ລິ້ງ ສຳຫລັບເຂົ້າຫາ

ຄອບຄົວປາກີສຖານ ຕໍ່ສູ້ ປະເພນີຍົກລູກສາວໃຊ້ໜີ້ ຫຼື Swara (ວີດິໂອ)


ໃນໄລຍະບໍ່ເທົ່າປີຜ່ານມານີ້ ປາກີສຖານໄດ້ຮັບຜ່ານກົດໝາຍ
ຫຼາຍສະບັບ ເພື່ອພິທັກປົກປ້ອງແມ່ຍິງບໍ່ໃຫ້ຖືກເອົານໍ້າກົດສາດ
ໃສ່ໜ້າຂອງພວກເຂົາເຈົ້າ ຫຼືບໍ່ກໍຖືກຂ້າເພື່ອຮັກສາກຽດຂອງ
ຄອບຄົວ. ເຖິງແມ່ນມີກົດໝາຍ​ຫ້າມແລ້ວກໍຕາມ ການກະທໍາ ຮຸນແຮງຕໍ່ພວກແມ່ຍິງກໍຍັງມີຢູ່ຕໍ່ມາ ແຕ່ກໍມີເລຶ່ອງລາວຂອງ
ຫລາຍໆຄົນທີ່ລຸກຂຶ້ນຕໍ່ສູ້ ເມື່ອກົດໝາຍບໍ່ສາມາດຊ່ວຍພວກ
ເຂົາເຈົ້າໄດ້. ຜູ້ສື່ຂ່າວວີໂອເອ Sharon Behn ລາຍງານຈາກເມືອງ Peshawar ກ່ຽວ ກັບຄອບຄົວນຶ່ງທີ່ພໍ່ຂອງເຂົາເຈົ້າເສຍຊີວິດ ຍ້ອນພະຍາຍາມປ້ອງກັນບໍ່ໃຫ້ລູກສາວຂອງ ຕົນຖືກ​ໃຊ້ເປັນ​ຕົວຊໍາລະຂໍ້ຂັດແຍ້ງກັນກັບ​ອີກ​ຄອບ​ຄົວ​ນຶ່ງ.

ນາງນ້ອຍ Asma ມີອາຍຸໄດ້ພຽງສີ່ປີ ເວລາພໍ່ຂອງນາງບໍ່ຍອມຍົກນາງ ໃຫ້ແກ່ຄອບຄົວນຶ່ງ ຊຶ່ງຄອບຄົວດັ່ງກ່າວແລະພວກເຖົ້າແກ່ຊົນເຜົ່າ ໄດ້ ທວງ​ເອົານາງ Asma ​ໄປແທນຕົວຜູ້ ເອື້ອຍ ທີ່​ໄດ້ຖືກ​ມອບ​ໃຫ້​ຄອບຄົວ​ນັ້ນ​ເພື່ອ​ຄັດ​ໜີ້ ​ແລະໄດ້ຫຼົບໜີໄປ ຫຼັງຈາກຖືກຂົ່ມ​ເຫັງ​ແລະກະທໍາຮຸນແຮງ.

ແຕ່ພໍ່ຂອງນາງບໍ່ຍອມປະຕິບັດຕາມປະເພນີຊົນເຜົ່າທີ່ເອີ້ນວ່າ Swara ນັ້ນ ແລະກໍໄດ້ຖືກ ສັງຫານພ້ອມກັບລູກຊາຍຄົນ​ນຶ່ງ ໃນການແກ້ແຄ້ນຂອງຄອບຄົວຄູ່​ກໍລະນີ.

ນາງໝ້າຍ Bakht Jana ຍັງ​ຈື່​ໄດ້ດີ​ເຫດການໃນຄືນນັ້ນ ເວລາພວກເຖົ້າແກ່ຊົນເຜົ່າຕັດ ສິນ​ ໃຫ້ນາງຍົກລູກສາວໃຫ້ອີກ​ຄອບຄົວ​ນຶ່ງ.

