ລິ້ງ ສຳຫລັບເຂົ້າຫາ

ປ. ໂອບາມາ ກ່າວປ້ອງກັນ ປະຫວັດ ຕໍ່ຕ້ານ ພວກກໍ່ການຮ້າຍ ຂອງທ່ານ


ປະທານາທິບໍດີໂອບາມາ ກ່າວຄຳປາໄສ ທີ່ຖານທັບອາກາດ MacDill ທີ່ເມືອງ Tampa ລັດ Florida. (6 ທັນວາ 2016)

ປະທານາທິບໍດີໂອບາມາ ກ່າວຄຳປາໄສ ທີ່ຖານທັບອາກາດ MacDill ທີ່ເມືອງ Tampa ລັດ Florida. (6 ທັນວາ 2016)

ປະທານາທິບໍດີ​ສະຫະລັດ ທ່ານ​ບາຣັກ ​ໂອ​ບາ​ມາ ​ໃຊ້​ຄຳ​ປາ​ໄສໃນ​ດ້ານ​ຄວາ​ມໝັ້ນຄົງ​ແຫ່ງ​ຊາດເທື່ອ​ສຸດ​ທ້າຍ​ ​ເພື່ອ​ປ້ອງ​ກັນ ​ປະຫວັດ​ຕໍ່ຕ້ານການ​ກໍ່​ການ​ຮ້າຍ​ຂອງ​ທ່ານ ​ແລະ​ວາງ​ໃນ​ອັນ​ທີ່ທ່ານ​ເຊື່ອ​ວ່າ ຄວນ​ເປັນ​ຫລັກການ​ນຳພາ ​ສຳລັບ​ລັດຖະບານ​ຊຸດ​ໃໝ່ ທີ່ຈະ​ເຂົ້າຮັບ​ໜ້າ​ທີ່ຢູ່​ທຳນຽບຂາວ ​ໃນ​ເດືອນ​ມັງກອນ​ນີ້.

​ໃນ​ການ​ກ່າວ​ຄຳ​ປາ​ໄສ ​ຕໍ່​ພວກ​ທະຫານ ທີ່​ຖານ​ທັບ​ອາກາດ McDill ຢູ່​ທີ່​ເມືອງTampa ​ລັດ​ຟລໍຣິດາ ​ໃນ​ວັນ​ອັງຄານ​ວານ​ນີ້ ທ່ານ​ໂອ​ບາ​ມາ ກ່າວ​ວ່າ ​“ໃນ​ໄລຍະ 8 ປີ​ທີ່​ຜ່ານ​ມາບໍ່​ມີອົງການ​ກໍ່​ການ​ຮ້າຍ ​ຕ່າງປະ​ເທດ​ໃດໆ ປະສົບ​ກັບຄວາມ​ສຳ​ເລັດ ​ໃນ​ການ​ວາງ​ແຜນ ​ແລະ​ປະຕິບັດ​ການ​ໂຈມ​ຕີ​ຕໍ່​ປະ​ເທດ​ຂອງ​ພວກ​ເຮົາ” ​ໂດຍ​ກ່າວ​ຕື່ມ​ວ່າ ບໍ່​ແມ່ນ​ວ່າ​ບໍ່​ໄດ້​ມີ​ການ​ພະຍາຍາມ. ທ່ານ​ກ່າວ​ຕໍ່​ພວກ​ທະຫານ​ວ່າ “ນີ້​ແມ່ນ​ວຽກ​ງານ​ຂອງ​ພວກ​ທ່ານ.”

ທ່ານ​ໂອ​ບາ​ມາ ​ໄດ້​ວາງກ່ຽວ​ກັບ​ອັນ​ທີ່​ທ່ານ​ມອງເຫັນ​ວ່າ​ເປັນ​ສະຖານະ​ພາບ​ຂອງການ​ຕໍ່ສູ້​ຕ້ານ​ພວກ​ກໍ່​ການ​ຮ້າຍ ຫລັງ​ຈາກ​ການເຂົ້າຮັບ​ຕຳ​ແໜ່​ງສອງ​ສະ​ໄໝ​ຂອງທ່ານ​ແລ້ວ ​ໂດຍ​ໄດ້​ຮັບ​ສຽງ​ຕົບມື​ດັ່ງ​ກ້ອງ​ສະໜັ່ນ​ຂຶ້ນ​ເວລທ່ານ​ກ່າວ​ວ່າ ຜູ້ນຳ​ກຸ່ມກໍ່​ການ​ຮ້າຍອາລກາ​ອີ​ດາ ທ້າ​ວ​ໂອ​ຊາ​ມາ ບິນ​ລາ​ເດັນ ​ໄດ້​ຕາຍ​ໄປ​ແລ້ວ. ທ່ານ​ໃຫ້​ຂໍ້​ສັງ​ເກດ​ດ້ວຍ​ຄວາມ​ພາກພູມ​ໃຈ​ວ່າ ​ເວລາ​ທ່ານ​ເຂົ້າຮັບ​ຕຳ​ແໜ່​ງຍັງ​ມີ​ທະຫານ​ສະຫະລັດ 180,000 ຄົນ​ຢູ່​ທີ່​ປະ​ເທດ​ອີຣັກ ແລະ​ອັຟກາ​ນິສຖານໂດຍ​ເວົ້າວ່າ ຈຳນວນ​ດັ່ງກ່າວ​ເວລາ​ນີ້​ໄດ້​ຫລຸດ​ລົງ​ເຫລືອ​ຢູ່ 15,000 ຄົນ.

