ບັນດາສະມາຊິກຂອງລັດຖະບານຊີເຣຍ ແລະ ກຸ່ມຕໍ່ຕ້ານ
ລັດຖະບານຈຳນວນນຶ່ງ ໄດ້ສິ້ນສຸດການເຈລະຈາ ໃນວັນສຸກມື້ນີ້
ຢູ່ໃນຣັດເຊຍ ຊຶ່ງປາກົດວ່າ ບໍ່ມີຮ່ອງຮອຍ ຂອງຄວາມກ້າວໜ້າ
ເລີຍ ກ່ຽວກັບວ່າ ຈະຍຸດຕິສົງຄາມການເມືອງ ທີ່ຍືດເຍື້ອມາໄດ້
ສີ່ປີແລ້ວນັ້ນ ແບບໃດ.
ນີ້ແມ່ນການເຈລະຈາສັນຕິພາບ ຮອບທີສອງ ທີ່ສ່ວນໃຫຍ່ແລ້ວ
ບໍ່ເກີດດອກອອກຜົນ ທີ່ຣັດເຊຍເປັນເຈົ້າພາບໃນປີນີ້ ຊຶ່ງເປັນ
ພັນທະມິດ ທີ່ໃກ້ຊິດກັບປະທານາທິບໍດີຊີເຣຍ ທ່ານ Bashar
al-Assad ນັ້ນ.
ຫຼັງຈາກເຈລະຈາກັນແລ້ວ ຜູ້ນຳຝ່າຍຕໍ່ຕ້ານລັດຖະບານ ທ່ານ Qadri Jamil ຜູ້ນຳກຸ່ມ
ແນວໂຮມປະຊາຊົນເພື່ອການປ່ຽນແປງແລະປົດປ່ອຍຂອງຊີເຣຍ ກ່າວເຖິງຄວາມຕ້ອງ ການໃຫ້ມີກອງປະຊຸມສັນຕິພາບນາໆຊາດຄັ້ງໃໝ່.
ຜູ້ຕາງໜ້າຝ່າຍຕໍ່ຕ້ານ ລັດຖະບານອີກທ່ານນຶ່ງ ຄື ທ່ານ Samir Aita ບໍ່ເຫັນດີດ້ວຍ
ອີງຕາມອົງການຂ່າວ Reuters ຊຶ່ງໄດ້ອ້າງຄຳເວົ້າ ຂອງທ່ານເອງ ທີ່ກ່າວວ່າ ທ່ານ Assad ໄດ້ “ພາດໂອກາດໄປແລ້ວ” ເພື່ອໃຫ້ມີການແກ້ໄຂບັນຫາທາງການເມືອງ.
ການເຈລະຈາ ທີ່ໄກ່ເກ່ຍໂດຍຣັດເຊຍ ຊຶ່ງມີບັນດາເຈົ້າໜ້າທີ່ Damascus ເຂົ້າຮ່ວມດ້ວຍ
ນັ້ນ ແຕ່ຫາກວ່າ ບໍ່ມີກຸ່ມຕໍ່ຕ້ານລັດຖະບານຊີເຣຍ ທີ່ໃຫຍ່ທີ່ສຸດ ຄື ແນວໂຮມຊີເຣຍແຫ່ງຊາດ ຫຼື Syrian National Coalition ທີ່ໜຸນຫລັງໂດຍ ປະເທດຕາເວັນຕົກ ເຂົ້າຮ່ວມນຳ.
ເບິ່ງວີດີໂອກ່ຽວຂ້ອງ:
