ລັດຖະມົນຕີການຕ່າງປະເທດຣັດເຊຍ ທ່ານ Sergei Lavrov
ກ່າວວ່າ ປະເທດຂອງທ່ານ ໄດ້ແກ້ໄຂບັນຫາຕ່າງໆ ກ່ຽວກັບ
ການສົ່ງເຄື່ອງຊ່ວຍເຫຼືອດ້ານມະນຸດສະທຳ ເຂົ້າໄປຍັງຢູເຄຣນ
ນັ້ນແລ້ວ. ແຕ່ທ່ານ ກ່າວໃນວັນຈັນມື້ນີ້ ຢູ່ Berlin ວ່າ ບໍ່ມີຄວາມ
ຄືບໜ້າໃດໆໃນການເຈລາຈາ ກັບຄູ່ຕຳແໜ່ງ ຈາກ ເຢຍຣະມັນ
ຝຣັ່ງ ແລະ ຢູເຄຣນ ເພື່ອໃຫ້ ມີການຢຸດຍິງກັນ ຫຼື ຊອກຫາການ
ແກ້ໄຂທາງການເມືອງ ເພື່ອຍຸດຕິການຕໍ່ສູ້ກັນ ໃນພາກຕາເວັນ
ອອກຂອງຢູເຄຣນ.
ອົງການຂ່າວ Interfax ລາຍງານວ່າ ຜູ້ຕ່າງໜ້າຄະນະກຳມະການ
ສາກົນຂອງສະພາກາແດງ ຈະຕິດຕາມໄປກັບຂະບວນລົດຂົນສົ່ງ
ການຊ່ວຍເຫຼືອດ້ານມະນຸດສະທຳຂອງຣັດເຊຍ ເຂົ້າໄປຍັງຢູເຄຣນ ຫຼັງຈາກ ຂະບວນລົດຜ່ານການກວດກາຂອງໜ່ວຍຍາມຊາຍແດນ ແລະສຸລະກາກອນແລ້ວ.
ຫາກແຕ່ວ່າ ລັດຖະມົນຕີການຕ່າງປະເທດຈາກຢູໂຣບທັງສາມທ່ານ ພ້ອມກັບທ່ານ Lavrov ບໍ່ສາມາດຕົງລົງກັນໄດ້ ໃນລະຫວ່າງກອງປະ ຊຸມຮ່ວມກັນ ທີ່ Berlin ເມື່ອວັນອາທິດວານນີ້ ເພື່ອທີ່ຈະຍຸດຕິການຕໍ່ສູ້ກັນ ຢູ່ໃນພາກຕາເວັນອອກຂອງຢູເຄຣນນັ້ນ. ທ່ານ Lavrov ກ່າວວ່າ ບໍ່ມີ “ຜົນໃນທາງບວກໃດໆເລີຍ” ທີ່ຈະນຳໄປສູ່ການຢຸດຍິງ ແຕ່ວ່າບັນດາລັດຖະມົນຕີການຕ່າງປະເທດ ຕົກລົງທີ່ຈະພົບປະກັນອີກ ໃນ 2-3 ມື້ ຕໍ່ໜ້າ ເພື່ອແກ້ໄຂກັບບັນຫາຕ່າງໆທັງໝົດນັ້ນ.
ລັດຖະມົນຕີການຕ່າງປະເທດເຢຍຣະມັນ ທ່ານ Frank-Walter Steinmeier ກ່າວວ່າ
ການເຈລະຈາກັນນັ້ນ ແມ່ນ “ກົງໄປກົງມາ” ແລະວ່າ ພວກທ່ານ ຈະໄປລາຍງານຕໍ່ລັດຖະ
ບານຂອງຕົນ ໃນຂະນະທີ່ພິຈາລະນາບາດກ້າວ ຕໍ່ໄປ.
ໃນວັນອາທິດວານນີ້ ທາງການຢູເຄຣນ ກ່າວວ່າ ກຳລັງຂອງຕົນ ຢຶດໄດ້ຄືນ ສະຖານີ
ຕຳຫລວດໃນເຂດເມືອງ Luhansk ຫຼັງຈາກໄດ້ມີການສູ້ລົບກັນຢ່າງດຸເດືອດ ກັບພວກ
ແບ່ງແຍກດິນແດນນິຍົມຣັດເຊຍ.