ລິ້ງ ສຳຫລັບເຂົ້າຫາ

ເຈົ້າໜ້າທີ່ກ່າວວ່າ ຄວາມໄວເກີນກຳໜົດ ອາດເປັນສາເຫດ ພາໃຫ້ລົດ​ໄຟຕົກລາງ ທີ່ Philadelphia


ພວກກູ້ໄພສຸກເສີນ ພາກັນຊ່ອຍເຫຼືອ ໃນເຫດລົດໄຟຕົກລາງ
ທີ່ Philadelphia, 13 ພຶດສະພາ, 2015.

ພວກກູ້ໄພສຸກເສີນ ພາກັນຊ່ອຍເຫຼືອ ໃນເຫດລົດໄຟຕົກລາງ ທີ່ Philadelphia, 13 ພຶດສະພາ, 2015.

ຄະນະສືບສວນຂອງລັດຖະບານກາງສະຫະລັດ ກ່າວວ່າ ເຄື່ອງຄວບຄຸມດ້ານຄວາມປອດໄພທີ່ທັນສະໄໝ ອາດຈະຊ່ອຍ
ປ້ອງກັນບໍ່ໃຫ້ເກີດອຸບປະຕິເຫດລົດໄຟໂດຍສານຕົກລາງ
ໃນ ແລງ​ວັນ​ອັງ​ຄານ​ຜ່ານມານີ້ ທີ່ເມືອງ Philadelphia
ທາງ​ພາກ​ຕາ​ເວັນ​ອອກສຽງເໜືອຂອງ ສະຫະລັດ.

​ຄະນະ​ກຳມະການຄຸ້ມຄອງ​ຄວາມ​ປອດ​ໄພ​ໃນການຂົນສົ່ງແຫ່ງ​ຊາດ ຫຼື National Transportation Safety Board ທີ່ເອີ້ນຫຍໍ້ວ່າ NTSB ນັ້ນ ​ໄດ້​ກ່າວ​ວ່າ ລົດ​ໄຟ​ໂດຍສານ​ຂະບວນນີ້ອາດ​ຈະ​ແລ່ນ​ໄວກວ່າ 160 ກິ​ໂລ​ແມັດ​ຕໍ່​ຊົ່ວ​ໂມງ ຊຶ່ງຢ່າງ​ນ້ອຍ ​ໄວ ກວ່າ​ສອງ​ເທົ່າ ຂອງ​ຄວາມ​ໄວທີ່​ກົດລະບຽບການປະກາດໃຫ້ໄຊ້​ ​ໃນ​ທາງ​ໂຄ້ງ ບ່ອນທີ່​ໄດ້ປະສົບ​ອຸບ​ປະຕິ​ເຫດ ​ຍັງຜົນໃຫ້ມີ 7 ຄົນເສຍຊີວິດ ​ແລະ​ບາດ​ເຈັບ 200 ຄົນ ບາງ​ຄົນ​
ຢູ່​ໃນ​ສະພາບ​ສາຫັດ.


ທ່ານ Robert Sumwalt ສະມາຊິກອົງການ NTSB ​ໄດ້​ບອກ​ກັບ​ພວກ​ນັກ​ຂ່າວ​ວ່າບ່ອນ​ທີ່​ເກີດ​ເຫດ​ນັ້ນ​ ​ແມ່ນ​ຍັງ​ບໍ່​ທັນ​ໄດ້​ຕິດ​ຕັ້ງ​ລະບົບທີ່​ເອີ້ນ​ວ່າ Positive Train Control ເທື່ອ ທີ່ໃຊ້ລະບົບ GPS ແລະລະບົບຕິດຕາມຄວບຄຸມອື່ນໆ ທີ່ເຮັດໃຫ້ລົດໄຟແລ່ນຊ້າລົງໂດຍ ອັດຕະໂນມັດ ຖ້າຫາກມັນແລ່ນກາຍຄວາມໄວທີ່ກຳນົດໄວ້ ຫລືຢູ່ໃນອັນຕະລາຍທີ່ຈະຕຳ
ກັນ ກັບລົດໄຟຂະບວນອື່ນ.

ລັດຖະສະພາໄດ້ຮັບຜ່ານກົົດໝາຍສະບັບໜຶ່ງໃນປີ 2008 ທີ່ບັງຄັບໃຫ້ລົດໄຟ Amtrak
ຊຶ່ງເປັນການບໍລິການລົດໄຟໂດຍສານທີ່ໄດ້ຮັບທຶນຈາກລັດຖະບານພ້ອມທັງລົດໄຟຂົນສົ່ງ
ແລະ ລົດໄຟໂດຍສານຂອງເອກກະຊົນອື່ນໆຕິດຕັ້ງລະບົບ Positive Train Control ພາຍໃນ ທ້າຍປີນີ້. ແຕ່ຄະນະກຳມະການການຄ້າແລະຂົນສົ່ງຂອງສະພາສູງ ໄດ້ໃຫ້ການ
ອະນຸມັດຕໍ່ ມາດຕະການນີ້ ໃນເດືອນມີນາ ທີ່ອະນຸຍາດໃຫ້ອຸດສາຫະກຳລົດໄຟ ເລື່ອນເວລາ
ໃນການ ຕິດຕັ້ງລະບົບດັ່ງກ່າວອອກໄປຈົນຮອດປີ 2020 ຫລັງຈາກອຸດສາຫະກຳລົດໄຟ
ໄດ້ພາກັນວິ່ງເຕັ້ນ ຂໍໃຫ້ສະມາຊິກສະພາ ໃຫ້ແກ່ເວລາແກ່ຕົນຕື່ມອີກ.

XS
SM
MD
LG