ເຈົ້າໜ້າທີ່ Philippine ໄດ້ເວົ້າວ່າ ຕອນນີ້ໄດ້ຢືນຢັນແລ້ວວ່າມີ 72 ຄົນເສຍຊີວິດ ຫຼັງຈາກທີ່ໂຮງງານຜະລິດເກີບແຕະ ໄດ້ເກີດໄຟໄໝ້ໃນຄຸ້ມຄົນທຸກຍາກແຫ່ງໜຶ່ງຂອງນະຄອນ Manila.
ນອກນັ້ນ ຍັງມີອີກຫຼາຍສິບຄົນບາດເຈັບ ເມື່ອໄຟໄດ້ລຸກໄໝ້ຂຶ້ນຢູ່ບໍລິສັດການຜະລິດ Kentex, ເຊິ່ງທຳການຜະລິດ ເກີບແຕະຢາງ ຂາຍໃນທ້ອງຖິ່ນ.
ຕອນນີ້ ຍັງບໍ່ທັນມີຄວາມຊັດເຈນວ່າ ມີຜູ້ຄົນຍັງສູນຫາຍ ຫຼາຍປານໃດ.
ແປວໄຟທີ່ໄໝ້ຕຶກອາຄານສອງຊັ້ນ ເຊື່ອວ່າໄດ້ເລີ້ມຈາກເຄື່ອງຈອດໂລຫະເຊິ່ງໄປສຳພັດກັບສານເຄມີ.
ທ້າວ Steve Chua ກຳມະກອນໂຮງງານໄດ້ເວົ້າວ່າ “ຕອນທີ່ພວກເຮົາກຳລັງຕັດເຫຼັກຢູ່ນັ້ນ, ມັນໄດ້ມີປະກາຍໄຟອອກມາ ແລະ ໄຟກໍ່ລາມໄປບ່ອນອື່ນ. ພວກເຮົາໄດ້ພະຍາຍາມສາດນ້ຳໃສ່ ແລະ ໃຊ້ເຄື່ອງດັບເພີງ, ແຕ່ວ່າມັນໃຊ້ບໍ່ໄດ້ຜົນ,”
ມີຫຼາຍຄອບຄົວຂອງຜູ້ເຄາະຮ້າຍໄດ້ເສຍໃຈກັບສິ່ງທີ່ພວກເຂົາເວົ້າວ່າ ເປັນຍ້ອນ
ມາດຕະຖານ ການປ້ອງກັນໄຟໄໝ້ ທີ່ລະຫຼວມຂອງໂຮງງານ. ກຳມະກອນຫຼາຍຄົນໄດ້ເວົ້າວ່າ ພວກເຂົາບໍ່ໄດ້ເຂົ້າຮ່ວມຝຶກຊ້ອມການປ້ອງກັນໄຟໄໝ້. ມັນຍັງບໍ່ທັນມີຄວາມກະຈ່າງແຈ້ງເທຶ່ອວ່າໂຮງງານນີ້ມີຈຳນວນປະຕູໜີໄຟທີ່ກຳນົດໃຫ້ ຫຼື ບໍ່.
ຮາວເຫຼັກ ແລະ ກົງເຫຼັກທີ່ປີດກັ້ນປ່ອງຢ້ຽມຫຼາຍໆປ່ອງໃນໂຮງງານ, ເປັນສິ່ງທີ່ກີດກັ້ນເຮັດໃຫ້ຄົນບໍ່ສາມາດຫຼົບໜີໄດ້. ສົບຂອງຄົນທີ່ຖືກຕົກຄ້າງຢູ່ໃນອາຄານແມ່ນເວົ້າກັນວ່າໄດ້
ໄໝ້ໝົດຈົນເຫຼືອແຕ່ກະດູກ.
ເຈົ້າໜ້າທີ່ກຳລັງຢູ່ໃນຂັ້ນຕອນຂອງການສືບສວນສອບສວນຢູ່, ແຕ່ວ່າຫົວໜ້າກົມຕຳຫຼວດແຫ່ງຊາດຂອງ Philippine ທ່ານ Leonardo Espina ໄດ້ບອກພວກນັກຂ່າວ ໃນວັນພະຫັດມື້ນີ້ວ່າ “ແນ່ນອນຈະຕ້ອງມີໃຜຄົນໜຶ່ງເປັນຜູ້ຮັບຜິດຊອບ” ຖານອາຊະຍາກຳ.