ນາງໝ້າຍ Bakht Jana ເວົ້າວ່າ: “ຂ້ອຍໃຈຮ້າຍແລະເສຍໃຈຫຼາຍ. ຂ້ອຍຮ້ອງໄຫ້ ແລະບໍ່ຍອມເດັດຂາດ ທີ່ຈະຍົກລູກສາວນ້ອຍຂອງຂອ້ຍໃຫ້ ຕາມ​ປະ​ເພນີ Swara ນັ້ນ. ມັນເປັນປະເພນີທີ່ໂຫດຮ້າຍປ່າເຖືອນທີ່ສຸດປະເພນີນຶ່ງ ທີ່ໄດ້ປະຕິບັດຕໍ່ໆກັນມາ
ໂດຍພວກຊົນເຜົ່າ ໄດ້ຫຼາຍຟ້າຫຼາຍປີ​ແລ້ວ. ແລະຂ້ອຍກໍສູນເສຍ ຜົວ ແລະລູກຊາຍ
ຂອງຂ້ອຍໄປ ຍ້ອນພະຍາ ຍາມຈະຢຸດເຊົາປະເພນີນີ້.”


ນາງໝ້າຍ Bakht Jana ແລະລູກໆ​ທີ່​ຍັງ​ເຫ​ລື​ອອີກ 11 ຄົນ ຕ້ອງ​ໄດ້ຫຼົບໜີອອກຈາກໝູ່ ບ້ານ​ໄປຢູ່​ບ່ອນ​ອື່ນ.

Hafiz ur Rehman ລູກຊາຍຂອງລາວ ເວົ້າວ່າ ບໍ່ຄວນມີ ປະເພີນີ Swara ຢູ່ໃນປາກີສ ຖານ.
ທ້າວ Rehman ເວົ້າວ່າ “ລັດຖະບານຄວນ​ເອົາ​ບາດກ້າວຕໍ່ຕ້ານເລຶ່ອງນີ້. ຖ້າຫາກວ່າ
ລັດຖະບານສາມາດປະຕິບັດການປາບປາມພວກກໍ່ການຮ້າຍໄດ້ ແລ້ວເປັນຫຍັງ ຈຶ່ງບໍ່ຕໍ່ຕ້ານປາບ​ປາມເລຶ່ອງນີ້? ລັດຖະບານສາມາດອອກຄໍາສັ່ງ ຫ້າມບໍ່ໃຫ້ປະຕິບັດ
ປະເພນີນີ້ ແລະຕໍາຫຼວດກໍຄວນ​ຈັດ​ຕັ້ງປະຕິບັດ ຕາມຄໍາສັ່ງນັ້ນ ຢູ່ໃນໝູ່ບ້ານຕ່າງໆ
ຂອງພວກເຮົາ.”


ທ່ານ Riaz Fatihana ສະມາຊິກສະພາ ເວົ້າວ່າ ລັດຖະບານກໍໄດ້ຮັບຜ່ານກົດໝາຍ ເພື່ອປົກປ້ອງພວກແມ່ຍິງນີ້ໄປແລ້ວ ແຕ່ບັນຫາ​ແມ່ນ​ນອນຢູ່ ໃນລະດັບທ້ອງຖິ່ນ.

ສະມາຊິກສະພາ Fatihana ເວົ້າວ່າ: “ປະການ​ທີ​ນຶ່ງ ຕໍາຫຼວດບໍ່ຮ່ວມ ມືກັບພວກ ເຄາະຮ້າຍ ແລະລັງເລໃຈທີ່​ຈະລົງທະບຽນກໍລະນີທີ່ເກີດຂຶ້ນຕ່າງໆ ຢ່າງເສລີ. ປະການທີສອງ ທາງສານໃຊ້ເວລາຫຼາຍໆປີ ກວ່າຈະ ປະກາດຜົນການຕັດສິນ ແລະໃນລະຫວ່າງ​ນັ້ນ ກໍບໍ່ມີການພິທັກປົກປ້ອງ​ແກ່​ພວກພະຍານ ແລະຄອບຄົວ ຂອງພວກເຄາະຮ້າຍນັ້ນ.”

ຄວາມຄິດທີ່ຖືພວກແມ່ຍິງວ່າ ເປັນຊັບສິນເພື່ອແລກປ່ຽນ​ໃຊ້ໜີ້ສິນນັ້ນ ເປັນເລຶ່ອງທີ່ມີຢູ່ ຢ່າງ​ແຜ່ຫຼາຍທີ່ສຸດຢູ່ໃນເຂດຊົນເຜົ່າທາງພາກຕາເວັນຕົກສຽງ ເໜືອ ແລະຕາເວັນຕົກສຽງ ໃຕ້ ແລະເຂດທີ່ມີລະບົບ​ການ​ປົກຄອງ​ແບບ​ເຈົ້າ​ຂຸນ​ມູນ​ນາຍ​ຂອງ​ຊົນ​ເຜົ່າ ຂອງປາກີສຖານ.

ແຕ່ ທ່ານ​ນາງ Farzana Bari ສາສະດາຈານຝ່າຍເພດສຶກສາ ກ່າວວ່າ ຄວາມຄິດ ທີ່ວ່າ ແມ່ຍິງເປັນພົນລະ​ເມືອງຊັ້ນສອງນັ້ນ ແມ່ນໄດ້ຖືກຊຶມ​ຊັບ ເຂົ້າຢູ່ໃນສັງຄົມໂດຍ​ເຕັມແລ້ວ.

ສາສະດາຈານ ບາຣີ ເວົ້າວ່າ: “ມັນມີ​ເລື່ອງເສດຖະກິດ ຂອງສະຖານະ ພາບທາງ ເພດ ທີ່​ເປັນ​ຢູ່​ໃນ​ປັດຈຸບັນ ແລະລະບົບ​ຊັ້ນ​ຕ່າງໆທາງເພດ ຢູ່ໃນສັງຄົມ ແລະຈິງໆແລ້ວ ທາງລັດກໍບໍ່ຢາກປ່ຽນແປງເລຶ່ອງນີ້ ຄືລັດບໍ່ມີຄວາມຕັ້ງໃຈຈະປ່ຽນແປງ. ພວກເຂົາ
ເຈົ້າເຮັດໃນສິ່ງຕ່າງໆ ​ແບບ​ຜິວ​ເຜີນ ພໍ​ໃຫ້​ແລ້ວ​ໄປ ຄືສະພາ ຈະຮັບຜ່ານກົດໝາຍຢູ່ ແຕ່​ເຂົາ​ເຈົ້າກໍຈະເຮັດໃຫ້ເປັນທີ່ແນ່ໃຈວ່າ ມັນຈະບໍ່ຖືກ ຈັດ​ຕັ້ງ​ປະຕິບັດຢ່າງເໝາະສົມ.”


ເຖິງແມ່ນຈະປະສົບ​ກັບຄວາມລໍາບາກຍ້ອນ​ປະ​ເພນີນີ້ກໍຕາມ ແຕ່ທ້າວ Rehman ກໍ ກ່າວວ່າ ຕົນກໍາລັງພະຍາຍາມຊຸກຍູ້ໃຫ້ຄົນອື່ນໆ ຈົ່ງພາກັນລຸກຂຶ້ນຕໍ່ສູ້ເພື່ອ​ສິດທິ​ຂອງ ລູກສາ ວ ແລະເອື້ອຍນ້ອງຂອງພວກເຂົາເຈົ້າ ດັ່ງທີ່ຄວບຄົວຂອງລາວໄດ້ຢືນຢັດ​ເພື່ອ ນ້ອງສາວ Asma ຂອງລາວນັ້ນ.
XS
SM
MD
LG