ທະຫານອາເມຣິກັນຄົນນຶ່ງເສຍຊີວິດແລະອີກ 2 ຄົນ ບາດເຈັບ
ໃນລະຫວ່າງການສູ້ລົບກັນຢູ່ທີ່ແຂວງ Helmand ຂອງອັຟກາ
ນິສຖານ ໃນວັນອັງຄານວານນີ້ ບ່ອນທີ່ນັກລົບຂອງພວກຕາລີ
ບານພວມຂະຫຍາຍການປະຕິບັດງານຂອງຕົນ.
ເຈົ້າໜ້າທີ່ກະຊວງປ້ອງກັນປະເທດຂອງສະຫະລັດກ່າວວ່າ ກຳ
ລັງພິເສດຂອງສະຫະລັດ ໄດ້ມີສ່ວນພົວພັນ ກັບການປະຕິບັດ
ງານທີ່ມີຂຶ້ນໃກ້ກັບເມືອງ Marja ຊຶ່ງເປັນເຂດທີ່ເກີດການສູ້ລົບ
ກັນຢ່າງດຸເດືອດເມື່ອສອງສາມອາທິດທີ່ຜ່ານມານີ້.
ທ່ານ Peter Cook ໂຄສົກຂອງທຳນຽບຫ້າແຈກ່າວຕໍ່ພວກນັກຂ່າວໃນວັນອັງຄານວານ
ນີ້ວ່າ ທະຫານອາເມຣິກັນຖືກໂຈມຕີຂະນະທີ່ພວມໃຫ້ການຝຶກແອບ ໃຫ້ຄຳແນະນຳແລະ
ໃຫ້ການຊ່ວຍເຫລືອການປະຕິບັດງານ ແກ່ກຳລັງພິເສດຂອງຄູ່ຮ່ວມງານຝ່າຍອັຟການິສ
ຖານ.
ມີການສົ່ງເຮືອບິນເຮຣີຄອບເຕີ້ລຳນຶ່ງໄປຊ່ວຍຍົກຍ້າຍພວກທີ່ໄດ້ຮັບບາດເຈັບອອກມາ
ແຕ່ບໍ່ສາມາດບິນຂຶ້ນ ຈາກເມືອງ Marja ເວລາໃບພັດຂອງເຮຣີຄອບເຕີ້ ຕຳໃສ່ກຳແພງ
ອີງຕາມຄຳເວົ້າຂອງເຈົ້າໜ້າທີ່ອະວຸໂສດ້ານປ້ອງກັນປະເທດທີ່ຂໍສະຫງວນຊື່ທ່ານນຶ່ງທີ່
ໄດ້ກ່າວຕໍ່ວີໂອເອ. ທ່ານກ່າວຕື່ມວ່າ ເຮືອບິນເຮຣີຄອບເຕີ້ລຳນັ້ນ ຍັງຢູ່ທີ່ເມືອງ Marja
ເພື່ອຈະຂົນເອົາພວກທີ່ໄດ້ຮັບບາດເຈັບອອກໄປ.
ເຈົ້າໜ້າທີ່ອີກທ່ານນຶ່ງ ພັນເອກ Michael Lawhorn ແຫ່ງກອງທັບສະຫະລັດກ່າວຕໍ່ວີ
ໂອເອວ່າ ເຮືອບິນເຮຣີຄອບເຕີ້ລຳນີ້ບໍ່ໄດ້ຖືກຍິງຕົກ.
ການຍິງປືນຄົກໂຈມຕີຢ່າງໜັກໜ່ວງເປັນອຸບປະສັກຂັດຂວາງບໍ່ໃຫ້ເຮືອບິນເຮຣີຄອບເຕີ້
ໂຮງໝໍລົງຈອດ ອີງຕາມເຈົ້າໜ້າທີ່ອະວຸໂສດ້ານປ້ອງກັນປະເທດ.
ເມືອງ Marja ແມ່ນນຶ່ງໃນຫລາຍໆເຂດ ຂອງແຂວງ Helmand ໄດ້ຕົກຢູ່ພາຍໃຕ້ການ
ຄວບຄຸມຂອງພວກຕາລີບານ. ພວກກະບົດຕາລີບານໄດ້ທຳການກົດດັນ ຕໍ່ແຂວງ Hel-
mand ທີ່ຕັ້ງຢູ່ໃນເຂດປູກຝິ່ນທາງພາກໃຕ້ຂອງອັຟການິສຖານມາໄດ້ຫຼາຍເດືອນແລ້ວ.
