ລິ້ງ ສຳຫລັບເຂົ້າຫາ

ທ່ານ ໂອບາມາ ຈະເປີດເຜີຍ ແຜນ ຕັດການພົ່ນຄວັນພິດ ທາດຄາບອນ ອອກຈາກໂຮງໄຟຟ້າ


ປະທ​ານາ​ທິບໍດີ ສະຫະລັດ ທ່ານ ບາຣັກ ​ໂອ​ບາ​ມາ ​ພ້ອມ​ແລ້ວ​ທີ່​ຈະ​ເປີດ​ເຜີຍ​ກົດລະບຽບ​ໃໝ່​ໃນ​ວັນ​ຈັນ​ມື້​ນີ້ ​ແນ​ໃສ່​ການ​ຕັດ​ຄວັນ
​ພິ​ດທາດ ຄາບ​ອນ ​ເຊິ່ງພົ່ນອອກ​ມາ​ຈາກ​ບັນ​ດາ​ໂຮງ​ໄຟ​ຟ້າ​ແຫ່ງ​ຕ່າງໆ​ຂອງ​ປະ​ເທດ. ແຜນ​ພະ​ລັງ​ງາ​ນສະອາດຂອງ​ທ່ານ ​ໂອ​ບາ​ມາ​ຈະ​ຫຼຸດຜ່ອນ​ການ​ນຳ​ໃຊ້​ໄຟ​ຟ້າ​ຈາກ​ການ​ຈູດ​ຖ່ານ​ຫີ​ນ ​ແລະ ​ເຄື່ອນ​ຍ້າຍ​ໄປ​ສູ່ພະລັງງານ​ທົດແທນ.

​ເປົ້າ​ໝາຍ​ແມ່ນເພື່ອຫຼຸດຜ່ອນ​ການ​ປ່ອຍ​ຄວັນ​ພິ​ດທາດ ຄາບ​ອນໃຫ້​ໄດ້ 32 ​ເປີ​ເຊັນ​ຕ່ຳ​ກວ່າ​ລະດັບ​ຂອງ​ປີ 2005 ​ພາຍ​ໃນ​ປີ 2030 ຂອງ​ບັນດາ​ໂຮງ​ໄຟຟ້າ​ຕ່າງໆ.

​ແຕ່​ລະ​ລັດ ຈະ​ມີ​ຄວາມ​ຮັບຜິດຊອບໃນການຕັດ​ຂອງ​ຕົນ​ເອງ​ເພື່ອ​ໃຫ້​ບັນລຸ​ເປົ້າ​ໝາຍ, ​ແຕ່​ວ່າ​ພາຍ​ໃຕ້​ແຜ​ນການ​ໃໝ່​ນີ້​ພວກ​ເຂົາ​ເຈົ້າ​ຈະມີ​ເວລາ​ສອງ​ປີ​ເພື່ອ​ປະຕິບັດ​ຕາມ​ແຜນ​ດັ່ງກ່າວ. ​ແຜນການ​ນີ້ຈະ​ຕ້ອງ​ມີ​ຜົນ​ບັງຄັບ​ໃຊ້​ພາຍ​ໃນ​ປີ 2022.

ເຈົ້າໜ້າ​ທີ່​ທຳນຽບຂາວ​ກ່າວ​ວ່າ ກົດລະບຽບ​ສະບັບ​ໃໝ່ນີ້, ຖ້າ​ນຳ​ອອກ​ປະຕິບັດ​, ຈະເປັນ​ການ​ເພີ່ມ​ຈໍາ​ນວນ​ຂອງ​ພະລັງງານໃນ​ ສະຫະລັດ ທີ່​ຈະຜະລິດ​ໂດຍແຫຼ່ງ​ພະລັງງານ​ທົດ​ແທນເຖິງ 28 ​ເປີ​ເຊັນ.

ທ່ານ​ປະ​ທາ​ນາ​ທິບໍດີ​ໄດ້​ກ່າວໃນ​ວິ​ດີ​ໂອ ​ທີ່​ໄດ້ເອົາ​ລົງໃນ​ໜ້າ​ເຟສບຸກ ຂອງ​ທຳນຽບຂາ​ວ​ໃນ​ຕອນ​ເຊົ້າ​ຂອງ​ວັນ​ອາທິດວານນີ້ວ່າ ສະພາບ​ອາກາດ​ແມ່ນ​ກຳລັງ​ປ່ຽນ​ແປງ, ​ແລະ ວ່າ​ບັນ​ຫາ “ບໍ່​ແມ່ນເລື່ອງ​ສຳລັບ​ຄົນ​ຍຸກ​ຕໍ່​ໄປ.”

ທ່ານ ​ໂອ​ບາ​ມາ​ ​ໄດ້​ກ່າວ​ວ່າ “​ມັນ​ກຳລັງ​ປ່ຽນແປງໃນ​ທາງ​ທີ່​ ເປັນ​ໄພ​ຂົ່ມຂູ່​ຕໍ່​ເສດຖະກິດ, ຄວາມ​ໝັ້ນຄົງ​ຂອງ​ພວກ​ເຮົາ ​ແລະ ສຸ​ຂະ​ພາບ​ຂອງ​ພວກ​ເຮົາ.” “ນີ້ບໍ່​ແມ່ນ​ຄວາມ​ຄິດ​ເຫັນ, ມັນ​ແມ່ນ​ຂໍ້​ເທັດ​ຈິງ​ທີ່ໜູນ​ຫຼັງ​ໂດຍ​ຂໍ້​ມູນ​ທີ່​ໄດ້​ຖືກ​ເກັບ​ກຳ​ມາ ຢ່າງ​ລະ​ມັດ​ລະວັງ ເປັນ​ເວລາ​ຫຼາຍທົດ​ສະ​ວັດ ​ແລະ ຄວາມ​ຄິດ​ເຫັນ​ທາງ​ ດ້ານ​ວິທະຍາສາດຢ່າງ​ຖ້ວມ​ລົ້ນ.ແລະ ມັນ​ກໍ​ມີ​ຜົນ​ຕາມ​ມາ​ທີ່​ຮ້າຍ​ແຮງ​ສຳລັບ​ຮູບ​ແບບ​ການ​ດຳລົງ​ຊີວິດ​ຂອງ​ພວກ​ ເຮົາ​ໃນ​ປະຈຸ​ບັນ.”

XS
SM
MD
LG