ລິ້ງ ສຳຫລັບເຂົ້າຫາ

ທ່ານ ໂອບາມາ ຢ້ຽມຢາມ ບ່ອນເກີດພາຍຸຫົວກຸດ ໃນລັດ ໂອກລາໂຮມມາ (ວີດີໂອ/ສະໄລດ໌)


ປະທານາທິບໍດີ Barack Obama ຢ້ຽມຢາມເມືອງ Moore ໃນລັດ Oklahoma ທີ່ໄດ້ຮັບຄວາມເສຍຫາຍໜັກ ຈາກພາຍຸຫົວກຸດ.

ປະທານາທິບໍດີ ສະຫະລັດ ທ່ານ Barack Obama ​ໄດ້​ໄປ​ຢ້ຽມ
ຢາມ​ເມືອງ Moore ​ທີ່​ຖືກ​ພາຍຸ​ຫົວກຸດທໍາ​ລາຍ ຢູ່​ພາກ​ກາງຕອນ
ໃຕ້​ຂອງ ​ລັດ Oklahoma ຊຶ່ງທ່ານ​ໄດ້ໃຫ້​ຄວາມ​ອົບ​ອຸ່ນ ​ແລະສະ
​ເໜີ​ໃຫ້ການ​ຊ່ວຍ​ເຫລືອ​ລະຍະ​ຍາວ ຂອງລັດຖະບານ​ກາງ ແກ່​
ບັນດາຜູ້​ລອດ​ຊີວິດ ຈາກ​ພາຍຸ​ທີ່​ເຮັດ​ໃຫ້​ມີ​ຜູ້​ເສຍ​ຊີວິດ 24 ຄົນ
​ໃນອາ​ທິດ​ແລ້ວ​ນີ້.

ຂະນະ​ທີ່​ຢືນ​ຢູ່ຂ້າງ​ຊາກ​ຫັກ​ພັງ​ຂອງໂຮງຮຽນ​ປະຖົມ​ແຫ່ງ​ນຶ່ງ ຢູ່
ເມື​ອງ Moore ​ໃນ​ວັນ​ອາທິດ​ວານ​ນີ້ ທ່ານ Obama ກ່າວ​ວ່າ ມັນ
“​ເປັນ​ທີ່​ເຂົ້າ​ໃຈ​ຍາກ” ກ່ຽວ​ກັບຄວາມ​ເສຍ​ຫາຍ ຈາກ​ພາຍຸ​ຫົວກຸດ
ທີ່​ມີ​ຄວາມ ແຮງ​ຂະໜາດ EF-5 ທີ່​ບໍ່​ສູ້​ເກີດ​ຂຶ້ນ​ ຊຶ່ງ​ມີຄວາມແຮງ
​ສຸດໃນລະດັບ ຂອງພາຍຸ​ຫົວກຸດຢູ່​ໃນ​ສະຫະລັດ​ນັ້ນ. ສິບຄົນ​ທີ່
ເສຍ​ຊີວິດ​ໄປ​ນັ້ນແມ່ນເດັກນ້ອຍ ຮວມ​ທັງ​ພວກ​ນັກຮຽນ​ອີກ7 ຄົນ
​ທີ່ຢູ່​ໃນ​ໂຮງຮຽນແຫ່ງ​ນັ້ນ ໃນ​ເວລາພາຍຸ​ພັດ​ເຂົ້າມາ.

ພາຍຸ​ຫົວກຸດລູກ​ນີ້ ຍັງ​ເຮັດ​ໃຫ້ 377 ຄົນ​ໄດ້​ຮັບ​ບາດ​ເຈັບ ​ແລະ​
ສ້າງ​ຄວາມ​ເສຍ​ຫາຍ​ໃຫ້​ແກ່ 1,200 ຫລັງ​ຄາ​ເຮືອນ ​ໂຮງຮຽນ
​ປະຖົມ​ອີກນຶ່ງ​ຫລັງ ​ແລະ​ໂຮງໝໍ​ນຶ່ງ​ຫລັງ. ຄວາມ​ເສຍ​ຫາຍ ​ຄາດ​ຄະ​ເນ​ວ່າ ຕົກ​ເປັນປະມານ
2 ພັນ​ລ້ານ​ໂດ​ລາ.



ໂດຍ​ມີຜູ້ປົກຄອງ​ລັດ Oklahoma ທ່ານນາງ Mary Fallin ​ແລະ​ ​ເຈົ້າ​ໜ້າ​ທີ່ຄົນ​ອຶ່ນໆ ຢືນ​ຢູ່​ຄຽງຂ້າງນັ້ນ ທ່ານ Obama ​ໄດ້​ຮຽກຮ້ອງ ໃຫ້​ຜູ້ຄົນພາກັນບໍລິຈາກ​ເງິນ ​ໃຫ້ແກ່ ສະພາກາ​ແດງອາ​ເມຣິກັນ ​ເພື່ອ​ຊ່ວຍ​ເຫລືອ​ເມືອງ Moore ​ໃຫ້​ຟື້ນ​ໂຕຄືນ​ມາ​ໃໝ່.

ທ່ານຍັງ​ໄດ້​ໃຫ້​ຄໍາ​ໝັ້ນ​ສັນຍາ​ວ່າ ​ຊາວ​ເມືອງຜູ້​ທີ່​ໄດ້​ຮັບ​ຄວາມ​ເສຍຫາຍ​ຢ່າງ​ໜັກນັ້ນ ຈະ​ໄດ້​ຮັບ​ການ​ຊ່ວຍ​ເຫລືອຈາກ ​FEMA ຫລືຫ້ອງການ​ຄຸ້ມ​ຄອງ​ໄພສຸກ​ເສີນ ຂອງລັດຖະບານ ​
ກາງ.

ທ່ານ​ໂອ​ບາ​ມາ ຍັງ​ໄດ້​ພົບປະ​ກັບ​ຊາວ​ເມືອງຜູ້​ລອດ​ຊີວິດມາ​ໄດ້ ​ແລະໄປຢ້ຽມຢາມສະຖານີ​
ລົດ​ດັບ​ເພິ​ງ ທີ່​ໄດ້ຖືກໃຊ້ເປັນ​ສູນ​ກາງບັນຊາ​ການ​ພວກພະນັກງາ​ນສຸກ​ເສີ​ນ ທີ່ທ່ານ​ຍ້ອງຍໍ​ສັນລະ​ເສີນ​ວ່າ ​ໄດ້​ຊ່ວຍ​ຫລາຍໆ​ຊີວິດ​ໄວ້​ໄດ້ນັ້ນ.

XS
SM
MD
LG