ປະທານາທິບໍດີສະຫະລັດ ທ່ານ ບາຣັກ ໂອບາມາ ໄດ້ສົ່ງຄຳອວຍ
ພອນປີໃໝ່ ໄປເຖິງປະຊາຊົນຊາວອີຣ່ານ ໂດຍບອກພວກເຂົາເຈົ້າ
ວ່າ ປີນີ້ ເປັນປີທີ່ມີ “ໂອກາດດີທີ່ສຸດໃນຮອບຫຼາຍທົດສະວັດ”
ເພື່ອໃຫ້ໄດ້ ມາຊຶ່ງສາຍສຳພັນທີ່ແຕກຕ່າງ ລະຫວ່າງສອງປະເທດ
ຂອງພວກເຮົາ.
ຄຳຖະແຫລງຂອງທ່ານໂອບາມາ ຕໍ່ຊາວອີຣ່ານ ໃນຂະນະທີ່ພວກ
ເຂົາເຈົ້າກຳລັງສະເຫຼີມສະຫຼອງວັນປີໃໝ່ ຫຼື Nowruz ຢູ່ນັ້ນ ຊຶ່ງມີ
ຂຶ້ນໃນຂະນະທີ່ເສັ້ນຕາຍ ໃນວັນທີ 31 ມີນາ ຫຍັບໃກ້ເຂົ້າມາ ເພື່ອ
ໃຫ້ບັນລຸຂອບຂອງຂໍ້ຕົກລົງ ໃນການຈຳກັດໂຄງການນິວເຄລຍ
ຂອງອີຣ່ານ ເພື່ອເປັນການແລກປ່ຽນກັບການຍົກເລີກມາດຕະການລົງໂທດ ຂອງສາກົນ ຕໍ່ Tehran ນັ້ນ.
ທ່ານ ໂອບາມາ ເວົ້າວ່າ “ໂອກາດນີ້ ອາດຈະບໍ່ມີມາອີກ ໃນໄວໆນີ້. ຂ້າພະເຈົ້າເຊື່ອ
ວ່າ ປະເທດພວກເຮົາ ມີໂອກາດທີ່ເປັນປະຫວັດສາດເພື່ອແກ້ໄຂບັນຫານີ້ດ້ວຍ
ສັນຕິວິທີ ເປັນໂອກາດ ທີ່ພວກເຮົາບໍ່ຄວນພາດ.”
ໃນການຖະແຫຼງທີ່ເປັນວີດີໂອນັ້ນ ທ່ານ ໂອບາມາ ກ່າວວ່າ ບັນດາຜູ້ນຳຂອງອີຣ່ານ ຄວນ
ເລືອກລະຫວ່າງອັນທີ່ທ່ານເອີ້ນວ່າ ຂໍ້ຕົກລົງນິວເຄລຍທີ່ “ສົມມາສົມຄວນ” ຊຶ່ງທ່ານ
ກ່າວອີກວ່າ ອາດຈະເຮັດໃຫ້ການໂດດດ່ຽວຈາກນາໆຊາດຂອງອີຣ່ານ ສິ້ນສຸດລົງ ແລະ ຈະສະໜອງ “ໂອກາດຕ່າງໆອັນກວ້າງຂວາງ ສຳຫລັບພົນລະເມືອງອີຣ່ານ.”
ຖ້າຫາກຂໍ້ຕົກລົງບໍ່ສາມາດບັນລຸໄດ້ ປະທານາທິບໍດີ ກ່າວວ່າ ອີຣ່ານ ຈະສືບຕໍ່ “ເດີນໄປ
ຕາມເສັ້ນທາງທີ່ຕົນເດີນໄປໃນມື້ນີ້ ນັ້ນກໍຄືເສັ້ນທາງທີ່ເຮັດໃຫ້ອີຣ່ານ ແລະ
ພົນລະເມືອງອີຣ່ານ ຖືກໂດດດ່ຽວຈາກສ່ວນໃຫຍ່ຂອງໂລກ ທີ່ເປັນເຫດເຮັດໃຫ້
ພວກຄອບຄົວຊາວອີຣ່ານ ຕົກທຸກໄດ້ຍາກ ແລະ ກີດກັ້ນພວກຊາວໜຸ່ມອີຣ່ານ
ບໍ່ໃຫ້ມີວຽກເຮັດງານທຳ ແລະ ໂອກາດຕ່າງໆທີ່ພວກເຂົາເຈົ້າຄວນໄດ້ຮັບນັ້ນ.”
ລັດຖະມົນຕີຕ່າງປະເທດອີຣ່ານ ທ່ານ Mohammad Javad Zarif ກ່າວໃນວັນສຸກມື້ນີ້
ຜ່ານທາງ Twitter ວ່າ “ຊາວອີຣ່ານ ໄດ້ຕັດສິນໃຈກ່ຽວກັບທາງເລືອກ ຂອງພວກ
ເຂົາເຈົ້າແລ້ວ ນັ້ນກໍຄື ພົວພັນດ້ວຍກຽດສັກສີ. ມັນເປັນເວລາທີ່ສຳຄັນ ສຳຫລັບ
ສະຫະລັດ ແລະ ບັນດາພັນທະມິດຂອງຕົນ ທີ່ຈະເລືອກເອົາ ລະຫວ່າງ ຄວາມ
ກົດດັນ ຫຼື ຂໍ້ຕົກລົງ.”
