ຊາວໂຣເມເນຍ ພາກັນອອກໄປລົງປະຊາມະຕິ ໃນວັນອາທິດມື້ນີ້ ເພື່ອ ຕັດສິນຫລື ລົງຄວາມເຫັນວ່າ ຈະຟ້ອງຮ້ອງປະທານາທິບໍດີຂອງພວກເຂົາເຈົ້າຫຼືບໍ່ ໃນການຜິດຖຽງກັນອັນຂື່ນຂົມ ລະຫວ່າງປະທານາທິບໍດີ Traian Basescu ທີ່ນິຍົມຂວາກາງ ກັບນາຍົກລັດຖະມົນຕີ Victor Ponta ຄູ່ແຂ່ງ ອ່ຽງຊ້າຍກາງຂອງທ່ານ.
ຝ່າຍທີ່ຄັດຄ້ານປະທານາທິບໍດີ ໄດ້ກ່າວຫາທ່ານວ່າ ກ້າວກ່າຍອໍານາດຂອງປະທານາທິບໍດີ ແລະລະເມີດລັດຖະທໍາມະນູນຂອງປະເທດຊາດ. ຫຼັງຈາກສະພາແຫ່ງຊາດໂຣເມເນຍໄດ້ງົດອໍານາດຂອງປະທານາທິບໍດີ Basescu ໄວ້ຊົ່ວຄາວໃນຕົ້ນເດືອນນີ້ ພັກສະຫະພາບສັງຄົມເສລີ ຫຼື Social-Liberal Union ຂອງທ່ານ Ponta ກໍໄດ້ເຂົ້າກໍາອໍານາດແທນ ແລະໄດ້ທໍາການເຄຶ່ອນໄຫວໃນທັນທີ ເພື່ອປົດທ່ານ Basescu ອອກຈາກຕໍາແໜ່ງປະທານາທິບໍດີ.
ທາງທ່ານ Basescu ກ່າວວ່າ ການຟ້ອງຮ້ອງຕົນນັ້ນ ແມ່ນການແກ້ແຄ້ນກັນທາງການເມືອງຫຼາຍກວ່າ.
ສະຫະລັດໄດ້ນໍາພາກຸ່ມປະເທດຕາເວັນຕົກ ໃນການສະແດງຄວາມວິຕົກກັງວົນວ່າ ລັດຖະບານປະສົມຂອງທ່ານ Ponta ໄດ້ເຮັດໃຫ້ສິດເສລີພາບຂອງໂຣເມເນຍ ເຊຶ່ອມໂຊມລົງໄປ.
ຖ້າຫາກມີຜູ້ອອກມາລົງຄະແນນສຽງ ຕໍ່າກວ່າ 50 ເປີເຊັນແລ້ວ ການລົງປະຊາມະຕິຄັ້ງນີ້ ກໍຈະຖືກປະກາດໃຫ້ເປັນໂມຄະ ແລະທ່ານ Basescu ກໍຈະໄດ້ເຂົ້າຮັບຕໍາແໜ່ງປະທານາທິບໍດີ ຄືນສືບຕໍ່ໄປ ຈົນກວ່າຈະໝົດສະໄໝຂອງທ່ານ ໃນປີ 2014.