ລິ້ງ ສຳຫລັບເຂົ້າຫາ

ກຸ່ມຟາຕ້າ ໂຮມຊຸມນຸມ ເທື່ອທຳອິດ ຢູ່ເຂດກາຊາ (ສະໄລດ໌)


ຊາວປາແລສໄຕນ໌ເຂົ້າຮ່ວມການໂຮມຊຸມນຸມ ເນື່ອງໃນໂອກາດຄົບຮອບ 48 ປີ ໃນການກໍ່ຕັ້ງ ຂະບວນການຟາຕ້າ ທີເມືອງກາຊາ (4 ມັງກອນ 2013)
ຊາວປາແລສໄຕນ໌ຫຼາຍສິບພັນຄົນ ຈາກກຸ່ມຟາຕ້າ ໄດ້ຈັດການ
ໂຮມຊຸມນຸມຂຶ້ນເປັນເທື່ອທຳອິດທີ່ເຂດກາຊາ ໃນວັນສຸກວານນີ້ ນັບແຕ່ກຸ່ມມຸສລິມຫົວຮຸນແຮງຮາມາສທີ່ເປັນຄູ່ປໍລະປັກໄດ້ເຂົ້າ
ຄວບຄຸມດິນແດນດັ່ງກ່າວໃນສົງຄາມກາງເມືອງເປັນເວລາສັ້ນໆ
ໃນປີ 2007.

ກຸ່ມຟາຕ້າທີ່ນິຍົມແນວທາງປານກາງໄດ້ປົກຄອງເຂດຝັ່ງຕາເວັນ
ຕົກຂອງແມ່ນໍ້າຈໍແດັນ ແຕ່ໃນຂະນະທີ່ການເຈລະຈາສັນຕິພາບ
ກັບອິສຣາແອລ ໄດ້ຕົກຢູ່ໃນສະພາບ ບໍ່ໄປບໍ່ມານັ້ນ ກຸ່ມຟາຕ້າກໍ ຊອກຫາຊ່ອງທາງເພື່ອຄືນດີກັບກັບກຸ່ມຮາມາສ.

ຜູ້ນຳຂອງກຸ່ມຟາຕ້າ ພ້ອມທັງປະທານາທິບໍດີຂອງປາແລສໄຕນ໌
ທ່ານ Mamoud Abbas ໄດ້ກ່າວຄຳປາໄສຕໍ່ພວກໂຮມຊຸມນຸມ ໂດຍຜ່ານທາງໂທລະພາບຈາກ ສຳນັກງານໃຫຍ່ຂອງທ່ານ ທີ່ເມືອງ Ramallah ໃນເຂດ ຝັ່ງຕາເວັນຕົກຂອງແມ່ນໍ້າຈໍແດັນ. ທ່ານ Abbas ກ່າວວ່າ ກຸ່ມຟາຕ້າ ແລະຮາມາສ ຕ້ອງ ໄດ້ດຳເນີນງານຮ່ວມກັນເພື່ອໃຫ້ມີຄວາມເປັນເອກກະພາບຍ້ອນວ່າມັນເປັນຊ່ອງທາງດຽວ ເທົ່ານັ້ນທີ່ຈະບັນລຸເປົ້າໝາຍແຫ່ງຊາດຂອງປາແລສໄຕນ໌ແລະໄຊຊະນະ.

ທ່ານ Abu Zuhri ໂຄສົກຂອງກຸ່ມຮາມາສກ່າວຊົມເຊີຍການໂຮມຊຸມນຸມໃນຄັ້ງນີ້ວ່າ ເປັນ ຄວາມສຳເລັດຕໍ່ທັງກຸ່ມຟາຕ້າແລະຮາມາສ. ທ່ານເວົ້າວ່າ ບັນຍາກາດໃນທາງບວກ ແມ່ນ ບາດກ້າວໄປສູ່ຄວາມເປັນເອກກະພາບແຫ່ງຊາດ.

ແຕ່ການຄືນດີຂອງທັງສອງກຸ່ມດັ່ງກ່າວ ໄດ້ສ້າງຄວາມວິຕົກກັງວົນໃຫ້ແກ່ອິສຣາແອລແລະ ຝ່າຍຕາເວັນຕົກ ຍ້ອນກຸ່ມຮາມາສບໍ່ຍອມປະຕິເສດທີ່ຈະປະຖິ້ມຄວາມຮຸນແຮງແລະຮັບຮູ້ ອິສຣາແອລ. ອິສຣາແອລ ສະຫະລັດ ແລະ ສະຫະພາບຢູໂຣບ ຖືວ່າກຸ່ມຮາມາສ ເປັນອົງ ການກໍ່ການຮ້າຍ.

XS
SM
MD
LG