົນຂອງຣັດເຊຍໄດ້ທໍາການທັບມ້າງຢ່າງຮຸນແຮງ ຕໍ່ພວກປະທ້ວງຕໍ່ຕ້ານທ່ານພູຕິນໃນວັນອາທິດ ທີ 6 ຜ່ານມານີ້ ຢູ່ໃກ້ໆກັບວັງ Kremlin ໂດຍໄດ້ທໍາການຈັບກຸມປະຊາຊົນຫຼາຍຮ້ອຍຄົນ.
ປະຊາຊົນຣັດເຊຍບາງຄົນກ່າວຫາວ່າ ມີການສໍ້ໂກງບັດໃນການເລືອກຕັ້ງທີ່ໄດ້ເຮັດໃຫ້ທ່ານພູຕິນ ກັບຄືນມາດໍາຣົງຕໍາແໜ່ງປະທານາທິບໍດີອີກສະໄໝນຶ່ງນັ້ນ.
ວີດີໂອລາຍງານກ່ຽວກັບການປະທ້ວງຂອງຝ່າຍຄ້ານໃນຣັດເຊຍ: