ປະຊາຊົນຢູ່ໃນລັດ Adamawa ທາງພາກຕາເວັນອອກສຽງເໜືອ
ຂອງໄນເຈີເຣຍໄດ້ອົບພະຍົບໜີອອກ ຈາກບ້ານເຮືອນຂອງ
ພວກເຂົາເຈົ້າ ໄປສູ່ເມືອງຫຼວງຂອງລັດ ໃນສັບປະດານີ້ ຫຼັງຈາກ
ທີ່ໄດ້ມີການໂຈມຕີເຖິງຕາຍຂອງກຸ່ມກະບົດ Boko Haram
ທີ່ໄດ້ເປັນຂີດໝາຍຂອງການກໍ່ຄວາມຮຸນແຮງຄັ້ງຫຼ້າສຸດ ທີ່ຍັງຜົນ
ໃຫ້ມີຫຼາຍພັນຄົນເສຍຊີວິດ.
ລະຫວ່າງວັນສຸກ ຫາວັນຈັນແລ້ວນີ້ ພວກກະບົດທີ່ມີອາວຸດຄົບມື
ໄດ້ໂຈມຕີ ຢ່າງນ້ອຍ 5 ໝູ່ບ້ານ ໃນເຂດ Michika. ພວກຊາວ
ບ້ານໄດ້ກ່າວວ່າ ພວກກະບົດໄດ້ເຂົ້າມາໃນໝູ່ບ້ານດ້ວຍລົດຈັກ
ແລະລົດໃຫຍ່ ແລ້ວເລີ້ມທຳການຈູດເຜົາໝູ່ບ້ານ.
ທີ່ບ້ານ Liddle ຊຶ່ງເປັນປະຊາຄົມນ້ອຍໆ ທີ່ມີປະມານ 150 ຄົນ ຊຶ່ງສ່ວນຫຼາຍນັ້ນຍັງນອນ
ລັບໄຫຼຢູ່ ຕອນທີ່ພວກກະບົດເຂົ້າໄປໃນໝູ່ບ້ານ ໃນເຊົ້າວັນອາທິດຜ່ານມານີ້. ນາງ Margret Yohannaໄດ້ກ່າວວ່າ ລາວກຳລັງນອນຢູ່ໃນຕຽງ ຕອນທີ່ນາງໄດ້ຍິນສຽງປືນ ນັດທຳອິດດັ່ງຂຶ້ນນັ້ນ.
ກຸ່ມກະບົດ Boko Haram ຄວບຄຸມຫຼາຍໆເຂດໃຫຍ່ໆ ຂອງລັດ Borno ທີ່ມີຊາຍແດນ
ຕິດກັບ ລັດ Adamawa ໄປທາງທິດເໜືອນັ້ນ.
ພວກທີ່ໄດ້ລົບໜີຈາກຄວາມຮຸນແຮງໃນລັດ Adamawa ພາກັນໜີໄປທາງໃຕ້ ສູ່ເມືອງ Yola ທີ່ຢູ່ປະມານ 230 ກິໂລເເມັດ ບ່ອນທີ່ພວກເຂົາເຈົ້າພາກັນໄປຮອດໄປເຖິງ ໃນເຊົ້າວັນອັງຄານຜ່ານມານີ້ ເພື່ອເຂົ້າສູນເຕົ້າໂຮມກັບພວກທີ່ໄດ້ໜີອອກມາກ່ອນໜ້ານີ້. ພວກເຂົາເຈົ້າກ່າວວ່າ ມີຢ່າງນ້ອຍ 100 ຄົນ ໄດ້ພາກັນໜີອອກມາຈາກ ຢ່າງນ້ອຍຈາກ 4 ປະຊາຄົມ, ແຕ່ບໍ່ຮູ້ວ່າ ມີຫຼາຍປານໃດທີ່ພວກກະບົດສັງຫານ. ມີປະຊາຊົນໃນລັດ Adamawa ໄດ້ກ່າວວ່າ ມີສິບກວ່າຄົນຖືກສັງຫານ.
ໄນເຈີເຣຍກຳລັງ ຈະມີການເລືອກຕັ້ງປະທານາທິບໍດີ ແລະສະມາຊິກລັດຖະສະພາ ໃນວັນທີ 14 ກຸມພາ ທີ່ຈະມາເຖິງນີ້.
ກຸ່ມກະບົດ Boko Haram ໄດ້ກາຍມາເປັນບັນຫາສຳຄັນ ໃນຂະນະທີ່ປະທານາທິບໍດີ Goodluck Jonathan ໄດ້ພະຍາຍາມທີ່ຈະໃຫ້ໄດ້ຮັບໄຊຊະນະການໃນການເລືອກຕັ້ງຕື່ມອີກສະໄໝນຶ່ງ ໂດຍທີ່ມີອະດີດຜູ້ປົກຄອງທະຫານ ທ່ານ Mohammadu Buhari ທີ່ຈະເປັນຄູ່ແຂງທີ່ທ້ານທາຍທ່ານ.
ທ່ານ Jonathan ໄດ້ປະກາດສະພາວະສຸກເສີນໃນລັດ Borno, Adamawa ແລະ Yobe ໃນເດືອນພຶດສະພາ 2013 ຊຶ່ງເປັນພາກສ່ວນນຶ່ງຂອງຄວາມພະຍາຍາມເພື່ອຕໍ່ສູ້ກັບພວກກະບົດທີ່ກ່າວມານັ້ນ ແຕ່ວ່າ ການໂຈມຕີຂອງພວກເຂົາ ຍັງດຳເນີນຢູ່ຕໍ່ມາ.
ຄວາມຮຸນແຮງທີ່ວ່ານີ້ ໄດ້ສ້າງຄວາມບໍ່ແນ່ໃຈກ່ຽວກັບວ່າ ປະຊາຊົນໃນພາກຕາເວັນອອກສຽງເໜືອຂອງປະເທດ ຈະສາມາດໄປລົງຄະແນນສຽງໄດ້ຫຼືບໍ່ ໃນວັນເລືອກຕັ້ງທົ່ວປະເທດ.