ທ່ານ​ກ່າວ​ວ່າ ການ​ຫລຸດ​ລົງ​ຂອງ​ກຳລັງ​ພາກພື້ນດິນ​ສະຫະລັດ ​ທີ່​ຖືກ​ສົ່ງ​ໄປ​ປະຈຳ​ການຢູ່​ໃນ​ເຂດ​ສະໝໍລະພູມນັ້ນ ​ແມ່ນ​ຂີດ​ໝາຍ​ຂອງ​ການ​ປ່ຽນ​ແປງ ​ໃນ​ຍຸດທະ​ສາດ​ ເພື່ອ​ກາງ​ຕໍ່​ຫລາຍ​ຂຶ້ນ​ໃນ​ການ​ສ້າງ​ກຳລັງ​ແນວ​ໂຮມ​ນາໆ​ຊາດ​ທີ່​ມີ​ຄວາມເຂັ້ມ​ແຂງແລະ​ກາງ​ຕໍ່​ຄູ່​ຮ່ວມ​ງານ​ໃນ​ເຂດ​ທ້ອງ​ຖິ່ນ ​ເພື່ອ​ຈະ​ຫຼຸດຜ່ອນ​ການ​ບາດ​ເຈັບ​ລົ້ມຕາຍ ​ຂອງ​ທະຫານ​ອາ​ເມຣິກັນ​ແລະ​ຄ່າ​ໃຊ້​ຈ່າຍ​ຕ່າງໆ​ລົງ.

ການ​ປ່ຽນ​ແປງ​ໃນ​ຍຸດທະ​ສາດ​ດັ່ງກ່າວແມ່ນ​ຮວມທັງ​ການ​ໂຈມ​ຕີເພີ້ມຂຶ້ນໂດຍ​ເຮືອບິນ​ບໍ່​ມີ​ຄົນ​ຂັບ ທີ່​ແນ​ເປົ້າໝາຍ​ໃສ່​ພວກ​ກໍ່​ການ​ຮ້າຍ ​ໃນ​ລະຫວ່າງ​ການ​ດຳ ລົງ​ຕຳ​ແໜ່​ງຂອງ​ທ່ານ​ໂອ​ບາ​ມາ. ທ່ານ​ຮັບ​ຮູ້​ເຖິງ​ການ​ຂາດ​ຂໍ້​ມູນ ​ຢ່າງ​ສົມບູນ​ ໃນການ​ໂຈມ​ຕີ​ເຫລົ່ານີ້ ​ແລະ​ການ​ເສຍ​ຊີວິດ​ຂອງ​ພົນລະ​ເຮືອນ​ທີ່​ເປັນ​ຜົນ​ມາ​ຈາກການ​ໂຈມ​ຕີແຕ່​ກໍ​ກ່າວ​ວ່າ ​ເຮືອບິນ​ບໍ່​ມີ​ຄົນ​ຂັບ​ແມ່ນ​ແມ່ນ​ຍຳ​ ກວ່າ​ການ​ໂຈມ​ຕີ​ທາງອາກາດ ​ແລະ​ມີ​ຄວາມ​ເປັນ​ໄປ​ໄດ້​ໜ້ອຍ​ລົງທີ່​ຈະ​ພາ​ໃຫ້​ມີ​ການ​ເສຍ​ຊີວິດ​ຂອງ​ພົນລະ​ເຮືອນ​ທີ່​ບໍ່​ມີ​ຄວາມ​ຜິດໜ້ອຍ​ກວ່າ​ການ​ສົ່ງ​ກຳລັງ​ທະ ຫານ​ໄປ​ບຸກລຸກ​ທາງ ພາກພື້ນດິນ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG