ລິ້ງ ສຳຫລັບເຂົ້າຫາ

ຜູ້ຈັດ ການປະທ້ວງ ໃນເລບານອນ ເລື່ອນການປະທ້ວງ ໃນ ວັນຈັນມື້ນີ້ ອອກໄປ


ບັນດານັກເຄື່ອນໄຫວ ຊາວເລບານອນ (ຂວາ) ປະທະກັບເຈົ້າໜ້າທີ່ຕຳຫຼວດ (ຊ້າຍ) ຂະນະທີ່ພວກເຂົາພະຍາຍາມ ທີ່ຈະຂ້າມໄປຍັງ ລັດຖະສະພາ ໃນລະຫວ່າງ ການປະທ້ວງ ຕໍ່ຕ້ານບັນຫາວິກິດການ ຂອງຂີ້ເຫຍື້ອ ທີ່ຍັງມີຢູ່ຕໍ່ໄປນັ້ນ ໃນນະຄອນຫຼວງເບຣຸທ ປະເທດເລບານອນ, ວັນທີ 23 ສິງຫາ 2015.

ບັດ​ດາ​ຜູ້​ຈັດ​ແຈງການ​ເດີນ​ຂະ​ບວນ ​ໄດ້ເລື່ອນ​ການ​ປະ​ທ້ວງ​
ອອກ​ໄປ ທີ່​ໄດ້​ວາງ​ແຜນ​ໄວ້​ ສຳ​ຫລັບ ວັນ​ຈັນ​ມື້​ນີ້ ​ໃນ​ນະຄອນ
ຫຼວງຂອງ​ເລບາ​ນອນ ມື້ນຶ່ງຫຼັງຈາກ​ທີ່​ມີ​ການ​ປະ​ທ້ວງ​ ຕໍ່ຕ້ານ​
ລັດຖະບານ ໄດ້​ສິ້ນ​ສຸດ​ລົງ ດ້ວຍການ​ປະ​ທະ​ກັນ ​ຢ່າງຮຸນ​ແຮງ
ກັບກອງ​ກຳລັງ​ຮັກສາ​ຄວາມ​ປອດ​ໄພ.

ການ​ຕໍ່ສູ້ ທີ່​ເອີ້ນ​ວ່າ “​ເຈົ້າເໝັນ ຫຼື You Stink” ​ ໄດ້​ປະກາດ
​ອອກ​ຜ່ານທາງ Facebook ທີ່​ວ່າ ການ​ປະ​ທ້ວງ​ທີ່ກຳນົດ​ໃສ່​
ວັນ​ຈັນຕອນ​ແລງ​ມື້​ນີ້ ຢູ່​ໃນ​ນະຄອນຫຼວງ​ເບຣຸທ ຈະ​ບໍ່​ມີ​ຂຶ້ນ ​ແລະ
ວ່າ ບັນດາ​ຜູ້​ຈັດ​ແຈງການ​ປະ​ທ້ວງ ຕ້ອງ​ໄດ້​ຊັ່ງຊາ​ຕີ​ລາຄາຄືນ ​ຂໍ້​ຮຽກຮ້ອງ​ຂອງພວກ​ຕົນ. ພວກ​ເຂົາວາງ​ແຜນ​ວ່າຈະ​ຈັດ​ກອງ​ປະຊຸມ​ຖະ​ແຫລ​ງຂ່າວ ​ເພື່ອອະທິບາຍ ຕື່ມ​ອີກ​ສະຖານະ​ການ​ຂອງ​ພວກ​ເຂົາ​ເຈົ້າ.

