ລິ້ງ ສຳຫລັບເຂົ້າຫາ

ປ. ໂອບາມາ ນຳສະເໜີ ມາດຕະການໃໝ່ ເພື່ອຊ່ອຍຊາວອະເມຣິກັນ (ເບິ່ງວີດີໂອ)

  • ໄພສານ ວໍຣະຈັກ

ປະທານາທິບໍດີບາຣັກໂອບາມາ ແລະເຈົ້າຄອງນະຄອນ San Francisco ທ່ານ Ed Lee (ຊ້າຍ) ລຸນຫຼັງທີ່ ປະທານາທິບໍດີ ໄດ້ເດີນທາງໄປເຖິງສະໜາມບິນນາໆຊາດນະຄອນ San Francisco (25 ຕຸລາ 2011)

ວັນ​ຈັນ​ຜ່ານ​ມາ​ນີ້ ປະທານາທິບໍດີບາຣັກໂອບາມາ​ໄດ້ເດີນທາງໄປຢ້ຽມຢາມພາກຕາເວັນຕົກ ສະຫະລັດເປັນເວລາ 3 ມື້ແລະ​ໄດ້​ໃຊ້​ໂອກາດ​ນີ້ປະກາດມາດຕະການຈຳນວນນຶ່ງເພື່ອຊ່ອຍ ເຫຼືອຊາວອະເມຣິກັນ ທີ່ໄດ້ຮັບຜົນກະທົບຈາກສະພາບເສດຖະກິດຕົກຕໍ່າຂອງປະເທດແລະ ຫຼີກເວັ້ນຈາກການຂັດຂວາງ ຂອງພັກຝ່າຍຄ້ານຣີພັບບລີກັນ ຕໍ່ແຜນການສ້າງວຽກເຮັດງານ ທໍາຂອງທ່ານນັ້ນ. Dan Robinson ຜູ້ສື່ຂ່າວຂອງວີໂອເອປະຈຳທຳນຽບຂາວ ມີລາຍງານ ກ່ຽວກັບເລື່ອງນີ້

ປະທານາທິບໍດີໂອບາມາໄດ້ເລືອກເອົາລັດ Nevada ບ່ອນທີ່ລາຄາເຮືອນໄດ້ຕົກຮວບລົງ
ຢ່າງຫຼວງຫຼາຍ​ໃນ​ບໍ່​ເທົ່າ​ໃດ​ປີຜ່ານມາ​ນີ້ ແລະການຢຶດເອົາເຮືອນຄືນ​ໂດຍ​ທະນາຄານມີອັດ
ຕາສູງທີ່ສຸດບ່ອນນຶ່ງຢູ່ໃນປະເທດນັ້ນ​ ເປັນ​ບ່ອນເປີດເຜີຍ ກ່ຽວກັບ​ມາດຕະການຊຸດ​ທໍາ​ອິດ
ໃນຈຳນວນຫຼາຍໆຊຸດຂອງລັດຖະບານທ່ານເພື່ອຊ່ອຍບັນເທົາຄວາມກົດດັນທາງດ້ານເສດ
ຖະກິດ ຕໍ່ຊາວອະເມຣິກັນນັ້ນ.

ປະທານາທິບໍດີໂອບາມາ ທີ່ຢືນຢູ່ເທິງລະບຽງເຮືອນຫຼັງນຶ່ງໃນນະຄອນ Las Vegas ໄດ້
ປະກາດ ກ່ຽວກັບການປ່ຽນແປງຫລາຍ​ຢ່າງ ເພື່ອເຮັດໃຫ້ເປັນການງ່າຍຂຶ້ນສຳລັບເຈົ້າຂອງ
ເຮືອນທີ່ກູ້ຢືມເງິນຊື້​ເຮືອນ ແບບໄດ້ຮັບການຄໍ້າປະກັນຈາກລັດຖະບານກາງສະຫະລັດ​ແລະ ພວມດີ້ນຮົນບໍ່ຢາກໃຫ້ເຮືອນຖືກຢຶດນັ້ນສາມາດຈ່າຍຄ່າເຮືອນ​ໄດ້ຖືກລົງ.

ທ່ານໂອບາມາເວົ້າວ່າ “ຂ້າພະເຈົ້າຈະສືບຕໍ່ດຳເນີນການທຸກສິ່ງຢ່າງທີ່ຢູ່ໃນອຳນາດ
ຂອງຂ້າພະເຈົ້າເພື່ອຊ່ອຍສ້າງຄວາມທຸ່ນທ່ຽງໃຫ້ແກ່ຕະຫຼາດຊື້ເຮືອນ ຊ່ວຍເຮັດ​
ໃຫ້​ເສດຖະກິດ​ເຕີບ​ໂຕ ຊ່ອຍເລັ່ງລັດ ການສ້າງວຽກເຮັດງານທຳ ແລະຟື້ນຟູ
ຄວາມໝັ້ນຄົງຄືນ​ມາ​ໃນ​ລະດັບ​ໃດ​ລະດັບ​ນຶ່ງສຳລັບຄອບຄົວພວກຄົນຊັ້ນກາງທີ່
ຮູ້ສຶກວ່າໄດ້ສູນ​ເສຍຄວາມໝັ້ນຄົງນັ້ນໄປເປັນ​ເວລານຶ່ງທົດສະວັດກວ່າໆມາແລ້ວ
ນັ້ນ.”

ການປ່ຽນແປງດັ່ງ​ກ່າວ ຊຶ່ງມີຂຶ້ນໃນຮູບຂອງດຳລັດລັດຖະບານນັ້ນແມ່ນເພີ່ມຕື່ມໃສ່ບາດ
ກ້າວຕ່າງໆທີ່ໄດ້ດໍາ​ເນີນ​ໄປໃນປີ 2009 ເພື່ອຊ່ອຍ​ໃຫ້ເຈົ້າຂອງ​ເຮືອນສາມາດກູ້ຢືມເງິນ
ໃໝ່​ໄດ້ນັ້ນແຕ່ໄດ້ປະສົບຄວາມສຳເລັດໜ້ອຍຫຼາຍກວ່າທີ່ລັດຖະບານທ່ານໂອບາມາຄາດ
ຫວັງໄວ້.

ໃນການຖະແຫຼງຕໍ່ພວກນັກຂ່າວນັ້ນທ່ານ Jay Carney ໂຄສົກຂອງທຳນຽບຂາວບໍ່ໄດ້
ໃຫ້ການກະປະມານວ່າການປ່ຽນແປງທີ່ວ່ານີ້ຈະຊ່ອຍພວກເຈົ້າຂອງເຮືອນໄດ້​ໃນ​ຈໍານ​ວນ
ຫຼາຍຄົນສໍ່າໃດ. ທ່ານເວົ້າວ່າ ມາດຕະການເຫຼົ່ານີ້ບໍ່ແມ່ນສິ່ງທົດແທນສຳລັບອັນທີ່ລັດຖະ
ສະພາສາມາດ​ເຮັດ​ໄດ້ ເພື່ອໃຫ້ການອະນຸມັດ ຕໍ່ຂໍ້ສະເໜີຕ່າງໆ ໃນການສ້າງວຽກການ
ເຮັດຂອງປະທານາທິບໍດີນັ້ນ.

ເຖິງແມ່ນ ສະມາຊິກຂອງພັກຣີພັບບລີກັນ ໄດ້ສະກັດກັ້ນ ແຜນການສ້າງວຽກເຮັດງານທຳ
ໂດຍລວມຂອງທ່ານໂອບາມາຢູ່ທີ່ສະພາຕໍ່າແລ້ວກໍຈິງແຕ່ສະມາຊິກພັກເດໂມແຄຣັທເປັນຜູ້ ຄວບຄຸມສະພາສູງຂອງສະຫະລັດ ພາຍໃຕ້ການນຳພາຂອງທ່ານ Harry Reid ຈາກລັດ
Nevada ກໍຈະນຳເອົາບາງພາກສ່ວນຂອງຮ່າງກົດໝາຍສະບັບນີ້ມາລົງຄະແນນສຽງກັນ.

