ສະພາຕໍ່າຣັດເຊຍໄດ້ອະນຸມັດໃຫ້ທ່ານ Dmitry Medvedev ເປັນນາຍົກ ລັດຖະມົນຕີຫລັງຈາກທ່ານໄດ້ຖືກແຕ່ງຕັ້ງໂດຍປະທານາທິບໍດີ Vladimir Putin ທີ່ຫາກໍສາບານຕົວເຂົ້າຮັບຕໍາແໜ່ງໃໝ່ໆນັ້ນ.
ສະພາຊິກສະພາຕໍ່າຣັດເຊຍໄດ້ອອກສຽງຮັບຮອງເອົາທ່ານເມດເວເດຟ ດ້ວຍຄະແນນ 299 ຕໍ່ 144 ສຽງ. ການສັບປ່ຽນຕໍາແໜ່ງກັນດັ່ງກ່າວກັບທ່ານພູຕິນ ຊຶ່ງກ່ອນການສາບານຕົວເຂົ້າຮັບຕໍາແໜ່ງໃນມື້ວັນຈັນຜ່ານມາ ນີ້ ແມ່ນເປັນນາຍົກລັດຖະມົນຕີເປັນເວລາສີ່ປີຂອງຣັດເຊຍນັ້ນ.
ການສັບປ່ຽນຕໍາແໜ່ງກັນນີ້ ໄດ້ສ້າງຄວາມໂກດແຄ້ນໃຫ້ແກ່ຊາວຣັດເຊຍ ຈຳນວນຫຼວງຫລາຍ ແລະເກີດມີການປະທ້ວງກັນຕໍ່ຕ້ານການກໍາອໍານາດຂອງບຸກຄົນທັງສອງ. ກ່ອນສະພາດູມາເປີດການອະພິປາຍກັນນັ້ນ ຕໍາ ຫລວດໄດ້ທັບມ້າງການປະທ້ວງຕະຫລອດໃນສວນສາທາລະນະແຫ່ງນຶ່ງ ຢູ່ໃກ້ວັງເຄຣມລິນ ແລະໄດ້ຈັບກຸມຫລາຍໆຄົນ ໂຮມທັງທ່ານ Alexei Navalny ນັກຂຽນຂ່າວລົງອິນເຕີແນັດທີ່ມີຊື່ສຽງ ແລະທ່ານ Sergei Udaltsov ຜູ້ປະສານງານຂະບວນການແນວໂຮມຝ່າຍຊ້າຍ.
ທັງສອງທ່ານນີ້ໄດ້ຖືກຂໍ້ຫາຝ່າຝືນກົດລະບຽບການຈັດຕັ້ງການເດີນຂະບວນ ປະທ້ວງແລະໂຮມຊຸມ. ທັງສອງທ່ານໄດ້ຖືກປ່ອຍຕົວພ້ອມກັບມີຄໍາສັ່ງໃຫ້ໄປຂຶ້ນສານເມື່ອວັນສຸກນີ້.
ຕໍາຫລວດປາບຈະລາຈົນຣັດເຊຍ ໄດ້ທຸບຕີພວກປະທ້ວງ ຢູ່ໃກ້ວັງເຄຣມ ລິນ ນຶ່ງມື້ກ່ອນພິທີສາບານຕົວເຂົ້າຮັບຕໍາແໜ່ງຂອງທ່ານພູຕິນນັ້ນ
ທ່ານ ມາກ ໂທນເນີ ໂຄສົກກະຊວງຕ່າງປະເທດສະຫະລັດ ກ່າວວ່າ ສະຫະລັດຮູ້ສຶກບໍ່ສະບາຍໃຈກ່ຽວກັບຮູບພາບຂອງເຈົ້າໜ້າທີ່ຕໍາຫລວດທີ່ປະຕິບັດຢ່າງບໍ່ຖືກບໍ່ຕ້ອງຕໍ່ພວກປະທ້ວງຢ່າງສັນຕິນັ້ນ.
ທ່ານນາງ ຮິລແລຣີ ຄລິນຕັນ ລັດຖະມົນຕີຕ່າງປະເທດສະຫະລັດ ໄດ້ ກ່າວຕໍ່ຕາໜ່າງໂທລະພາບ CNN ເມື່ອວັນອັງຄານວານນີ້ວ່າ ທ່ານນາງ ຢາກໃຫ້ຣັດເຊຍໃຊ້ຄວາມສາມາດບົ່ມຊ້ອນຂອງຕົນໃຫ້ໄດ້ຢ່າງເຕັມເມັດ ເຕັມໜ່ວຍ ຊຶ່ງໝາຍເຖິງການເປີດໂອກາດໃຫ້ປະຊາຊົນໄດ້ສະແດງຄວາມຄິດຄວາມເຫັນຂອງພວກເຂົາເຈົ້ານັ້ນ.