ການ​ປະ​ທ້ວງ​ໃນ​ນະຄອນຫຼວງ​ເບຣຸທ ​ເມື່ອ​ວັນ​ອາທິດ​ວານ​ນີ້ ​ ​ໄດ້​ເລີ້ມ​ຕົ້ນຂຶ້ນຢ່າງ​ສັນຕິ ທີ່​ມີ​ປະຊາຊົນຫຼາຍພັນ​ຄົນ ສືບ​ຕໍ່​ສະ​ແດງ​ອອກ​ຄວາມ​ໃຈ​ຮ້າຍ​ຂອງ​ພວກ​ເຂົາ​ເຈົ້າ ກ່ຽວ​ກັບ​ຂີ້​ເຫຍື້ອ
ທີ່​ໄດ້​ກອງຂຶ້ນ​ໃນ​ທົ່ວ​ປະ​ເທດ ​ແລະ ຄວາມ​ຜິດ​ຫວັງ​ອັນ​ກວ້າງ​ຂວາງ​ກວ່າ​ນີ້ ກ່ຽວ​ກັບ​ລະບົບ​
ຂອງກົມ​ການ​ເມືອງ ທີ່ຂາດ​ຕົກບົກ​ຜ່ອງ​ມາ​ເປັນ​ເວລາຫຼາຍກວ່າ​ປີ​ນຶ່ງແລ້ວ ທີ່​ຍັງ​ບໍ່​ໄດ້​ມີ
ປະທານາທິບໍດີ​ໃໝ່.

​ແຕ່​ການ​ປະ​ທະ​ກັນ ​ໄດ້​ເລີ້ມ​ຕົ້ນຂຶ້ນ ​ໃນ​ຕອນ​ຄ່ຳ​ຄືນ ກັບ​ກອງ​ກຳລັງ​ຮັກສາ​ຄວາມ​ປອດ​ໄພ ທີ່​ໃຊ້​ປືນ​ນ້ຳ ​ແລະ ​ແກັສນ້ຳຕາ ເພື່ອແຍກຝຸງ​ຊົນປະ​ທ້ວງຢູ່ນັ້ນອອກ​ໄປ ຊຶ່ງ​ພວກ​ເ​ຂົາບາງ​ຄົນ ​ໄດ້ແກວ່​ງກ້ອນ​ຫິນ ​ແລະ ຂວດ​ແກ້ວ​ຕ່າງໆ​ໃສ່​ພວກ​ເຈົ້າໜ້າ​ທີ່ ​ແລະ ​ໄດ້ພະຍາຍາມມ້າງ​ລົງສິ່ງ​ກີດ​ຂວາງຄວາມປອດ​ໄພຕ່າງໆ.

ບັນດາ​ຜູ້​ຈັດ​ແຈງ​ການ​ປະ​ທ້ວງ​ ຫາ​ທາງ​ເຫີ​ນຫ່າງພວກ​ຕົນ ​ຈາກຄວາມ​ຮຸນ​ແຮງ​ທີ່​ເກີດ​ຂຶ້ນ ​ໂດຍ​ກ່າວ​ວ່າ ພວກເຂົາ​ເຄື່ອນ​ຍ້າຍ​ການ​ເດີນ​ຂະ​ບວນປະ​ທ້ວງ ​ໄປ​ຍັງບ່ອນ​ອື່ນ ​ແລະ ບໍ່​ມີ​ສ່ວນ​ຮ່ວມ​ນຳ​ການ​ກໍ່​ຄວາມ​ຮຸນ​ແຮງນັ້ນ.

ບັນດາ​ເຈົ້າໜ້າ​ທີ່ ກ່າວໃນ​ວັນ​ອາທິດ​ວານ​ນີ້​ວ່າ ພວກ​ປະ​ທ້ວງ 43 ຄົນ​ ​ແລະ ​ເຈົ້າໜ້າ​ທີ່ຕຳຫຼວດ ​30 ຄົນ ໄດ້​ຮັບ​ບາດ​ເຈັບ.

ນາຍົກລັດຖະມົນຕີ ທ່ານ Tammam Salam ​ໄດປະຕິຍານ ​ໃນ​ວັນ​ອາທິດ​ວານ​ນີ້ ​ວ່າ ຈະ​ນຳ​ເອົາ​ພວກ​ທີ່​ຮັບຜິດຊອບ ສຳ​ຫລັບ​ການ​ໃຊ້​ກຳລັງ​ເກີນ​ຂອບ​ເຂດ ຕໍ່​ພວກ​ປະ​ທ້ວງ​ນັ້ນ ມາ​ລົງໂທດ.

XS
SM
MD
LG