ລິ້ງ ສຳຫລັບເຂົ້າຫາ

ຟີລິບປິນມີ ອຸດສາຫະກຳບໍລິການ ຕອບຄຳຖາມລູກຄ້າ ໃຫ້ບໍລິສັດຢູ່ຕ່າງປະເທດ ທີ່ໃຫຍ່ທີ່ສຸດ


ເວລາ​ຄົນ​ອາ​ເມຣິກັນ ​ໂທ​ລະ​ສັບ​ໄປ​ຮ້ອງ​ຂໍ ການ​ຊ່ອຍ​ເຫຼືອຈາກ
​ສູນ​ສະໜັບສະໜຸນ​ລູກ​ຄ້າ ຂອງ​ບໍລິສັດ​ໃດ​ນຶ່ງ ​ແມ່ນມີ​ໂອກາດ​ດີ
​ທີ່​ສຸດ ທີ່​ວ່າ​ພະນັກງານ​ຕອບ​ໂທລະສັບນັ້ນ ​ແມ່ນ​ຄົນ​ຟີ​ລິບ​ປິນ.
ຟີ​ລິບ​ປິນ ມີອຸດສາຫະກຳຮັບຈ້າງໃຫ້ການ​ບໍລິການ ຫລື​ຕອບ​ຄຳ​
ຖາມ​ແກ້​ໄຂ​ບັນຫາດ້ານທຸລະ​ກິດ ​ໃຫ້​ບໍລິສັດຕ່າງປະ​ເທດ​ ທີ່ໃຫຍ່
​ທີ່​ສຸດ​ໃນໂລກ ຊຶ່ງໃຊ້​ພະນັກງານ​ ປະມານ 1 ລ້ານ​ຄົນ ທີ່​ຊ່ອຍ
​ພວກ​ລູກ​ຄ້າຈາກ​ເຂດຕ່າງໆ ທີ່​ຫ່າງ​ໄກ ມີ​ເວລາ​ແຕກ​ຕ່າງ​ກັນ​
ຫຼາຍ​. ​ແຕ່​ກໍ່​ແມ່ນ​ວ່າ ອຸດສາຫະກຳ​ນີ້ ຈະ​ບໍ່​ມີ​ບັນຫາ. ນັກ​ຂ່າວ​ວີ
​ໂອ​ເອ Jason Strother ມີ​ລາຍ​ງານ​ມາ​ຈາກ​ມາ​ນີລາ ຊຶ່ງ​ສິງຈະ
​ນຳ​ມາສະ​ເໜີ​ທ່ານ.

ນາງ Angeline Rodriguez ​ເລີ້ມອອກ​ຈາກ​ບ້ານໄປເຮັດ​ວຽກ​ ​ໃນເວລາ​ພວກ​ພະນັກງານ
ຟີ​ລິບ​ປິນຄົນ​ອື່ນໆສ່ວນ​ຫຼາຍ ​ເລີກວຽກ​ປະຈຳ​ວັນ​ຂອງ​ເຂົາ​ເຈົ້າ​ແລ້ວ.

ນາງ Rodriguez ​ໄວ 30 ປີ ​ເຮັດ​ວຽກຍາມ​ມື້​ຄືນ ທີ່​ສູນ​ຮັບ​ໂທລະສັບ​ບໍລິການ​ລູກ​ຄ້າ​ແຫ່ງ​ນຶ່ງ.

ນາງ Angeline Rodriguez ​ເວົ້າ​ວ່າ “ດຽວ​ນີ້ ​ແມ່ນ 8 ໂມງ​ຍັງ 15​ ແລ້ວ ຂ້ອຍ​ກຳລັງ​
ຈະ​ໄປ​ຫ້ອງການຢູ່​ສູນ C3 ບ່ອນ​ທີ່ຂ້ອຍ​ເຮັດ​ວຽກ. ຕາມ​ທຳ​ມະ​ດາ​ແລ້ວ​ ຂ້ອຍ​ເລີກ​
ການ ​ເວລາ 6 ໂມງ​ເຄິ່ງຕອນ​ເຊົ້າ.”

ນາງ Rodriguez ​ເປັນ​ນາງພະຍາບານ​ທີ່​ໄດ້​ຮັບ​ການ​ເຝິກ​ອົບຮົມ​ມາ ​ແຕ່​ກ່າວ​ວ່າ ນາງ​ໄດ້​ເງິນ​ຫລາຍ​ກວ່າ ຈາ​ກການ​ເຮັດ​ວຽກ​ຢູ່ສູນ C3 ຊຶ່ງ​ເປັນ​ສູນຮັບໂທລະ​ສັບ​ບໍລິການ​ລູກ​ຄ້າ ​ໃຫ້​ບໍລິສັດ​ຕ່າງປະ​ເທດຫຼາຍໆ​ບໍລິສັດ ​ແລະ​ວ່າ​ຈ້າງ​ພະນັກງານ​ຟີ​ລິບ​ປິນ 2300 ຄົນ.

ນາງ​ຮັບໂທລະສັບ​ ​ຫຼາຍ​ເຖິງ 200 ​ເທື່ອ​ ໃນ​ລະຫວ່າງ​ຊົ່ວ​ໂມງ​ເຮັດ​ວຽກ​ໃນ​ຍາມ​ມື້​ຄືນ​ຂອງ​ນາງ ຕອບຄຳ​ຖາມ​ໃຫ້​ພວກ​ລູກ​ຄ້າ​ທີ່​ເປັນ​ຊາວ ອາ​ເມຣິກັນ ​ໂດຍ​ສ່ວນ​ໃຫຍ່ ຊຶ່ງ​ມີ​ຄຳ​ຖາມ​ຕ່າງໆ​ກ່ຽວ​ກັບ​ລົດ​ທີ່​ພວກ​ເຂົາ​ເຈົ້າ​ເຊົ່າ​ຂີ່​.

ທ່ານ Andy Sarakinis ຊຶ່ງ​ເປັນ​ນາຍ​ຂອງ​ນາງ ​ໄດ້​ເຮັດ​ວຽກ​ຢູ່​ໃນ ພາກສ່ວນທຸລະກິດ​ຮັບ
ບໍລິການ​ລູກ​ຄ້າ​ທາງ​ໂທລະສັບ​ໃຫ້​ບໍລິສັດ​ຢູ່ຕ່າງ ປະ​ເທດ​ ມາ​ໄດ້ 16 ປີ​ແລ້ວ ຢູ່ໃນ​ຟີ​ລິບປິນ. ທ່ານ Sarakinis ກ່າວ​ວ່າ ​ຍ້ອນ​ຟີ​ລິບ​ປິນ​ມີ​ສາຍ​ພົວພັນ​ທີ່​ໝັ້ນ​ແກ່ນ​ກັບ​ສະຫະລັດ ພວກ
ພະນັກງານຢູ່​ທີ່​ນີ້ ຈຶ່ງຕິດ​ຕໍ່​ພົວພັນ​ກັບ​ພວກ​ລູກ​ຄ້າ​ອະ​ເມຣິກັນ ​ໄດ້ງ່າຍ ກວ່າພວກພະນັກ​
ງານ​ມາ​ຈາກ​ປະ​ເທດ​ອື່ນໆ ​ເຊັ່ນອິນ​ເດຍ ຊຶ່ງ​ເປັນ​ສູນ​ກາງຮັບ​ບໍລິການ​ລູກ​ຄ້າ​ທາງ​ໂທລະສັບ
ທີ່​ໃຫຍ່​ທີ່​ສຸດຂອງ​ໂລກ ມາ​ກ່ອນ​ນັ້ນ.

