ລິ້ງ ສຳຫລັບເຂົ້າຫາ

ອະດີດ ລມຕ Essebsi ​ອ້າງ​ເອົາ​ໄຊຊະນະ ໃນການເລືອກຕັ້ງ ປະທານາທິບໍດີຕູນີເຊຍ


ຊາວ​ຕູ​ນີ​ເຊຍ ​ໄດ້ພາກັນ​ໄປປ່ອນ​ບັດ ​ເມື່ອ​ວັນ​ອາທິດ​ວານ​ນີ້
ໃນ​ການ​ເລືອກ​ຕັ້ງ​ເອົາ​ປະທານາທິບໍດີ ຮອບ​ຕັດສິນຊີ້​ຂາດ
ຊຶ່ງ​ເຫັນ​ວ່າ ​ເປັນ​ຂີດ​ໝາຍ​ແຫ່ງ​ການ​ເຄື່ອນ​ໄຫວ ​ສູ່​ປະຊາ
ທິປະ​ໄຕ ​ຂອງ​ປະ​ເທດ.

ຜົນ​ເລືອກ​ຕັ້ງ​ໃນ​ຂັ້ນຕົ້ນໆ ຍັງ​ບໍ່​ໄດ້​ຖືກ​ເປີດ​ເຜີຍ​ເທື່ອ ​ແຕ່​ຜູ້
​ສະມັກທ່ານ Beji Caid Essebsi ຂອງ​ພັກ​ທີ່​ຕໍ່ຕ້ານ​ອິສລາມ
​ໄດ້​ອ້າງ​ເອົາ​ໄຊຊະນະ​ຢ່າງ​ວ່ອງ​ໄວ ​ເໜືອ​ຄູ່​ແຂ່ງ​ ຄື ທ່ານ
Moncef Marzouki ຜູ້​ທີ່ດຳລົງ​ຕຳ​ແໜ່​ງປະທາ​ນາ​ທິບໍດີ
ຢູ່​ໃນ​ຂະນະ​ນີ້​. ຜູ້​ຈັດການຝ່າຍໂຄສະນາ​ຫາ​ສຽງ​ຂອງ ທ່ານ Essebsi ກ່າວ​ວ່າ ຮ່ອງຮອຍ​ຕ່າງໆໃນເບື້ອງ​ຕົ້ນ ສະ​ແດງ​ໃຫ້​ເຫັນ​ເຖິງ​ໄຊຊະນະ​ ສຳ​ຫລັບ​ອະດີດ​ລັດຖະມົນ​ຕີ ​ໄວ 88 ປີ.

ທ່ານ Beji Caid Essebsi (ກາງ) ຜູ້ນຳພັກ Nidaa Tounes ທີ່ຕໍ່ຕ້ານອິສລາມ ກ່າວຖະແຫລງຢູ່ນອກສຳນັກງານໃຫຍ່ ທີີ່ນະຄອນຫລວງຕູນິສ, ວັນທີ 21 ທັນວາ 2014.
ທ່ານ Beji Caid Essebsi (ກາງ) ຜູ້ນຳພັກ Nidaa Tounes ທີ່ຕໍ່ຕ້ານອິສລາມ ກ່າວຖະແຫລງຢູ່ນອກສຳນັກງານໃຫຍ່ ທີີ່ນະຄອນຫລວງຕູນິສ, ວັນທີ 21 ທັນວາ 2014.

ແຕ່ ຜູ້​ຈັດການຝ່າຍ​ໂຄສະນາ​ຫາ​ສຽງ​ຂອງ ທ່ານ Marzouki
​ບໍ່​ໃຫ້​ຄວາມ​ສຳຄັນ​ແກ່​ຂໍ້​ກ່າວ​ອ້າງ​ດັ່ງກ່າວ ​ແລະ ​ເວົ້າ​ວ່າ ການ
​ເລືອກ​ຕັ້ງ ​ແມ່ນ​ສູ​ສີ​ກັນຫຼາຍ ​ເກີນ​ກ່ວາທີ່​ຈະປະກາດອອກ​ມາ
​ໄດ້​ເທື່ອ.

​ການ​ປ່ອນ​ບັດໃນອາທິດ​ ວານ​ນີ້ ​ແມ່ນ​ເປັນ​ຂັ້ນສຸດ​ທ້າຍ​ຂອງ
ໄລຍະຂ້າມ​ຜ່ານ​ໄປ​ສູ່​ປະຊາທິປະ​ໄຕຂອງ​ປະ​ເທດ ນັບ​ຕັ້ງ​ແຕ່
​ໄດ້​ມີ​ການ​ປະຕິ​ວັດ ທີ່​ເອີ້ນ​ວ່າ ລະດູບານ​ໃໝ່​ຂອງ​ອາ​ຫຣັບ ຫຼື
Arab Spring ທີ່​ໄດ້​ໂຄ່ນ​ລົ້ມ​ອະດີດ​ປະທານາທິບໍດີ Zine El
Abidine Ben Ali ທີ່​ປົກຄອງ​ປະ​ເທດ ມາ​ເປັນ​ເວລາ​ດົນ​ນານນັ້ນ
ລົງຈາກ​ຕຳ​ແໜ່​ງໄປ ​ໃນ​ປີ 2011.

ຕູ​ນີ​ເ​ຊຍ​ເປັນ​ປະ​ເທດ​ທຳ​ອິດ ທີ່​ໄດ້​ໂຄ່ນ​ລົ້ມ ຜູ້ນຳ​ຂອງ​ຕົນ ໃນ​ການ​ລຸກຮື້​ຂຶ້ນ​ ​ໃນລະ​ດູ​ບານ​ໃໝ່​ຂອງ​ອາຫ​ຣັບ ​ແລະ​ໄດ້​ດົນ​ບັນດານ​ໃຈ​ໃຫ້​ປະ​ເທດ​ອື່ນ​ໆ ​ໃນ​ຂົງ​ເຂດ​ ລຸກ​ຮື​ຂຶ້ນ​ເຊັ່ນ​ກັນ.

ຜູ້ສະມັກເປັນປະທານາທິບໍດີ ຕູນີເຊຍ ທ່ານ Moncef Marzouki (ກາງ) ໄປກ່າວຄຳປາໄສ ຫຼັງຈາກຮອບທີສອງ ຂອງການເລືອກຕັ້ງ ປະທານາທິບໍດີ ໃນນະຄອນຫລວງຕູນິສ, ວັນທີ 21 ທັນວາ 2014.
ຜູ້ສະມັກເປັນປະທານາທິບໍດີ ຕູນີເຊຍ ທ່ານ Moncef Marzouki (ກາງ) ໄປກ່າວຄຳປາໄສ ຫຼັງຈາກຮອບທີສອງ ຂອງການເລືອກຕັ້ງ ປະທານາທິບໍດີ ໃນນະຄອນຫລວງຕູນິສ, ວັນທີ 21 ທັນວາ 2014.

ພຽງ​ບໍ່​ເທົ່າ​ໃດ​ຊົ່ວ​ໂມງ ກ່ອນ​ໜ້າໜ່ວຍ​ປ່ອນ​ບັດໄຂນັ້ນ
ກອງ​ທະຫານ​ທີ່​ຍາມ​ບັດ​ລົງ​ຄະ​ແນນ ຢູ່​ໃນເຂດ Kairouan
ທາງ​ພາກ​ກາງຂອງປະ​ເທດ ​ໄດ້​ຖືກ​ໂຈມ​ຕີ​ໂດຍ​ພວກ​ຜູ້ຊາຍ
ຕິດ​ອາວຸດ. ບັນດາ​ເຈົ້າໜ້າ​ທີ່ ກະຊວງ​ປ້ອງ​ກັນ​ປະ​ເທດ
ກ່າວ​ວ່າ​ ພວກທະຫານ​ໄດ້​ຍິງ​ຜູ້​ຮ້າຍ​ຄົນ​ໜຶ່ງ​ຕາຍ ​ແລະ ​
ຈັບ​ກຸມ​ຜູ້​ຮ້າຍ​ອີກ 3 ຄົນ​ໄວ້​ໄດ້.

XS
SM
MD
LG