ໜັງສືພິມທີ່ສຳຄັນສະບັບນຶ່ງຂອງຍີ່ປຸ່ນລາຍງານວ່າ ປະທານາທິບໍດີສະຫະລັດ ທ່ານບາ ຣັກ ໂອບາມາ ຈະເດີນທາງໄປຢ້ຽມຢາມ ນະຄອນຮິໂຣຊິມະ ເວລາທ່ານເດີນທາງໄປປະເທດຍີ່ປຸ່ນເພື່ອເຂົ້າຮ່ວມກອງປະຊຸມຂອງກຸ່ມຈີ 7 ໃນເດືອນໜ້ານີ້.
ການຢຸດແວ່ທີ່ນະຄອນຮິໂຣຊິມາ ຈະເຮັດໃຫ້ທ່ານໂອບາມາກາຍເປັນປະທານາທິບໍດີຄົນ ທຳອິດທີ່ຍັງກຳຕຳແໜ່ງຂອງສະຫະລັດເດີນທາງໄປຢ້ຽມຢາມນະຄອນດັ່ງກ່າວ ທີ່ໄດ້ຮັບຄວາມເສຍຫາຍຢ່າງຮ້າຍແຮງເວລາສະຫະລັດຖິ້ມລະເບີດປະລະມານູລົງໃສ່ ທີ່ນຳໄປສູ່ການສິ້ນສຸດລົງຂອງສົງຄາມໂລກຄັ້ງທີສອງ. ການຖິ້ມລະເບີດໃສ່ນະຄອນຮິໂຣຊິມະເຮັດໃຫ້ມີຜູ້ເສຍຊີວິດປະມານ 140,000 ຄົນ. 3 ມື້ຕໍ່ມາສະຫະລັດໄດ້ຖິ້ມລະເບີດປະລະມານູລູກທີສອງລົງໃສ່ນະຄອນນາກາຊາກິ ເຮັດໃຫ້ມີຜູ້ເສຍຊີວິດປະມານ 70,000 ຄົນ.
ໜັງສືພິມທຸລະກິດລາຍວັນ Nikkei ອອກຂ່າວໃນວັນສຸກວານນີ້ ໂດຍອ້າງແຫຼ່ງຂ່າວສະ ຫະລັດທີ່ຂໍສະຫງວນຊື່ເວົ້າວ່າ ນາຍົກລັດຖະມົນຕີ Sinzo Abe ຂອງຍີ່ປຸ່ນຈະຮ່ວມຕິດ ຕາມປະທານາທິບໍດີໂອບາມາ ໃນລະຫວ່າງການຢ້ຽມຢາມນະຄອນຮິໂຣຊິມະ.
ແຫຼ່ງຂ່າວທີ່ບໍ່ເປີດເຜີຍຊື່ກ່າວຕໍ່ໜັງສືພິມ Nikkei ວ່າ ວໍຊິງຕັນຈະແຈ້ງໃຫ້ຍີີ່ປຸ່ນຊາບຢ່າງເປັນທາງການໃນຕົ້ນເດືອນໜ້ານີ້ກ່ຽວກັບແຜນການໄປຢ້ຽມຢາມນະຄອນຮິໂຣຊິມະຂອງ ທ່ານໂອບາມາ.
ມີການຖາມປະທານາທິບໍດີໂອບາມາໃນວັນສຸກວານນີ້ລະຫວ່າງກອງປະຊຸມຖະແຫຼງຂ່າວຮ່ວມກັບນາຍົກລັດຖະມົນຕີອັງກິດ ທ່ານ David Cameron ທີ່ນະຄອນຫວງລອນດອນ ກ່ຽວກັບການເດີນທາງ ໄປຢ້ຽມຢາມນະຄອນຮິໂຣຊິມະ. ທ່ານໄດ້ບອກພວກນັກຂ່າວວ່າ ໃຫ້ລໍຖ້າໄປຈົນກວ່າທ່ານເດີນທາງໄປຢ້ຽມຢາມເອເຊຍກ່ອນ ຈຶ່ງຖາມຄຳຖາມກ່ຽວກັບເອເຊຍ.
ຂະນະດຽວກັນ ທ່ານ Yoshihide Suga ຫົວໜ້າກອງເລຂາປະຈຳຄະນະລັດຖະບານຍີ່ ປຸ່ນກ່າວວ່າ ເລື້ອງລາວກ່ຽວກັບການເດີນທາງໄປຢ້ຽມຢາມນະຄອນຮິໂຣຊິມະຂອງທ່ານໂອບາມານັ້ນ ບໍ່ເປັນຄວາມຈິງ. ທ່ານກ່າວຕື່ມວ່າ ແນວໃດກໍຕາມ ມັນເປັນເລື້ອງທີ່ສຳຄັນຫຼາຍສຳລັບຍີ່ປຸ່ນ ທີ່ພວກຜູ້ນຳຂອງໂລກ ເດີນທາງໄປຢ້ຽມຢາມນະຄອນຮິໂຣຊິມະ ເພື່ອເຂົ້າໃຈສະພາບການໂຕຈິງກ່ຽວກັບຄວາມທຸກທໍລະມານທີ່ເກີດຈາກລະເບີດປະລະມານູ.