ທ່ານ Andy Sarakinis ກ່າວ​ວ່າ “ຄວາມ​ງ່າຍ​ໃນ​ການ​ດຳ​ເນີນ​ທຸລະ​ກິດ​ຢູ່​ທີ່​ນີ້ ແມ່ນ
​ເປັນ​ທີ່​ໜ້າ​ອັດສະຈັນ​ທີ່​ສຸດ. ຄວາມ​ສາມາດໃນ​ການ​ວ່າ​ຈ້າງ​ບຸກຄົນ​ຜູ້​ນຶ່ງ ​ໃຫ້ເຂົ້າ​ມາ
​ເຮັດ​ວຽກ​ໃນ​ມື້ທຳ​ອິດ​ໄດ້​ໂລດ ​ແລະ​ມີ​ຄວາມ​ຊຳນິ​ຊຳນານ​ໃນ​ການ​ໂອ້​ລົມ​ສົນທະນາ​
ທາງ​ໂທລະສັບ​ກັບ​ຜູ້ຊົມ​ໃຊ້​ສິນຄ້າ​ ຫລື​ການ​ບໍລິການ ​ຈາກ​ສະຫະລັດ​ໄດ້ ບໍ່​ວ່າ​ຈະ
​ເປັນ​ບໍລິສັດ​ການບິນ ບໍລິສັດ​ເຊົ່າ​ລົດ ບໍລິ​ສັດ​ສະໜອງ​ການ​ຮັກສາ​ສຸຂະພາບ ການ
ໂທລະ​ຄົມມະນາຄົມ​ ຫລືພະ​ແນກ​ບໍລິການການ​ເງິນ ​ແລະ​ພະນັກງານ​ຜູ້​ນັ້ນສາມາດ
​ເວົ້າ​ໂທລະສັບແລະ​ໂອ້​ລົມຢ່າງສະຫຼຽວ​ສະຫຼາດ ​ແລະ​ແກ້​ໄຂ​ຄວາມ​ເປັນ​ຫ່ວງ​ຕ່າງໆ
ຂອງ​ພວກ​ລູກ​ຄ້າ​ໄດ້​ນັ້ນ ແມ່ນ​ວິ​ເສດ​ຫລາຍ ກັບໜ່ວຍ​ແຮງ​ງານ​ຟີ​ລິບ​ປິນ.”

ປັດຈຸ​ບັນ​ນີ້ ພວກ​ສູນ​ກາງຮັບ​ບໍລິການຕອບ​ຄຳ​ຖາມ​ແລະແກ້​ໄຂບັນຫາ​ໃຫ້ ລູກ​ຄ້າ​ຈາກ​ຕ່າງ
ປະ​ເທດ​ທາງ​ໂທລະສັບ​ແບບ​ນີ້ ​ ​ແມ່ນຮວມ​ຢູ່ໃນ​ບັນດາ​ແຫ​ລ່ງລາຍ​ຮັບ​ທີ່ໃຫຍ່​ທີ່​ສຸດ​ຂອງ​
ຟີ​ລິບ​ປິນ ທີ່​ຊ່ວຍ​ເຮັດ​ໃຫ້​ເສດຖະກິດ​ຂອງ​ປະ​ເທດ​ເຕີບ​ໂຕ​ຂຶ້ນ​ໄວ​ທີ່​ສຸດ​ ໃນ​ເຂດ​ເອ​ເຊຍ​ຕາ
ເວັນ​ອອກສຽງ​ໃຕ້.

​ແຕ່ເຖິງ​ແມ່ນ​ຈະ​ມີ​ລາງວັນ​ທາງ​ດ້ານ​ການ​ເງິນ​ຫຼວງຫຼາຍ ດັ່ງທີ່​ກ່າວ​ມາ​ນັ້ນ​ກໍ​ຕາມ​ ກໍ​ຍັງມີ
ຄວາມ​ເປັນ​ຫ່ວງ​ກັງວົນວ່າ ການ​ອຶດ​ຫຼັບ​ອຶດ​ນອນຫຼື​ນອນ​ບໍ່ພໍ ​ແລະ​ຊົ່ວ​ໂມງເຮັດ​ວຽກທີ່​ບໍ່​ຖືກ
ກັບ​ເວລາ​ນອນປົກກະຕິ​ນັ້ນ ຈະ​ນຳພາໄປ​ສູ່​ການ​ດຳ​ເນີນວິຖີຊີວິດ​ ທີ່​ພາ​ໃຫ້​ສຸຂະພາບ​ບໍ່​ດີ.
ນັກ​ຄົ້ນຄວ້າ Victoria Fritz ກ່າວ​ວ່າ ພວກ​ຄົນງານ​ທີ່​ເຮັດ​ວຽກຮັບ​ໂທລະສັບຢູ່ສູນ​ບໍລິການ​
ລູກ​ຄ້າ​ ໃນ​ຍາມ​ມື້​ຄືນ​ໃນ​ທົ່ວ​ໂລກ ປະ​ເຊີນ​ກັບ​ການ​ສ່ຽງ​ໄພ​ເຫຼົ່າ​ນີ້.

