ພວກນັກລົບສະໜັບສະໜູນລັດຖະບານ ເຢເມັນ ທີ່ຖືກຂັບໄລ່ອອກຈາກປະເທດນັ້ນ ໄດ້ຍຶດເອົາແຂວງ Shabwa ທາງພາກໃຕ້ຂອງ
ປະເທດ ຈາກພວກກະບົດ Houthi ທີ່ໄດ້ຮັບການໜູນຫຼັງໂດຍ ອິຣ່ານ ນັ້ນ.
ເຈົ້າໜ້າທີ່ທະຫານ ເຢເມັນ ໄດ້ກ່າວໃນວັນເສົາວານນີ້ວ່າ ພວກກະບົດໄດ້ຖອນໂຕອອກຈາກແຂວງ Shabwa ຫຼັງຈາກໄດ້ສົ່ງຄືນການຄວບຄຸມເມືອງຫຼວງ Atab ຂອງແຂວງ. ບໍ່ມີລາຍງານໃຫ້ຮູ້ເຖິງການບາດເຈັບແລະເສຍຊິວິດໃນເຫດການດັ່ງກ່າວ.
ປະເທດ ຊາອຸດິ ອາເຣເບຍ, ເຊິ່ງໄດ້ນຳໜ້າການໂຈມຕີທາງອາກາດຂອງ Arab ຕໍ່ພວກ Houthi, ໄດ້ໂຈມຕີຢ່າງໜັກໃສ່ທາງພາກໃຕ້ຂອງ ເຢເມັນ ເພື່ອຊ່ວຍເຫຼືອຮັກລົບສະໜັບ ສະໜູນລັດຖະບານ.
ກຳລັງຕໍ່ຕ້ານພວກກະບົດ ໄດ້ທຳການຍຶດທີ່ສຳຄັນຕໍ່ພວກ Houthi ເມື່ອບໍ່ດົນມານີ້, ລວມ ທັງ ການຍຶດຄືນທ່າເຮືອໃຫຍ່ Aden, ເຊິ່ງເປັນທາງເຂົ້າສຳລັບການຊ່ວຍເຫຼືອດ້ານມະນຸດ ສະທຳທີ່ມີຄວາມຕ້ອງການຢ່າງໃຫຽ່ສຳລັບ ເຢເມັນ.
ແຕ່ວ່າພວກ Houthi ຍັງຄົງຄວບຄຸມເມືອງຫຼວງ Sana'a ແລະ ຄວບຄຸມ ຫຼື ມີການປະກົດຕົວທາງທະຫານຈຳນວນຫຼາຍໃນສ່ວນໃຫຍ່ຢູ່ທາງພາກເໜືອ.
ການຕໍ່ສູ້ເທິງພື້ນດິນ ແລະ ການໂຈມຕີທາງອາກາດນຳໜ້າໂດຍ ຊາອຸດິ ອາເຣເບຍ ໄດ້ເຮັດໃຫ້ຫຼາຍກວ່າ 4000 ຄົນເສຍຊີວິດ ແລະ ໄດ້ນຳໄປສູ່ໄພພິບັດດ້ານມະນຸດສະທຳໃນ ເຢເມັນ. ອົງການ ສະຫະປະຊາຊາດ ກ່າວວ່າ 80 ເປີເຊັນຂອງປະຊາກອນແມ່ນມີຄວາມຕ້ອງການອາຫານຢ່າງຮ້າຍແຮງ ແລະ ການຊ່ວຍເຫຼືອດ້ານການແພດ.
ຄວາມພະຍາມດ້ານການທູດເພື່ອນຳຄວາມສັນຕິພາບມາສູ່ ເຢເມັນ ແລະ ກອບກູ້ລັດຖະບານຂອງປະທານາທິບໍດີ Abdu Rabu Mansour Hadi ຈົນຮອດປະຈຸບັນນີ້ ໄດ້ລົ້ມແຫຼວ.