ປະທານາທິບໍດີສະຫະລັດທ່ານບາຣັກໂອບາມາທຳການຮຽກຮ້ອງອີກຄັ້ງນຶ່ງໃຫ້ຢຸດເຊົາການ
ຜ່ອນຜັນທາງດ້ານພາສີໃນມູນຄ່າ 4 ພັນລ້ານໂດລາໃຫ້ແກ່ບໍລິສັດນໍ້າມັນແລະແກັສທຳມະ
ຊາດ ທີ່ໄດ້ກຳໄລໃນມູນຄ່າຫຼາຍໆພັນລ້ານໂດລາ ຂະນະທີ່ລາຄານໍ້າມັນແພງຂຶ້ນນັ້ນ.
ໃນການກ່າວຄຳປາໄສປະຈຳສັບປະດາຂອງທ່ານໃນວັນເສົາມື້ນີ້ ທ່ານໂອບາມາເວົ້າວ່າ
ການຜ່ອນຜັນທາງດ້ານພາສີດັ່ງກ່າວ ແມ່ນເປັນສິ່ງທີ່ບໍ່ຖືກຕ້ອງແລະກໍບໍ່ສະຫຼາດສ່ອງໃສ
ແລະຄວນຈະມີການຢຸດເຊົາ.
ປະທານາທິບໍດີ ໄດ້ຮຽກຮ້ອງໃຫ້ລັດຖະສະພາສະຫະລັດ ດຳເນີນການຕາມຄຳຮ້ອງຂໍ
ຂອງທ່ານ ແຕ່ສະມາຊິກຂອງພັກຣີພັບບລີກັນກ່າວວ່າ ແຜນການຂອງທ່ານຈະເຮັດໃຫ້
ຊາວອະເມຣິກັນສູນເສຍວຽກເຮັດງານທຳ.
ໃນຄຳປາໄສຕອບປະຈຳສັບປະດາຂອງພັກຣີພັບບລີກັນນັ້ນ ສະມາຊິກສະພາຕໍ່າ
James Lankford ກ່າວວ່າ ຈາກການຍອມຮັບຂອງປະທານາທິບໍດີເອງທີ່ວ່າການຢຸດ
ເຊົາການໃຫ້ເງິນອຸດໜຸນຕໍ່ບັນດາບໍລິສັດນໍ້າມັນໃຫຍ່ໆນັ້ນ ຈະບໍ່ມີຜົນກະທົບໃນທັນທີ
ຕໍ່ລາຄານໍ້າມັນ.