ທ່ານ​ນາງ Victoria Fritz ​ກ່າວ​ວ່າ “ຂ້າພະ​ເຈົ້າ​ໄດ້​ພົບ​ເຫັນ​ວ່າ ພວກ​ພະນັກງານ​
ສູນ​ບໍລິການ​ແບບ​ນີ້ ທີ່​ເຮັດ​ວຽກ​ໃນ​ຍາມ​ມື້​ຄືນ ກາ​ກົດ​ວ່າ​ມີ​ອາການ​ບໍ່​ສະບາຍໃນ
ຮ່າງກາຍ​ ເປັນ​ພະຍາດ​ຕ່າງໆ​ນາໆ ໃນ​ໄລຍະ​ ​ເວລາຫຼາຍໆ​ປີທີ່​ເຂົາ​ເຈົ້າ​ເຮັດ​
ວຽກ​ນັ້ນ ຊຶ່ງ​ມີ​ຮວມທັງ ​ພະຍາດ​ກ່ຽວ​ກັບ​ເສັ້ນ​ເລືອດ​ໃນ​ຫົວ​ໃຈ ໂຣກ​ເບົາຫວານ
ປະ​ເພດ 2 ​ແລະ​ໂຣກອ້ວນ​ພີ.”

ພວກ​ພະນັກງານ​ທີ່​ສູນ C3 ສາມາດ​ເຂົ້າ​ເປັນ​ສະມາຊິກ​ຂອງ​ສູນອອກກຳລັງ​ກາຍ ຂອງ
ບໍລິສັດ​ໄດ້ ​ໂດຍ​ເສຍ​ຄ່າ​ທຳນຽມ​ປະຈຳ​ເດືອນ ພຽງ​ປະມານ 7 ດອນ​ລາ​ສະຫະລັດ​ຕໍ່​ເດືອນ.

​ແຕ່​ພວກ​ພະນັກງານ​ບາງ​ຄົນ ກ່າວ​ວ່າ ​ເຂົາ​ເຈົ້າ​ມີ​ຄວາມ​ກັງວົນ​ໃຈ​ຫຼາຍກ່ວາ ນຳ​ການຂາດ
ຄວາມ​ມ່ວນ​ຊື່ນ ​ບໍ່​ມີຊີວິດສັງຄົມໃນ​ຍາມ​ມື້​ຄືນ​ ຍ້ອນວຽກ​ການຂອງ​ເຂົາ​ເຈົ້ານັ້ນ.

ສຳ​ຫລັບນາງ Angeline Rodriguez ພະນັກງານ​ສູນ C3 ກ່າວ​ວ່າ ລາວ​ລຶ້ງ​ເຄີຍ​ກັບ​ເລື້ອງ
ນີ້​ແລ້ວ ຫຼັງ​ຈາກ​ເຮັດ​ວຽກ​ມາ​ໄດ້ 5 ປີ​ ໃນ​ວົງການ​ອຸດສາຫະກຳ​ດັ່ງກ່າວ.

ນາງ Rodriguez ກ່າວ​ວ່າ “ ​ໃນ​ປັດຈຸບັນ​ນີ້ ຂ້ອຍ​ບໍ່​ມີ​ຊີວິດ​ສັງຄົມ ​ແລະ​ຂ້ອຍ​ກໍ​ບໍ່​ມັກ​
ມັນປານ​ໃດ. ຂ້ອຍ​ຢາກ​ເຮັດ​ວຽກ​ຫລາຍກ​ວ່າ.”

ນາງ​ກ່າວ​ຕື່ມ​ວ່າ ຖ້າ​ຫາກ​ນາງຢາກ​ມີ​ໝູ່​ເພື່ອນ​ໃໝ່ ຫຼື​ມີ​ຊູ້​ມີ​ແຟນນັ້ນ ມັນກໍ​ມີ​ຄົນ​ອື່ນໆ​ອີກ​ຫຼາຍ​ຄົນ ​ທີ່ເຮັດ​ວຽກ​ໃນ​ຍາມ​ມື້​ຄືນ ຄື​ກັນ​ກັບ​ນາງ​.

XS
SM
MD
LG