ປະທານາທິບໍດີຝຣັ່ງ ທ່ານ Francois Hollande ຊຸກຍູ້ໃຫ້ມະຫາອຳນາດຂອງໂລກເຮັດວຽກໃກ້ຊິດກັນຫລາຍຂຶ້ນ ເພື່ອຕໍ່ສູ້ກັບພວກຫົວຮຸນແຮງລັດອິສລາມ ຊຶ່ງທ່ານເດີນທາງມາຍັງສະຫະລັດໃນວັນອັງຄານມື້ນີ້ ເພື່ອພົບປະແລະປຶກສາກັບປະທານາທິບໍດີສະຫະລັດທ່ານ ບາຣັກ ໂອບາມາ.
ທ່ານ Hollande ໄດ້ທຳການຕ້ອນຮັບນາຍົກລັດຖະມົນຕີອັງກິດທ່ານ David Cameron ໃນວັນຈັນວານນີ້ ແລະຈະຈັດໃຫ້ມີການໂອ້ລົມກັນເປັນການສ່ວນຕົວ ໃນທ້າຍສັບປະດານີ້ ກັບບັນດາຜູ້ນຳຂອງຣັດເຊຍ ຈີນ ເຢຍຣະມັນ ແລະ ອີຕາລີ.
ທຳນຽບຂາວໄດ້ກ່າວວ່າ ທ່ານ Obama ແລະທ່ານ Hollande ຈະປຶກສາຫາລືກັນ “ໃນ ການຮ່ວມມືກັນຕື່ມຂຶ້ນ” ອັນເປັນພາກສ່ວນນຶ່ງຂອງແນວໂຮມທີ່ນຳພາໂດຍສະຫະລັດ ເພື່ອປະຕິບັດໂຈມຕີທາງອາກາດ ຕໍ່ກຸ່ມລັດອິສລາມ ໃນອີຣັກແລະຊີເຣຍ ທີ່ໄດ້ດຳເນີນມາປີກວ່າແລ້ວນັ້ນ.
ໂຄສົກທຳນຽບຂາວທ່ານ Josh Earnest ໄດ້ສະແດງຄວາມຍິນດີນຳການຂະຫຍາຍການ
ປະຕິບັດງານ ໂຈມຕີທາງອາກາດຂອງຝຣັ່ງ ແລະຍັງໄດ້ກ່າວຕື່ມວ່າ ສະຫະລັດເຊື່ອວ່າ
“ຍັງມີຫຼາຍສິ່ງ ຫຼາຍຢ່າງທີ່ຈະສາມາດປະຕິບັດໄດ້ ຖ້າຫາກວ່າປະເທດຕ່າງໆເຕັມໃຈທີ່ຈະໃຫ້ການປະກອບສ່ວນ ທາງດ້ານຊັບພະຍາກອນ ເພີ້ມຕື່ມ.”
ທ່ານໄດ້ກ່າວວ່າ ສະຫະລັດເທົ່າເຖິງປັດຈຸບັນນີ້ ແມ່ນໃຫ້ການຊ່ອຍເຫຼືອທາງດ້ານມະນຸດ ສະທຳ ແລະຄວາມພະຍາຍາມທາງດ້ານທະຫານ ຫຼາຍກວ່າໝູ່ ແຕ່ວ່າ ປະເທດນີ້ແມ່ນມີຄວາມສາມາດພິເສດບາງຢ່າງທີ່ເປັນເອກກະລັກ ແລະກໍມີຄວາມຍິນດີທີ່ຈະໃຫ້ການຊ່ອຍເຫຼືອ.
ທ່ານ Cameron ໄດ້ສະເໜີໃຫ້ການຊ່ອຍເຫຼືອຝຣັ່ງໃນວັນຈັນວານນີ້ ເພື່ອທຳການໂຈມຕີທາງອາກາດຕໍ່ກຸ່ມລັດອິສລາມ ໃນຊີເຣຍ ແລະໄດ້ກ່າວວ່າ ທ່ານຈະຖາມລັດຖະສະພາອັງ ກິດ ໃນທ້າຍສັບປະດານີ້ ເພື່ອໃຫ້ການອະນຸມັດຕໍ່ຂໍ້ສະເໜີໃຫ້ເຂົ້າຮ່ວມຕໍ່ສູ້ກັບພວກຫົວ ຮຸນແຮງຈັດ ທີ່ເອີ້ນວ່າ Jihadists.
ທ່ານໄດ້ບອກກັບທ່ານ Hollande ວ່າ ເຮືອບິນລົບອາຍພົ່ນຂອງຝຣັ່ງ ສາມາດໃຊ້ຖານທັບ ອາກາດອັງກິດ ໃນ Cyprus ເພື່ອປະຕິບັດການໂຈມຕີເປົ້າໝາຍຂອງພວກກຸ່ມລັດອິສລາມ ພ້ອມນີ້ຍັງໄດ້ສະເໜີໃຫ້ການຊ່ອຍເຫຼືອເພື່ອຕື່ມນ້ຳມັນກາງອາກາດນຳດ້ວຍ.