ໃນການຖະແຫຼງ ທີ່ນະຄອນ Las Vegas ນັ້ນ ປະທານາທິບໍດີໂອບາມາໄດ້ໃຊ້ຄຳຂວັນ
ໃໝ່ “ພວກເຮົາບໍ່ສາມາດລໍຖ້າໄດ້ອີກແລ້ວ” ເພື່ອກົດດັນຕໍ່ອັນທີ່ທ່ານເອີ້ນວ່າລັດຖະສະພາ
ທີ່ບໍ່ເຮັດໜ້າທີ່ຂອງຕົນນັ້ນ ໃຫ້ດຳເນີນການເພື່ອຮັບຮອງເອົາຮ່າງກົດໝາຍ ສ້າງວຽກເຮັດ
ງານທຳຂອງທ່ານນັ້ນ.

ທ່ານໂອບາມາກ່າວວ່າ “ຂ້າພະເຈົ້າມາທີ່ນີ້ເພື່ອບອກກ່າວຕໍ່ພວກທ່ານທຸກຄົນແລະ
ບອກກ່າວຕໍ່ປະຊາຊົນລັດ Nevada ແລະປະຊາຊົນໃນນະຄອນ Las Vegas
ວ່າ ພວກເຮົາບໍ່ສາມາດລໍຖ້າໃຫ້ລັດຖະສະພາທີ່ບໍ່ເຮັດວຽກຂອງຕົນຫຼາຍຂຶ້ນນັບ
ມື້ນັ້ນເຮັດໜ້າທີ່ຂອງຕົນ. ບ່ອນໃດທີ່ພວກເຂົາເຈົ້າບໍ່ໄດ້ດຳເນີນການຂ້າພະເຈົ້າ
ຈະເປັນຜູ້ດຳເນີນການເອງ.”

ກ່ອນທ່ານໂອບາມາເດີນທາງໄປເຖິງລັດ Nevada ນັ້ນພັກຣີພັບບລີກັນໄດ້ຕຳໜິຕິຕຽນ ຕໍ່ຂໍ້ສະເໜີໃໝ່ຂອງປະທານາທິບໍດີ ເພື່ອຊ່ອຍພວກເຈົ້າຂອງເຮືອນທີ່ພວມປະສົບບັນຫາ
ນັ້ນ. ອີແມລສະບັບນຶ່ງຂອງຄະນະກຳມະການແຫ່ງຊາດຂອງພັກຣີພັບບລີກັນເວົ້າວ່າມາ
ຮອດປັດຈຸບັນນີ້ ທ່ານປະທານາທິບໍດີ​ແມ່ນໄດ້ເປັນຜູ້ກຳກັບນຳນະໂຍບາຍບ້ານເຮືອນທີ່
ລົ້ມແຫຼວ.

ບໍ່ດົນລຸນຫຼັງທີ່ປະທານາທິບໍດີໂອບາ ໄດ້ກ່າວຖະແຫຼງແລ້ວ ທຳນຽບຂາວກໍໄດ້ປະກາດ
ກ່ຽວກັບມາຕະການຊຸດ​ຕໍ່​ໄປ ທີ່ປະຊານາທິບໍດີຈະດຳເນີນຊຶ່ງເປັນນຶ່ງໃນບັນດາຂໍ້ລິເລີ່ມ ຫຼາຍໆຢ່າງທີ່ແນໃສ່ເພື່ອຊ່ອຍສ້າງວຽກເຮັດງານທຳສຳລັບພວກນັກລົບເກົ່າ.

