ການໂຄສະນາຫາສຽງໃນການເລືອກຕັ້ງປະທານາທິບໍດີສະຫະລັດ ໄດ້ເຄື່ອນຍ້າຍ ໄປຍັງລັດ Carolina ເໜືອ ໃນພາກໃຕ້ຂອງປະເທດ ໃນວັນອັງຄານມື້ນີ້ ຊຶ່ງທັງສອງ ຜູ້ສະໝັກ ຈາກພັກ Republican ທ່ານ Donald Trump ແລະຈາກພັກ Democrat ທ່ານນາງ Hillary Clinton ໄດ້ພາກັນຈັດການໂຄສະນາຫາສຽງຢູ່ທີ່ນັ້ນ.
ທ່ານ Trump ຈະຂຶ້ນເວທີຫາສຽງໃນຕອນແລງທີ່ເມືອງ Raleigh ຊຶ່ງເປັນເມືອງຫຼວງ ຂອງລັດ.
ບໍ່ເທົ່າໃດຊົ່ວໂມງກ່ອນໜ້ານັ້ນທ່ານນາງ Clinton ຈະທຳການຫາສຽງໃນເມືອງ Charlotte ປະມານ 200 ຫຼັກກິໂລແມັດຫ່າງອອກ ໃນຂະນະທີ່ປະທານາທິບໍດີ ສະຫະລັດທ່ານ ບາຣັກ ໂອບາມາ ຈະໄດ້ປະກົດຕົວເປັນຄັ້ງທຳອິດ ທີ່ສະໜັບສະໜຸນ ທ່ານນາງ ຜູ້ຊຶ່ງໄດ້ຮັບໃຊ້ເປັນລັດຖະມົນຕີການຕ່າງປະເທດ ໃນສະໄໝທຳອິດຂອງ ທ່ານນັ້ນ.
“ຂ້າພະເຈົ້າຫວັງວ່າຈະເຂົ້າຮ່ວມຫາສຽງນຳກັນ” ຊຶ່ງເປັນຂໍ້ຄວາມທີ່ທ່ານນາງ Clinton ໄດ້ຂຽນລົງໃນ twitter ພ້ອມກັບວີດີໂອຂອງປະທານາທິບໍດີ ທີ່ໄດ້ອັດໄວ້ ໃນເດືອນແລ້ວນີ້ ໃນຕອນທີ່ທ່ານໄດ້ບອກວ່າ ຈະສະໜັບສະໜຸນທ່ານນາງນັ້ນ.
ແປດປີ ທີ່ແລ້ວ ທ່ານ ໂອບາມາ ແລະທ່ານນາງ Clinton ໄດ້ແຂ່ງຂັນກັນໃນການ ເລືອກຕັ້ງຂັ້ນຕົ້ນຢ່າງດຸເດືອດ ທີ່ສິ້ນສຸດລົງດ້ວຍທ່ານໂອບາມາ ທີ່ໄດ້ຖືກເລືອກ ໃຫ້ເປັນຕົວແທນຂອງພັກ Democrat ແລະທ່ານນາງ Clinton ກໍໄດ້ຊ່ອຍຫາສຽງ ໃຫ້ທ່ານໃນການເລືອກຕັ້ງທົ່ວປະເທດ ຕໍ່ສູ້ກັບທ່ານ John McCain ສັງກັດພັກ Republican.
ປະຈຸບັນນີ້ ທ່ານໂອບາມາ ແມ່ນໜຸນຫຼັງໃຫ້ທ່ານນາງ Clinton ເພື່ອຊອກຫາຊ່ອງ ທາງທີ່ຈະໃຫ້ພັກ Democrat ສືບຕໍ່ກຳຕຳແໜ່ງຢູ່ໃນທຳນຽບຂາວແລະດຳເນີນນະໂຍ ບາຍຂອງທ່ານທີ່ໄດ້ຮັບໄຊຊະນະມາແລ້ວ. ການສະໜັບສະໜຸນຂອງທ່ານນັ້ນ ແມ່ນມີຂຶ້ນໃນຂະນະທີ່ຄະແນນນິຍົມກ່ຽວກັບນະໂຍລາຍຂອງທ່ານ ໄດ້ສູງຂຶ້ນກວ່າຊ່ວງເວລາໃດໆ ທີ່ຜ່ານມາ ເກືອບ 4 ປີນັ້ນ.
ທ່ານ Trump ບໍ່ແມ່ນນຶ່ງໃນພວກທີ່ຄິດວ່າ ທ່ານ ໂອບາມາ ນັ້ນ ປະຕິບັດໜ້າໄດ້ດີ. ໃນເດືອນພຶດສະພາຜ່ານມາ ທ່ານ Trump ເອີ້ນທ່ານ ໂອບາມາ ວ່າ “ເປັນປະທານາທິ ບໍດີທີ່ຂີ້ຮ້າຍທີ່ສຸດໃນປະຫວັດສາດສະຫະລັດ.”