ລິ້ງ ສຳຫລັບເຂົ້າຫາ

ຜູ້ປົກຄອງ ເກາະໂອກີນາວາ ຈະຍົກເລີກ ອະນຸຍາດ ສ້າງຖານທັບໃໝ່ ຂອງສະຫະລັດ


ຜູ້ປົກຄອງ ເກາະໂອກີນາວາ ທ່ານ Takeshi Onaga (ກາງ) ກ່າວຖະແຫລງ ຕໍ່ສື່ມວນຊົນ ຫຼັງຈາກເຂົ້າກອງປະຊຸມ ກັບນາຍົກລັດຖະມົນຕີ ຍີ່ປຸ່ນ ທ່ານ Shinzo Abe ຢູ່ທີ່ຫ້ອງການ ຂອງທ່ານ Abe ໃນນະຄອນ Tokyo.

ຜູ້​ປົກຄອງ​ເກາະໂອ​ກີ​ນາວາ ຢູ່​ທາງ​ພາກ​ໃຕ້​ຂອງ​ຍີ່ປຸ່ນ ກ່າວ​ວ່າ
ທ່ານ​ຈະ​ຍົກ​ເລີກ​ອະນຸຍາດ ​ໃຫ້​ກໍ່ສ້າງ​ຖານ​ທັບ​ອາກາດສະຫະລັດ
​ແຫ່ງ​ໃໝ່ ​ໃນ​ເກາະ​ຂອງ​ທ່ານ ຫຼັງຈາກ​ການ​ເຈລະຈາ ລະຫວ່າງ
ລັດຖະບານ​ຂອງ​ທ່ານ ​ແລະ ບັນດາ​ເຈົ້າໜ້າ​ທີ່​ຂອງ​ໂຕ​ກຽວ ບໍ່ຕົກ​
ແຕກ​ກັນ.

ທ່ານ Takeshi Onaga ກ່າວ​ຕໍ່​ບັນດາ​ນັກ​ຂ່າວ ​ໃນ​ວັນ​ຈັນ​ມື້​ນີ້ ວ່າ
ລັດຖະບານ​ຂອງ​ທ່ານ ດຳ​ເນີນ​ການ​ເຊັ່ນນັ້ນ ຫຼັງຈາກ​ທີ່​ໄດ້​ພົບ​ເຫັນ
​“ຂໍ້​ບົກ​ຜ່ອງຕ່າງໆ” ​ໃນ​ອະນຸຍາດ​ສະບັບ​ຕົ້ນ ທີ່​ໄດ້​ອອກໃຫ້ໂດຍ​
ເຈົ້າຄອງ​ຜູ້​ກ່ອນ. ການ​ຕັດສິນ​ໃຈ​ຂອງ​ທ່ານ​ ໄດ້ປະກາດ​ໃຫ້​ຊາບ​ພຽງ
ບໍ່​ເທົ່າ​ໃດ​ມື້ ຫຼັງຈາ​ກທີ່​ວຽກ​ງານການ​ກໍ່ສ້າງ​ໄດ້​ເລີ້ມ​ຄືນ ​ໃນ​ສະຖານ​ທີ່
​ໃກ້​ກັບບ້ານ​ ຫ່າງ​ໄກ​ສອກ​ລີກແຫ່ງ​ນຶ່ງ ​ຢູ່​ແຄມ​ຝັ່ງ​ໂອ​ກີ​ນາວາ ທີ່​ເອີ້ນວ່າ Henoko ນັ້ນ.
ການ​ກໍ່ສ້າງ​ໄດ້​ຖືກ​ໂຈະ​ໄວ້ ​ເປັນ​ເວລາ​ນຶ່ງ​ເດືອນ ​ເພື່ອ​ອະນຸຍາດ​ໃຫ້​ມີ​ການ​ເຈລະຈາ​ກັນ​ກ່ອນ.

ທ່ານ Onaga ​ໄດ້​ຖືກ​ເລືອກ​ໃຫ້​ເປັນ​ເຈົ້າຄອງ ​ເມື່ອ​ປີ​ແລ້ວ​ນີ້ ​ທີ່​ປະຕິຍານ​ວ່າ​ຈະ​ກີດ​ກັນ​ ການ​ຍົກຍ້າຍ​ຖານ​ທັບ​ອາກາດ ທະຫານ​ນາ​ວິກະໂຍທິນ Futenma ຈາກ​ບໍລິ​ເວນ​ທີ່​ມີ​ປະຊາຊົນ​ອາ​ໄສຢູ່​ຢ່າງ​ໜາ​ແໜ້ນ ​ໄປ​ຍັງ​ເຂດ Henoko ຂອງ​ໂອ​ກີ​ນາວາ ​ແລະ ​ແທນ​ທີ່​ຈະ​ຍ້າຍ​ຖານ​ທັບ​ດັ່ງກ່າວນັ້ນ ​ໄປ​ຍັງ​ເກາະ​ອື່ນ. ​ໂຕ​ກຽວ ​ແລະ ສະຫະລັດ ​ໄດ້​ທຳ​ການ​ເຈລະຈາ​ການ​ຍົກຍ້າຍ ​ເພາະ​ຮັບ​ຮູ້​ວ່າ ປະຊາຊົນໄດ້​ຮ້ອງທຸກວ່າ ມີສຽງ​ລົບ​ກວນ ມາ​ຈາກ​ຖານ​ທັບ​ອາກາດ ​ແລະ ມີ​ຈຳນວນ​ພະນັກງານ​ທະຫານ​ສະຫະລັດຫຼາຍ ຢູ່​ໃນ​ເກາະ​ນັ້ນ. ທະຫານ​ນາ​ວິກະໂຍທິນ ຫຼາຍກວ່າ 19,000 ຄົນ ປະຈຳການ​ຢູ່​ທີ່​ເກາະ​ໂອ​ກີ​ນາວາ ​ເພື່ອ​ທີ່​ຈະ​ຕອບ​ໂຕ້​ຕໍ່​ການ​ຂົ່ມຂູ່​ໃດໆ​ໃນ​ຂົງ​ເຂດ ​ເພື່ອ​ສະໜອງ​ການ​ຊ່ວຍ​ເຫຼືອ​ໃນ​ໄພພິບັດ ​ແລະ ປົກປ້ອງ​ຜົນ​ປະ​ໂຫຍ​ດຂອງ​ສະຫະລັດ ​ແລະ ຍີ່ປຸ່ນ.

ຫົວໜ້າກອງ​ເລຂາ ປະຈຳຄະນະ​ລັດຖະບານຍີ່ປຸ່ນ ທ່ານ Yoshihide Suga ກ່າວຕໍ່​ບັນດາ​ນັກ​ຂ່າວ ​ໃນ​ວັນ​ຈັນມື້​ນີ້​ວ່າ ວຽກ​ງານກໍ່ສ້າງຖານ​ທັບ​ຢູ່​ ​ເຂດ Henoko ນັ້ນ ຈະ​ສືບ​ຕໍ່​ໄປ ​ເຖິງ​ແມ່ນ​ວ່າ ຈະມີ​ການ​ຕັດສິນ​ໃຈ​ຂອງ​ເຈົ້າຄອງ Onaga ກໍ​ຕາມ. ລັດຖະບານ​ກາງ​ຍີ່ປຸ່ນ ອາດກ່າວຟ້ອງທ່ານ Onaga ຕໍ່​ສານ ​ເພື່ອ​ສະກັດ​ກັ້ນ ການ​ກະທຳ​ຂອງ​ຜູ້ກ່ຽວ.

XS
SM
MD
LG