ການເດີນທາງໄປຢ້ຽມຢາມແບບໂຄສະນາຫາສຽງເທື່ອລ່າສຸດຂອງທ່ານໂອບາມາຄັ້ງ​ນີ້
ແມ່ນຮວມທັງລັດ California ແລະລັດ Corolado ນຳດ້ວຍ.

ລຸນຫຼັງທີ່ໄດ້ຮັບໄຊຊະນະ ໃນການເລືອກຕັ້ງປະທານາທິບໍດີປີ 2008 ທີ່ລັດ Nevada
ແລະ Corolado ແລ້ວທ່ານໂອບາມາກໍຫວັງວ່າ ຈະສາມາດຮັກສາໄຊຊະນະດັ່ງກ່າວ
ໄວ້ໄດ້ອີກ ໃນການເລືອກຕັ້ງປະທານາທິບໍດີໃນປີໜ້າ. ນອກນັ້ນແລ້ວລັດທັງສອງຍັງມີ
ພວກມີສິດປ່ອນບັດ ທີ່ປາກເວົ້າພາສາສະເປນຫຼາຍຂຶ້ນ ຊຶ່ງພວກນັກວິເຄາະເວົ້າວ່າ ມີ
ຄວາມສຳຄັນຫລາຍຕໍ່ການຖືກເລືອກເປັນປະທານາທິບໍດີອີກເທື່ອນຶ່ງຂອງ​ທ່ານ​ໂອ​ບາມາ
ນັ້ນ.

ເປັນທີ່ຄາດກັນວ່າ ໃນວັນພຸດມື້ນີ້ຢູ່ທີ່ນະຄອນ Denver ທ່ານໂອບາມາຈະປະກາດ
ກ່ຽວກັບແຜນການນຶ່ງ ເພື່ອຊ່ອຍພວກນັກສຶກສາກ່ຽວກັບການຈ່າຍເງິນກູ້ຢືມເພື່ອສຶກສາ
ຮໍ່າຮຽນຂອງລັດຖະບານກາງຄືນ. ໃນການເດີນທາງໄປຢ້ຽມຢາມລັດ Corolado ເທື່ອ
ກ່ອນນັ້ນ ທ່ານໄດ້ຊຸກຍູ້ຂໍ້ກຳນົດຂໍ້ນຶ່ງຢູ່ໃນແຜນການສ້າງວຽກເຮັດງານທຳຂອງທ່ານທີ່
ຈະປັບປຸງໂຮງຮຽນຕ່າງໆໃນສະຫະລັດໃຫ້ທັນສະໄໝນັ້ນ.

ປະທານາທິບໍດີໂອບາມາ ມີຄວາມຕັ້ງໃຈທີ່ຈະໃຊ້ການເດີນທາງທີ່ຄ້າຍຄືກັນນີ້ ໃນໄລຍະ
ສອງສາມອາທິດຂ້າງໜ້າເພື່ອສົມທຽບໃຫ້ເຫັນຄວາມແຕກຕ່າງ​ໃນລະຫວ່າງສະເໜີສ້າງ
ວຽກງານຂອງທ່ານທີ່ທ່ານເວົ້າວ່າຈະສ້າງວຽກການຢ່າງນ້ອຍ 1 ລ້ານ 9 ແສນວຽກນັ້ນ ກັບຂໍ້ສະເໜີຂອງພັກຣີພັບບລີກັນທີ່ທ່ານເວົ້າວ່າ ຈະບໍ່ເຮັດໃຫ້ເສດຖະກິດເຕີບໂຕຫຼືສ້າງ
ວຽກການເຮັດແຕ່ຢ່າງໃດໃນໄລຍະສອງປີຕໍ່ໜ້ານີ້.

ເບິ່ງວີດີໂອ ລາຍງານທີ່ກ່ຽວຂ້ອງກັນ:

XS
SM
MD
LG