ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ປາກິສຖານ ເລື່ອນປະຊຸມ ສຸດຍອດ ໃນເຂດ ເອເຊຍໃຕ້


ໂຄສົກກະຊວງຕ່າງປະເທດປາກິສຖານ ທ່ານ Nafees Zakaria ຖະແຫຼງຕໍ່ສື່ມວນຊົນ ທີ່ກະຊວງການຕ່າງປະເທດ ໃນນະຄອນອິສລາມາບັດ (29 ກັນຍາ 2016)
ໂຄສົກກະຊວງຕ່າງປະເທດປາກິສຖານ ທ່ານ Nafees Zakaria ຖະແຫຼງຕໍ່ສື່ມວນຊົນ ທີ່ກະຊວງການຕ່າງປະເທດ ໃນນະຄອນອິສລາມາບັດ (29 ກັນຍາ 2016)

ປາ​ກິ​ສຖານ​ປະກາດ​ໃນ​ວັນ​ສຸກ​ວານ​ນີ້ວ່າ ຕົນ​ຈະ​ເລື່ອນ​ກອງ​ປ​ະຊຸມ​ປະມຸກ​ຂອງບັນດາ​ປະ​ເທດໃນ​ເຂ​ດ​ເອ​ເຊຍໃຕ້ຊຶ່ງ​ຈະ​ມີ​ຂຶ້ນ​ໃນ​ເດືອນ​ພະຈິກ​ອອກ​ໄປ ​ໂດຍ​ຖິ້ມ​ໂທດ​ໃສ່​ອິນເດຍທີ່​ເປັນ​ຄູ່​ປໍ​ລະ​ປັກ ທີ່ເຮັດ​ໃຫ້​ຂັ້ນຕອນ​ການ​ຮ່ວມ​ມືໃນພາກພື້ນດັ່ງກ່າວ ​ພັງ​ທະລາຍ​ລົງ.

ການ​ເຄື່ອນ​ໄຫວ​ດັ່ງກ່າວ ມີ​ຂຶ້ນທ່າມກາງຄວາມ​ເຄັ່ງ​ຕຶງ ໃນ​ເຂດ​ຊາຍ​ແດນ​ ແລະດ້ານ​ກາ​ນ ທູດ ​ລະຫວ່າງ​ອິສລາມາ​ບັດ​ ແລະ​ນິ​ວ​ເດ​ລີ ​ເພີ້ມທະວີ​ຂຶ້ນ ​ໂດຍ​ມີ​ການກ່າວ​ຫາ​ວ່າ ​ປາ​ກິ​ສ ຖານ​ເປັນ​ຜູ້​ຢູ່​ເບື້ອງຫຼັງການ​ໂຈ​ມຕີ​ຮ້າຍ​ແຮງ​ໃນຕົ້ນ​ເດືອນ​ກັນຍາ ຕໍ່​ຄ້າຍ​ທະຫານ​ອິນ​ເດຍ ​ໃນ​ແຄວ້ນ​ແຄັສ​ເມຍ​ທີ່​ມີ​ການ​ແບ່ງແຍກ.

ກ່ອນ​ໜ້ານີ້ອິນ​ເດຍ​ໄດ້​ຕັດສິນ​ໃຈ​ບໍ່​ໄປ​ຮ່ວມ​ກອງ​ປະຊຸມສຸດ​ຍອດສະມາຄົມເພື່ອ​ການຮ່ວມ​ມື​ພາກພື້ນ​ໃນ​ເຂດ​ເອ​ເຊຍ​ໃຕ້ທີ່​ເອີ້ນຫຍໍ້​ວ່າ SAARC ​ໂດຍ​ອ້າງ​ເຫດ​ຜົນໃນ​ອັນ​ທີ່​ຕົນ​ເອີ້ນ ວ່າ ການ​ໂຈມ​ຕີ​ກໍ່​ການ​ຮ້າຍ ​ຂ້າມ​ຊາຍ​ແດນ ຊຶ່ງ​ເປັນ​ຂໍ້​ກ່າວ​ຫາ ທີ່​ລັດຖະບານ​ປາ​ກິ​ສຖານ​ໄດ້​ປະຕິ​ເສດ.

ປາ​ກິ​ສຖານ ຊຶ່ງ​ຈະ​ເປັນ​ເຈົ້າພາບ ​ຈັດ​ກອງ​ປະຊຸມ​ສຸດ​ຍອດ ກ່າວ​ວ່າ ຕົນ​ຂໍສະ​ແດງ​ຄວາມ​ເສຍ​ໃຈ​ຕໍ່​ການ​ຕັດສິນ​ໃຈ​ທີ່​ຈະ​ບໍ່​ໄປ​ຮ່ວມ​ຂອງ​ອິນ​ເດຍອີງ​ຕາມ​ຖະ​ແຫຼງການ​ຂອງກະຊວງ​ກາ​ນຕ່າງປະ​ເທດ ທີ່​ນຳ​ອອກ​ເຜີຍ​ແຜ່​ຢູ່​ນະຄອນຫລວງ​ອິສລາມາ​ບັດ.

ຖະ​ແຫຼງການ​ກ່າວ​ຕື່ມ​ວ່າ “​ຈິດ​ໃຈ​ຂອງ​ກົດ​ບັດສະມາຄົມ​ເພື່ອ​ການ​ຮ່ວມ​ມື​ພາກພື້ນ​ໃນ​ເຂດ​ເອ​ເຊຍ​ໃຕ້ ​ໄດ້​ມີ​ການ​ລ່ວງ​ລະ​ເມີດ ​ເວລາ​ປະ​ເທດ​ສະມາຊິກ​ໃດ​ນຶ່ງ​ໄດ້ຍົກເອົາ​ບັນຫາ​ສອງ​ຝ່າຍ ​ມາ​ເປັນ​ເງົາ​ບົດ​ບັງກອງ​ປະຊຸມ​ການ​ຮ່ວມ​ມື​ພາກພື້ນຫຼາຍຝ່າຍ.”

ອົງການ​ສະຫະ​ປະຊາ​ຊາດ​ໃນ​ວັນ​ສຸກ​ວານ​ນີ້ ກ່າວ​ວ່າ ຕົນ​ມີ​ຄວາມ​ເປັນ​ຫ່ວງທີ່ສຸດ​ກ່ຽວກັບ​ຄວາມ​ເຄັ່ງ​ຕຶງ​ທີ່ເພີ້ມທະວີ​ຂຶ້ນລະຫວ່າງ​ສອງ​ປະ​ເທດ​ເພື່​ອນບ້ານ​ມະຫາ​ອຳນາດ​ນິວ​ເຄລຍ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG