ສະພາຕຳ່ ສະຫະລັດ ໄດ້ຜ່ານຮ່າງກົດໝາຍຄົນເຂົ້າເມືອງ ທີ່ແນ
ໃສ່ ແກ້ໄຂວິກິດການຢູ່ຕາມຊາຍແດນ ສະຫະລັດ-ເມັກຊິໂກ.
ຮ່າງກົດໝາຍທີ່ຮັບຜ່ານໂດຍສະພາຕໍ່າ ທີ່ພັກຣີພັບບລິກັນ
ຄວບຄຸມນັ້ນ ຈະເຮັດໃຫ້ງ່າຍຂຶ້ນ ໃນການຈັດສົ່ງກັບຄືນປະເທດ
ພວກເດັກນ້ອຍທີ່ລັກລອບເຂົ້າເມືອງ ໂດຍບໍ່ມີຜູ້ປົກຄອງຕິດ
ຕາມມານຳນັ້ນ ແລະເພີ້ມງົບປະມານໃຫ້ແກ່ ໜ່ວຍພິທັກຊາດ
ຫລື National Gard ຢູ່ຕາມຊາຍແດນ. ບັນດາຜູ້ແທນສະພາ
ຕ່ຳພາກັນ ເຮັດວຽກຈົນເດິກໃນຄືນວັນສຸກວານນີ້ ເພື່ອຄ້ຳປະກັນໃຫ້ມີການລົງມະຕິ ກ່ອນປິດກອງປະຊຸມ ໄປພັກຜ່ອນລະດູຮ້ອນ ເປັນເວລາຫ້າອາທິດ.
ສະພາສູງທີ່ນຳໂດຍພັກເດໂມແຄຣັດ ໄດ້ປິດປະຊຸມແລະຢຸດພັກ ໂດຍບໍ່ໄດ້ລົງມະຕິ ກ່ຽວກັບ
ຮ່າງກົດໝາຍຂອງຕົນ ຊຶ່ງໝາຍຄວາມວ່າ ຈະບໍ່ມີບາດກ້າວໃດໆຈາກລັດຖະສະພາ ກ່ຽວກັບ
ບັນຫານີ້ອີກ ຢ່າງໜ້ອຍກໍຈົນຮອດເດືອນໜ້າ.
ປະທານາທິບໍດີ Barack Obama ຮ້ອງຮ່າງກົດໝາຍຂອງສະພາຕ່ຳວ່າ ຮຸນແຮງ. ທ່ານ
ໄດ້ຕິຕຽນ ພັກຣີພັບບລິກັນ ທີ່ໄດ້ຮັບຜ່ານມາດຕະການ ທີ່ທ່ານກ່າວວ່າ ສະພາສູງຈະບໍ່ຮັບ
ຮອງເອົາ ແລະທ່ານເອງກໍຈະໃຊ້ອຳນາດຍັບຍັ້ງ. ທ່ານປະທານາທິບໍດີໄດ້ກ່າວວ່າ ເພາະວ່າ
ບໍ່ມີຮ່າງກົດໝາຍໃດໆໄດ້ຮັບການສະໜັບສະໜູນ ຈາກສະພາຄົບຊຸດ ທ່ານກໍຈະປະຕິບັດ
ການຕາມລຳພັງຜູ້ດຽວ ເພື່ອອະນຸມັດເງິນສຳຫລັບການເບິ່ງແຍງພວກເດັກນ້ອຍເຂົ້າເມືອງ
ແລະໃຊ້ຈ່າຍໃນການຮັກສາຄວາມປອດໄພຢູ່ຕາມຊາຍແດນ.